Коррупция сярысь тодмо вал ини кемалась...

Коррупция. Асьмеос та кылэз огпол гинэ ӧм кылэ ини. Ӵемгес но ӵемгес пумиськыны кутскиз со асьме улонамы. Нош ваньзы валало меда, ма со коррупция, кыӵе солэн пуштросэз?

Коррупция сярысь тодмо вал ини кемалась. Нырысьсэ со сярысь вераськон пумиське асьме эралэсь азьло ньылетӥ даурын индийской трактатын: «Кызьы уг луы вераны, юо-а вузэ отын уясь чорыгъёс, озьы ик уг луы тодыны, басьто яке уг чиновникъёс асьсэлы музъемъёс но коркаос». Туннэ нуналэ ужало пӧртэм коррупцилы пумит кылдытэм ӧриос но комитетъёс. Нош малы ке но коррупция уг пичия. Коррупцилэн выжыосыз уго кужым шедьто асьме бордысь: кылсярысь, взятка басьтон яке дэмлан бордысен ик. Нош маин кузьым сётон висъяське взяткалэсь? Мынам малпамея, взяткаез сётон уж югдурен герӟаськемын, нош кузьымез, вань сюлмысен шудбур сӥзьыса, сёто матысь адямилы. Уг яра сураны та кык валатонъёсыз, уг яра кузьым сётон улсын взяткаен вырыны.

Коррупция — со секыт мерлыко валатон, кудӥз азьло ик быдтэ кивалтон аппаратэз но собере «сие» калык визья улонэз.  Али асьмеос улӥськом бугырес  но туж ӝог воштӥськись вакытэ. Коррупция быгатэ котькыӵе умой воштӥськонъёсты но ачиз улэ пачкатыны. Тужгес но паськыт вӧлмемын коррупция экономической сюреслэн будоназ но азинсконаз.  Дмитрий Анатольевич Медведевлэн кылъёсыз но тае пусъё: «Коррупция асьме шаерамы вӧлмиз бадӟым вылтусэн но сямен, со луиз тодмо, дышем югдуро, со возьматэ асьме мерлыклэсь улонзэ… Вераськон капчиен взятка басьтон яке сётон сярысь гинэ ӧвӧл; быдӟалазэ учкытэк, аслаз пуштросэзъя, со «сие» асьмелэсь экономикамес но «сисьтэ» асьме калыкез».

Коррупция — со вань кадь кунъёслэн кужмо висись интызы. Асьмелэн кунмы но мукетъёсызлэсь пӧртэм ӧвӧл. Нош кыӵе удысъёсын тужгес уно пумиське коррупция? Мон сямен, ӵемгес со адӟиське полициын, армиын, суд радлыкын, эмтодос но дышетон удысъёсын. Полициын взяткаос сёто штраф тыронтэм понна, судын — пытсэт улэ шедёнтэм, дышетон удысын — вылӥ тодон-валан басьтон вылысь но мукет. Таӵе югдур медаз луы шуыса, кулэ йыруж понна кылкутонэз но катъёсты чурытгес карыны.  

Та валатонэз озьы ик ӵошатыны луоз сынэм кортэн. Сыномем кортэз сие но лябӟытэ, куашкатэ. Дыр ортчыса со чиге. Коррупция но, коррозия выллем, «сие» асьмелэсь кунмес но калык визья улонмес. Калык визья улон чигыны кутскиз ке, кун ужасьёслы оскон лябӟе яке воксё но быре, огшоры адямилэн но улонэз сӧриське. Кемалась ӧвӧл мыным пумиськиз одӥг интервью, кытын гожтэмын вал таӵе кылъёс: «Улон мыным номыр но уг вайы ини. Мон ваньзэ адӟи, ваньзэ чидай. Мон адӟонтэм та эпохаез, мынам солэсь ӧскеме потэ. Мынам адӟеме уг поты та адямиосты. Ог-огдэ гажан вунэмын ини, нокин но аслэсьтыз сётэм кылзэ уг быдэсты. Коньдонлэн гинэ вань интыез та улонын. Котькуд нунал, ӵукнаысен ӝытозь, асьмеос кылӥськом йыружъёс сярысь. Мон тодӥсько, та улонысь кайгырытэк кошко шуыса», — таӵе малпанэ вуэм  Франциысь тодмо киноын но театрын шудӥсь Ален Делон.  Кыӵе кышкыт кылъёс! Малы туала улон адямиез но быдэс мерлыкез сӧре, коньдон ваньмыз понна валтӥсь луэ? Та юанэн котькудмы асьмеос вазиськыны кулэ, дыр. Котькудмылы вунэтоно ӧвӧл, нырысь ик асьмеос Адями шуыса. Угось асьмеос гинэ быгатӥськомы улонмес кулэ яке кулэтэм, умой яке урод ӧре лэзьыны. Ӵапак асьме бордысен кутске, кыӵе улонэн уломы: зэмлыко яке янгышо.

Мынам улэме потэ коррупция эрказмымтэ кунын. Воштӥське улон, воштӥсько адямиос. Но оскисько, вуоз сыӵе дыр, куке зэмлык но адямилык дунъяськозы коньдонлэсь дуногес. Тӥни соку, эмчи возьытсэ вунэтытэк эмъялоз, министръёс но политикъёс сюлмаськозы кунэз азинтон сярысь, но «коррупция» валатон кылёз историлэн ог люкетэз кадь гинэ.

Василий Терентьев,

Шор Кушкет школаысь 10 классысь дышетскись.