Хезмәт

«КИНЭ ДУШМАНЛЭСЬ УТИМЫ?»

Атаелэн эшъёсыз туж трос. Котькудӥзлэн аслаз адӟонэз, кудӥз бадӟым семьяын будэм, кудӥз ачиз табере трос нылпи будэтэ. Нош тани Ѓаны гуртын вордскем но туннэ нуналэ Улын Ушма гуртын улӥсь Владимир Кондратьев эшез сярысь тужгес бадӟым гажан мылкыдэн вера со.

Владимир Павлович Кондратьевлэн ортчем улон сюресэз визьнод басьтымон. Огшоры колхозникъёслэн семьяязы будэм со. Володя агайлы военной службазэ ӟырдыт точкаын, изо-гурезё Афган музъемын ортчыны тупа. Со аръёсы адӟемъёсыз сярысь юалляськыны кутскид ке, Владимир Павлович шугъяськысагес гинэ вераны кутске: «Ми семьяын 4 пи будӥмы. Одӥгмы но армие мынонлэсь пегӟыса ӧм ветлэ. Одӥг агае - Москваын, мукетыз Киров городын, куинетӥез Туркменистанын, нош мон Афганистанын служить кари. 1980-тӥ арлэсь 20 октябрь нуналзэ туннэ кадь тодӥсько али. Зоро, мӧзмыт сӥзьыл куазь вал. Со нуналэ мон - 20 аресъем пи - гуртысь но, районысь но огнам луыса, военной службае кошки. Инкуазен ӵош анай-атае но бӧрдэ: пизэс армие келяло ук. Мыноно сюресмы капчи ӧз луы. Казаньысь военной комиссариатысен сюрес вылын жадьыса лыктэм 500 шофёр пиосты уин нош ик кузь сюрес вылэ поттыса лэзизы. Поездэн куать сутка ӵоже мынэммы бере, Ташкент городэ вуыса интыяськимы. Татын одӥг толэзь но ӝыны ӵоже боевой подготовка ортчимы. Собере 19-тӥ декабре уин Афганистанысь Кабул городэ келязы. Уин ТУ-154 самолёт 154 егит, кышкасьтэм пиосты пӧсь, изо-гурезё Афган музъеме вуттӥз. Эшъёсы пӧлын асьме районысь пиос ӧй вал ке но, Казаньысь одӥг, Арчаысь вить пиосын кӧня ке дыр куспын люкиськонтэм эшъёс луимы.
37116 номеро нимысьтыз подготовкая батальонын шофёр-ефрейтор луыса кык ар служить кари, кык ар куспын Кабулысен Термизэ 10 пол груз нуллыны тупаз. Со кык городъёсты огазеясь кышкыт сюрес мынам сюлмам мур, бурмисьтэм яра кельтӥз. Та сюресын огшоры афган калыкез утьыны лыктэм кӧня чик янгыштэм солдатъёс бырыны шедё, кӧняез сӧсырме. Бусыосазы мак будэтыса, «тӧдьы кулонлы» сюрес усьтӥсь калык егит солдатъёслэн сюлэмъёсазы сьӧсь, жалясьтэм луэменыз пыӵаса кылиз. Омырлэн температураез 70 градусозь но вуылэ вал. Пӧсьлэсь каньсырам, жадем арлыдо адямиосты сюлмысен жаляса ву сётыкузы, душманъёслэн пулязы йӧтыса бырем солдатъёсты кызьы вунэтод? Возьманы, утьыны шуыса лыктэм солдатъёсты интыысь калык ачиз мыскыл карылӥз. Афган музъем улонэз адӟыны, умой валаны но вутскымтэ егит пиослы курыт урок луиз. Татын нокинэ жаляны но, нокинлы оскыны но уг яра вал - улонэныд люкиськыны тупасал. Афганистанысь изо-гурезё сюресъёстӥ ветлон егит солдатъёслы гинэ ӧвӧл, опытэн шофёръёс понна но кулон выж вамен потонэн ӵошатымон луэм, дыр.
Вордскем палъёсам бертытозь 2 толэзь кылем бере, нимысьтыз грузэн, 45 машина одӥг радэ султыса, сюрес вылэ потӥмы. Душманъёсын самой кужмо жугиськон соку луиз. Ми 30 адямимес ыштӥмы. Кабулын монэным ӵош военной службазэ кутскем Арча районысь Пшенгер гуртысь пиез кулонлэсь утьыны ӧм быгатэ. Военной грузэз ӟечен гинэ интыяз вуттыны быгатэме понна, монэ «За боевые заслуги» медален пусйизы. Вордскем шаерам бертэме дырысен 31 ар ортчиз ке но, со аръёс одӥг но уг вуно. Кин понна ожмаськимы ми, кинэ душманъёслэсь утимы? Аръёс ортчемъя таӵе малпанэ но вуи: оло, та шаерын милемыз асьмемыз утьыны кулэ луэм, дыр», - шуэ Владимир Павлович. Бен, тодмо, ожын калыкез умоезлы но уродэзлы люкыны уг луы, вормисьёс но келясьёс гинэ луо. Афган шаерын нуиськем валантэм жугиськонэ пыриськем егит пиос но мӧйымо ни, нош куд-огъёсыз воксё пӧламы ӧвӧл ни. Владимир Павлович кадь зэмлык понна ожмаськисьёс милемлы - егит поколенилы - адӟем карымон луо.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: