Кидыс басьтӥськод ке, учкыса басьты

Кылсярысь, сугон, пастернак, петрушка, чырстурын, баклажан - 1-2, курыткушман, редис, кубиста, сяртчы, ӵужкушман - 3-4, гордкушман, арбуз, кабак, пӧсьтурын, кияр - 4-5, кӧжы, кукуруза - 5-7, помидор - 7-9, немычкӧжы (бобы), фасоль, дыня кидысъёс 9-10 ар ӵоже асьсэлэсь удан кужымзэс уг ышто.

- Туннэ нуналэ тросэз кидысъёсты магазинысь басьтэ. Но чебер суредо пакетъёсын урод ӟечлыкен кидысъёс но луыны быгато. Соин но, кидыс басьтыкуды, сак луэ, пакетысь гожтэмзэ рос-прос учке. Отын организацилэн нимыз, адресэз, будослэн нимыз, сортэз, категориез, партия номерез, секталаез (граммъёсын) яке кидыслэн быртыкез, пайдаяськыны ярамон дырыз возьматэмын луыны кулэ. Со дырыз ортчем ке, озьыен кидыс уданлыксэ ыштэм, - ивортэ милемлы Россельхознадзор управлениысь государственной инспектор Рафкат Галимуллин.

Вузкарисьлэн котькуд партиысь кидыслэсь сортсэ но мерттон (кизён) ӟечлыксэ юнматӥсь документъёсыз луыны кулэ. Шеканы кутскиськоды вылэм, вузкарисьлэсь удан ӟечлыксэ процентъёсын возьматӥсь документсэ курыса басьтэ. Выль сорт басьтыкуды, нырысь солэсь государствоен регистрировать каремын луэмзэ тодэ.

F1 пусэн гибрид сортъёс 1,5-2 поллы тросгес урожай сёто, ӝоггес будо, висёнъёслы но урод инкуазь условиослы уг сётско, урожайлэн чебер но ческыт луэменыз висъяськыса уло. Но соос та ӟечлыксэс вуоно арозь ышто, мукет сямен вераса, сыӵе сортъёслэсь асьмеос кидыс лэсьтыны ум быгатӥське, арлы быдэ магазинысь басьтоно луиськомы.

Тодады вайытӥськом: басьтэм кидысъёсты шекан кылдытӥзы ке, Россельхознадзорлэн Кукмор отделаз ивортыны быгатӥськоды.