«Котькуд пудо, скал-а со, парсь-а, ыж-а — ваньмыз — саклыкез кулэ каре»

 Но пудо-животъёс дырен-дырен, адямиос кадь ик, висё. Соин но соослы куддыръя квалифицированной юрттэт возьматыны кулэ луэ. Та юрттэтэз возьмато ветеринаръёс, мукет сямен пудо врачъёс. Ӵапак туннэ соос профессиональной праздниксэс — Ветеринария удысын тыршисьёслэсь праздниксэс пусъё.

Гуртын пудо врачъёс азьло дырысен аспӧртэмлыко инты басьтӥллям. Огласянь, ветеринар пудо-животъёсты врач кадь ик уте, эмъя, ужан интызы, кабинетын ӧвӧл ке но. Медицинаын ужась кадь ик, соку ик юрттэт сётыны дыртэ. Мукет ласянь, скал кыскисьёс, пудо утисьёс кадь ик, ӵукнаысен ӝытозь со пудо пӧлын ботыен ветлэ, секыт но дэри ужлэсь кышкатэк. Гажало ик гуртын ветеринаръёсты. Валерий Михайлович Ивановез но Сизнер гурт калык, ма Сизнеръёс гинэ но ӧвӧл, специалистэз но огшоры адямиез кадь гажало, ӵемысь соин кенешо. Со — трос аръёс ӵоже ветеринар луыса ужась, та удысын бадӟым опыт люкам пиосмурт.     

— Кызьы 1985-тӥ арысен та удысын ужаны кутски, али но та удысын ик тыршисько, — шуэ ачиз но Валерий Михайлович. — Ми ведь пичи дырысенымы ик пудо дорын будэм нылпиос. Мон азьло дырысен скал кыски, ма али но кыскисько, вал но вордӥсько, — шуэ воргорон.

Пичи дырысеныз пудо-животъёсты яратыса но соосты утьыса будэм Валерийлэн ветеринарной удысэн улонзэ герӟамез паймымон но ӧвӧл ни. Буинскысь ветеринарной техникумез 1985-тӥ арын йылпумъяса, егит пи со арын ик «Труд» колхозын ужаны кутске. Но, зэмзэ верано ке, направлениезъя со Агрыз районэ сюрем вылэм. Районамы быгатӥсь ветеринар кулэ шуыса, Валериез татчы ӧтиллям — со дырысен ас гуртаз бертыса, улонзэ аслаз вордскем шаерезлы сӥзем.

— Тӥни озьы, — веранзэ азьланьтэ Валерий Михайлович, — гуртэ кыли. Нырысь кема аръёс ӵоже Вуж Ципьяын но Тагашурын ужаса ветлӥ — отын азьло вить сюрслэсь тросгес ыжъёс вал ук. Сомында пудоез утёно луиз. Собере Вуж Ципьяын гинэ ужай, фермалэн заведующиез но со дыре ик ветеринар луыса. Отын валъёсты, кунянъёсты, ыжъёсты учки, но отын ферма быриз. 2012-тӥ арысен кутскыса ини Тагашур фермаын ужасько. Татын но пудо уно — 100 йыр кысконо скалъёс, 80-лэсь тросгес валъёс, ветылъёс — 225 йыр, кунянъёс — 120, ошъёс но вань — ог 120 йыр. Уж тырме, огъя вераса, — шуэ Валерий Михайлович.

— Тӥляд ужан нуналды кызьы ортче, со сярысь но ӧжыт вералэ вал, — шуисько.

— Ӵукна мыныса пудоослы осмотр ортчытӥсько, котырскисько, ваньзэсты учкыса поттӥсько, пудоос висё ке ужасьёс ӵем дыръя асьсэос но верало. Нош мон ини собере соосты туж сак учкисько. Милям ужмы трос шуыны кулэ — ми пудоослы пӧртэм витаминъёс сётӥськом, соосты паразитъёслэсь обработать кариськом, тэйёссэс вийиськом, кызыкузы но эмъяськом. Та али милям ваньмыз быдэстоно ужъёсмы ӧвӧл.

Но макем трос ужъёс быдэстоно уг луы ке но гуртын, городэ кыльыны малпанэз но луымтэ Валерий агайлэн. Ми, пе, «кусоен но саникен ужаса будэм адямиос», кызьы , пе, городэ улыны кылёмы.  Азьло ужаны туж секыт луэм ке но (гуртысь гуртэ сумказэ кияз кутыса пыдын ветлыны но тупам), гуртэ кылемез сярысь огпол но жалямтэ пиосмурт. 33 ар ӵоже солы пӧртэм пудо-животъёсты утёно луэм (Сырьяысь парсь фермаын но ас дыраз ужам Валерий Михайловлы), ветеринарлэсь ӧнерзэ гинэ ӧвӧл, ферма заведующийлэсь ужзэ но ас вылаз утьыны тупам солы. «Шумпотӥсько, ваньмыз тэгыз шуыса. Уж дорын но ваньмы огъя, ӵошен ужаськомы, ог-огмылы юрттыса. Гуртоосылы но кулэезъя юрттӥсько, пудооссэс учкисько, эмъясько. Гуртын калык, мар шуид ке но, трос пудо вордэ. Йӧл сдавать каронлэсь уксё поттэ. Соин но пудолэн таза луэмез соос понна туж кулэ луэ», — вера пиосмурт.

Тагашур фермалэн заведующиез но, Валерий Митрофанов, Валерий агай сярысь мылкыдъёссэ вераз: «Валерий ини Тагашурын кема ужа. Со усто но быгатӥсь, аслэсьтыз ужзэ яратӥсь ветеринар. Пудоосты кулэезъя учке, тагашуръёслы но кулэ луыкуз ӵектонъёс сётэ, пудооссэс учке. Гуртамы асьмелэн ветеринармы ӧвӧл бере, Валерийлэн юрттэмез милемлы туж кулэ луэ».

Валерий Михайлович, зэмзэ но, ваньзылы юрттыны дась. Монэным вераськыкуз но со кӧня ке кенешъёссэ сётӥз, таосты, пе, адямиослы вуттыны кулэ. Вуттӥсько.

«Адямиослы, гурт калыклы, пудо утисьёслы тани мар вераме потэ: котькуд пудо, скал-а со, парсь-а, ыж-а — ваньмыз —  саклыкез кулэ каре, соосты котьку утёно, учконо. †емгес пудо-животъёстэс прогулкае чылкыт омыре поттэ, витаминъёсты сётыны эн вунэтэ. Туала дыре ведь кальций музъемын ӧвӧл шуыны кулэ, соин но пудоослы одно ик витаминъёс кулэ. Та капчи ӵектонъёсты тодады возиды ке, асьтэлы но, пудолы но трослы капчигес луоз». Озьы ик вуттӥсько Валерий Михайловичлэсь ваньзэсты ветеринария удысын тыршись ужасьёслы ӟечкыланзэ но. «Секыт ужамы ваньмыз каньыл мед луоз, тазалык, шудбур ваньмылы. Ноку медаз висе адямиос но, пудоос но. Валче ужасьёсме, ӵош дышетскемъёсме но вань кадь ветеринаръёсты праздникенымы ӟечкыласько». 

Сыӵе визьмо пиосмурт ужез ласянь гинэ визьмо ӧвӧл али. Гуртаз но со гажамон адями, яратоно атай но ӵужатай. Валерик агайлэн куинь нылпиез вань — Алесья, Алёна но Иван. Жаляса верано луэ, куать ар талэсь азьло Валерик агайлэн кузпалыз, Людмила, та улонысь кошкиз. Со дырысен вань ужъёсыз но, нылпиосыз но Валерий агай вылын луизы. Туннэ нуналэ аслаз нылпиосыныз данъяськыса, соослэн улонзылы шумпотыса, атайзы вера: «Куиньназы но нылпиосы вылӥ тодон-валан басьтӥзы, дышетыса поттӥ соосты. Туннэ нуналэ ини внукъёсы но вань. Нылпиосы ваньзы визьмоесь, монэ ярато, гажало, куное бертыло, уг вунэто атайзэс. Та мон понна самой бадӟым шуд», — шумпотэ пиосмурт.