Комбайнёръёсын узыр гурт

Тани «Бурнак» ООО-ын но гектарысь, шорлыдын вераса, 30 центнерлэсь тросгес ю тысь басьтэмын. Тыршемлэн ӟеч бервылыз со. Тодам лыкто 60-тӥ аръёслэн кутсконзы, пичи дыры. Урамын плакатъёс луыло вал: «ТУЭ КОТЬКУД ГЕКТАРЫСЬ БЫДЭН 15 Ц Ю ТЫСЬ БАСЬТОМ». Ас вакытаз со вылӥ урожай вал. Соку али кадь удобрениос но ӧй вал, кидысъёс но удалтонлыксыя лябгес вылэм, дыр. Октон-калтон техника сярысь ке верано, Кунян кенерамы (со Починка нюлэсэн гурт кусып, али отӥ бадӟым сюрес кошке) «Сталинец» нимо комбайнъёс сыло вал. «Сталинец» самоходной но ӧй вал, сое трактор борды юнматыса ветлытылӥзы. Соослэсь кутсам юзэс гуртысь амбаре ик нуллӥзы. Ми, пичиос, амбарын ӟольгыриос мында люкаськылӥськом вал. Амбарен кивалтӥсь Иван агай Петров (Илля Дьыван) милемыз кышкатъя вал: кузь векчи жерда борды пушнер думыса, уйылыса ветлоз вал. Нош ми машинае пуксиськом, кошкиськом комбайн доры ю вайыны. Шофёръёс номыр ӧз шуылэ: Соловьёв Лёнька агай (Новая Гораысь), Шестаков Гиргорей агай (Карек-Сермаысь), Накип агай (Бурнакысь). Ма, соку быдэс районлы Ахмат агай сяна ГАИ-ез луымтэ, шуо. Умой соиз, сыӵе-таӵе урод учыръёс ӧз луылэ. Комбайнёръёс ваньмыз сямен асьме гуртысь вал: Шестаков Пётр, Петров Семён, Давыдов Николай, Кириллов Валентин (мӧйыос пӧлысь со гинэ улэп на), Асаков Михаил. Бурнакысь комбайнёръёс соку ӧй вал на. Вань вал Турьялась Кошкин (Максимов) Мирон, Петров Пётр, Макаров Георгий. Озьыен, ю-нянь октон карек-сермаос вылын вал шуыны луэ. Гуртамы война дырозь нырысетӥ комбайнёръёс-трактористъёс Демеев Никодим но Шестаков Пётр Семёнович луиллям. Соос Ципьяысь Димитровской МТС-ын ужаллям. Но кутскем ужзэс война уретэ, кыксы ик жугиськонын бырыны шедё. Война бере ини соослэсь покчигесъёс, Урнякысь механизаторъёсты дасясь школаез (берло ни СПТУ) йылпумъяса, МТС-ын ужало, нош 1958 арысен колхозэ пото. Али гуртысьтымы комбайнёр луыса Николай Асаков но Владимир Якимов ужало. Соослэн наставникъёссы Михаил Леонидович Асаков но Пётр Аркадьевич Шестаков вал. 
Петыр агай гуртын колхоз кылдытон вакытэ вордске. Улонэз капчи уг луы. Соосты кулаке поттыны ужкагаз дасяло, семьязэс Арчае вутто. Ярам коть, чотамзы-эскеремзы бере, шонере потто но гуртэ лэзё. Пиналысен атайтэк кыле: атайзэ Шемордан сюрес вылысен уксёзэ талан понна, асьме гуртысь воргоронъёс ик виё. Вань семья анайзы вылэ кыле. 
Армиысь бертэм бераз, егит пи Шестаков Пётр Аркадьевич, 1953-тӥ арын Урнякысь механизаторъёсты дасясь школаез йылпумъя. Со аре ик Ципьялась Димитровской МТС-ын комбайнёр луыса ужаны кутске. Колхоз председательёслэн куремзыя, со Ципья районысь пӧртэм колхоз бусыосын ара-кутса. «Азьлане» газетэ сётэм сводкаослэн возьматэмзыя, Пётр Шестаков комбайнёръёслэн ӵошатсконазы котьку азьпал радын луылэ. Петыр агайлэн таӵе учыр верамез вань. 50-тӥ аръёсы Петыр агаез Чапаев нимо колхозлэн председателез Хурмат агай Абдуллин ӧте (соку Карек-Серма Бурнакен огазеямын уг на луы). Ӧтем бере мыноно. Ужаса-ужаса ӝыт вуэ, кӧт сюма, нош Хурмат агайлэн кутскем бусызэ быдтытэмез потэ. Хурмат агаед ӝогак гинэ бидонэн йӧл, нянь вуттэ. Одӥг кружказэ сием бере, чырты нош вите. Но... кыкетӥзэ лэзьыкуз, кружка пыдэсысьтыз тросак чибинь потэ. Сиськод на, мын. «Тӥни со дырысен ымам йӧл уг понӥськы», - шуылэ вал Петыр агай. Петыр агайлэн МТС-ын ужам дыръяз Трудовой книжкаяз арлы быдэ премиос басьтэмез адӟиське, соос ик уг-а верало солэсь ӟеч тыршыса, мед луоз шуыса ужамзэ?! 
1958 арын Петыр агай ужаны бертэ «Азьлань» колхозэ — отчы Пор-Кутеш но Карек-Серма гуртъёс пыро вал. Но со ик арын ваньзэ удмурт колхозъёсты быдтыса, бигеръёсын огазеямзы бере, Чапаев нимо колхозын комбайнёр луыса ужаны кутске. Нырысь азьло кадь ик «Сталинец» комбайнэн кутса, пумен улон воштӥськемъя, колхозэ самоходной СК-3 ваё, берлогес ни колхозын ваньмыз СК-4 комбайнъёс вал. Та комбайнъёс кабинаен ӧй вал, йыр йылын пичияк брезент липет гинэ вал. Али Петыр агай кабинаё «Нива» комбайнэн но ужаса вуиз. Нош кӧня юрттӥсьёсыз вал! Ваньзылы

техникаез яратон мылкыд пыӵатӥз, кудогез юрттӥсьёсыз берло асьсэос комбайн руль сьӧры пуксизы. Петыр агай кузпалэныз Марья апаен (Кутэшысь Данька Марья) 5 нылпи будэтӥзы: куинь пи но кык ныл. Пиос куиньназы ик комбайнёрлэн юрттӥсьёсыз луыса кыдазы. Нырысетӥ пиез Николай Казаньысь ВВТУ-эз йылпумъяз но пӧртэм танковой частьёсын служить кариз. Советской Союз таркаськем бере, армиысь отставкае потыса, кузпалызлэн дор палъёсаз, Украинае, улыны интыяськиз. Кыкетӥ пиез Михаил атаезлэн сюрестӥз кошкиз, со азьвыл шофёр вал, семьяеныз кӧня ке Казахстан палъёсын но улӥзы. Вордскем палъёсаз бертыса, Ципьяла юрт пуктэ, шулдыр гинэ уло. Пенсие потытозяз «Труд» ООО-ын комбайнёр луыса ужаз. Атаезлэсь трослы кужмо тыршись воргорон, котьма потэ киысьтыз. Тодӥськоды на, дыр, район газет бамъёсысь азьветлӥсь комбайнёръёс пӧлысь котьку адӟыны луэ вал Шестаков Михаилэз. Тӥни со Петыр агайлэн шоретӥ пиез ни. Куинетӥ пиез Семён но Ципья шоръёзо школаез йылпумъяса, Чистопольысь сельхозтехникумын механиклэсь ӧнерзэ басьтэ. Чапаев нимо колхозын бригадир луыса ужаз, но небыт муртлы калыкен ужан тырмытӥз, лэся. Дораз анаезлэн кельтэм мушъёсыныз выремзэ тодыса, Семёнэз колхоз муш бакчае интыяло. Ужъёссэ вылӥ дунъяса, со трос пол грамотаосын пусъемын, Москваысен но Ткачёвлэн нимыныз вань. Районын «Самой умой мушкась» ним басьтылӥз. Шутэтскон дыръяз шахматэн шудыны яратэ, районысь пӧртэм ӵошатсконъёсы но пыриськылэ, куинетӥ интыез но вань. Петыр агайлэн нылъёсыз но синмаськымонэсь. Бадӟым нылыз Зоя Ижевскын трос аръёс ӵоже медсестра луыса ужаз, аслаз умой гинэ семьяез. Нош кинлэн «Труд» ООО-лэн бухгалтерияз пыремез вань ке, со тодэ ни, отын ужа капчи мылкыдо, пальышаса гинэ вераськись, валамтэзэ лад-лад валэктӥсь кышномурт — со Валентина Петровна Шестакова (али Александрова). Валентина та гурт возёсын трос аръёс ӵоже экономист луыса ужаз, али со валтӥсь бухгалтер. Озьы, данъяськымон нылъёс но пиос будэтӥллям Марья апаен Петыр агай. 
Петыр агайлэсь ужзэ азьланьтэ солэн юрттӥсез луыса ужам Владимир Александрович Якимов. Тодады на, дыр, кык ар талэсь азьло республикаысь комбайнёръёслэн ӵошатсконазы пыриськыса, гуртысьтымы Владимир Якимовмы но Николай Асаковмы вормисьёс пӧлы шедизы но Грант утӥзы. Починка пиосты Казаньын вылӥ сценаын данъязы! Туэ но соос «Бурнак» ООО-ын азьветлӥсьёс. Возёсысь 75% мында ю-нянь Карек-Сермаысь кык воргоронъёслэн кутсамзы! Юрттӥсьёссы — асьсэлэн пиоссы Алексей Якимов (Казаньысь строительной колледжез йылпумъяса, армие ветлӥз) но Дмитрий Асаков (Атняысь гурт хозяйствоя колледжын механик ӧнерлы дышетскемын). Азьло аръёсы Артём Якимов но Леонид Асаков юрттӥсьёс вал. Леонид али спортшколаын вылӥ тодон-валанэн тренер луыса ужа. 
Николай Асаков но, Владимир Якимов сямен ик (соос огъёзъёс), нылъёс сьӧрын уйшор береозь ветлыса, соку ик вазь ӵукна султыса, атаез урдсын помкомбайнёр луыса ужам пи. Колялэн атаез Михаил Асаков кема ужаз комбайнэн, нош толалтэ тракторе пуксьылӥз. Петыр агай сямен ик, Урнякысь СПТУ-эз быдтэм. Ас дыраз бригадир но, фермаен кивалтӥсь луыса но ужаз. Берло нош ик комбайнэн ужаз на. Кузпалэныз Верка апаен куинь нылпи будэтӥзы. Зоя нылыз Свердловск улосын одӥгаз гурт возёсын (колхозын) повар луыса ужаз. Кыкетӥ нылзы Люба гуртэ бызиз, трос аръёс ӵоже вузкарон удысын тыршиз. Любовь Михайловналэн гуртын али аслаз магазинэз вань. Ӟеч ужамез Центросоюзлэн грамотаеныз пусъемын. 
Куамынэтӥ аръёсы вордскемъёслэсь комбайнэн ужъёссэс 50-70-тӥ аръёсы вордскемъёс азьланьтӥзы. Кинъёс соос? Хомяков Михаил (берло Чапаев нимо, «Труд» возёсъёсын инженер луыса ужаз), Яковлев Павел, Павлов Михаил но Игнатьев Анатолий (кулытозяз комбайн руль сьӧрын вал), кӧня ке ар ужазы Виталий но Пётр Асаковъёс, Николай Петров (Петров Семён агайлэн пиез) но Дмитриев Валентин, Никитин Владислав (инженер-технолог ужан куспаз), Виталий Павлов, Василий Игнатьев (Игнатьев Анатолийлэн пиез). Тазьы верано ке, Чапаев нимо колхозлэсь ю-няньзэ котьку но Карек-Сермаысь воргоронъёс утялтылӥллям луыса потэ. Гуртмы мушкасьёсын гинэ ӧвӧл (соос сярысь азьвылгес гожъяськем вал), комбайнёръёсын но узыр вылэм. Тыршыса ужазы но ужало гуртысьтымы удмурт пиосмы. Озьы

шуыкум, тодам лыктэ П.И. Рычков бадӟым ӟуч тодосчилэн (учёнойлэн) тазьы верамез: «Россия кунын ӧвӧл сыӵе калык, кудӥз ужез яратэменыз соосын (удмуртъёсын) ӵошатскыны быгатысал!» Кызьы уд данъяськы таӵе дунъетэн! Асьмелэн, удмуртъёслэн, удмурт луэммылэсь, вашкала выжыосын кылдытэм кылмылэсь воксё керпотыны мугмы ӧвӧл, удмурт нимынымы данъяськыса улыны кулэ. Йӧно, сабырлы асьмеос. Азьпалан но озьы мед луоз. Асьмеос ваньмы сямен таӵе куронэн улыны кулэ: «Мон — удмурт. Мон котькытын, котьку умой луыны кулэ». Но чиньымес куртчыны сётоно ӧвӧл, йырдэс эн оше — пельпумады пуксёзы. 
Гуртын улӥсьёс! Вуоно праздникен, ваньдылы юн тазалык, шудо-буро улон, котьку ӝӧк вылмы сиёнэн, ӝӧк котырмы пиналъёсын, гидъёсмы пудоен тыр мед луозы, ужады азинсконъёс, ужаса жадем бере лыдӟыны котькуд коркан мед луоз яратоно удмурт кылын «Азьлане» газетмы! 
Василий Никитин