«Катанчи усьтӥське» (+фоторепортаж, видео)

Покчи Лӧзя культура юртысь артистъёс сцена вылын Лидия Вахрушевалэсь «Ӟеч кыл дуно» пьесазэ пуктӥзы. Солэн шорсюлмаз гуртын пиеныз, кенэныз но внукеныз улӥсь одӥг удмурт песянайлэн улонэз, сюлмаськонъёсыз но кӧтӝожъёсыз. Спектакль ӝутэ туж лэчыт нравственной ужпумъёсты. Соос туннэ нуналэ но туж актуальноесь луо. Ӧжыт шат шаерамы пересьёс, кудъёсызлы, улэп нылпиоссы луыса но, арлыдоос понна чаклам казённой юртын улыны тупа?! Валтӥсь героиня но сыӵеос пӧлысь (кенэз сое кужмысь дорысьтыз улля но песянай арлыдоослэн юртазы шеде). Ӧжыт шат пӧламы кырсь сюлмо, сук мылкыдо егитъёс, кудъёсыз уг валало, куке но асьсэос но пересьмозы шуыса?! Соосты кыӵе улон-адӟон вите меда?..

Пусъем потэ на покчи лӧзяослэсь амало луэмзэс но. Соос спектакльзэс учкисьёслы эшшо но матын карон понна вераськоназы асьме Шошма вераськетысь кылъёсты, «Апай сямен» эктонэз пыртӥллям, эшшо асьсэлэсьсэ но ватсаллям. Шумпоттӥз артистъёслэн импровизировать карон быгатонлыксы: ӧжытак шугъяськон кылдыку яке кыл вуныку, отын ик ог-огзылы юртто.

Малпасько, люкаськем калыклы (жаляса верано, адямиос туж ӧжыт вал) спектакль туж кельшиз шуыса. Соос артистъёсын ӵош бӧрдӥзы но, дыр, кытын-отын серектӥзы но, вунэм кырӟанъёсты но тодазы вайизы, дыр. Оскем потэ, та спектаклез учкыса, котькудӥз учкись аслыз шонер йылпумъян лэсьтӥз шуыса.