Интернетын... книга ӝажыос туала дыр библиотекаосы но воштӥськон пыртэ

- Тодӥськоды на ке, 8-9 ар талэсь азьло библиотекаосы книгаос бертэмысь дугдӥзы. 2007-тӥ арысен Федеральной бюджетысен субсидия сётыны кутскон, книгаосты быръён луонлыкез мултэстӥз. Ми лыдӟисьёсты соос тунсыкъяськем книгаосын обеспечить карыны быгатӥмы. Та уж 2014-тӥ арозь азинтӥськиз. Библиотекаосмылэн книга фондъёссы синме йӧтымон узырмизы, - шуэ районысь библиотекаослэн сетьсылэн директорез Резеда Зарипова.

Та воштӥськонъёс, зэмзэ но, вылӥын верам программалэн одӥг бадӟым плюсэз. Сыӵе программалэн рамкаяз «Модель библиотекаос» но усьтӥськыны кутскизы. Котькуд зонаысь али дыре куронъёслы тупам, книга фондзы но лыдӟисьёссы трос, ужъя показательёссы вылӥ луэм одӥг библиотека быръемын. Салаусь, Ципья, Шубан, центральной нылпи библиотекаос ватсаса компьютерен, проекторен, экранэн обеспечить каремын. Та уж азьланяз но азинтӥськоз.

Библиотекаос быдэс тодон-валан ӧрез но сервисной пӧртэмлыкъёсты огазе люканы, лыдӟисьёслэсь кругзэс паськытатыны тыршо. Библиотекаын ужасьёс ялан выль ужан амалъёсты но формаосты утчало, профессиональной устолыксэс будэто. Книга лыдӟисьёс понна ялан пумиськонъёс ортчытъяло. Пӧртэм тематикалы сӥзем ужрадъёс но калыкез библиотекалы матын каро.

Резеда Зарипова верамъя, районысь центральной библиотекаысь гужем но адями уг быры. Посёлокысь нылпиос гинэ ӧвӧл, бабай-песяйёссы доры куное бертэм нылпиос но татын ялан «куно» вылэм. Гуртъёсын но сыӵе ик югдур. Асьсэос дорын луымтэ книгаосты, центральной библиотекаысен юатыса басьтыто.

Библиотека туннэ тӥни озьы дырен ӵош воштӥське. Нош книгаослэн адямиослы чебер сямъёс пыӵатыны, ортчемзэ вунэтытэк, улонлэсь кадырзэ валаса, азьпалзэ умоен адӟыны дышетэмзы гинэ воштӥськытэк кыле.