Хезмәт

Куинь улон. Одӥг газет — «Азьлане»

Лыдӟисьёс тодо ни, дыр, газетмылэн бадӟым но узыр историяз туж трос адямиос пыриськиллям, котькудӥз ас дыраз аслэсьтыз вунонтэм пытьызэ кельтэм шуыса. Кӧня ке дасо ар ужад-а тон, одӥг-кык толэзь гинэ тыршид-а газетын (зэм, сыӵеосыз но луиллям) — тон пыраклы газетлэн историяз кылемын.

«Азьлане» газетын трос аръёс ӵоже, яратоно ужзылы сюлэмзэс сётыса, район калыклы удмурт кылын иворъёсты вуттон вылысь  семьяен-семьяен но тыршиллям. Кылсярысь, Гондыргуртысь Николай Борисов, Галина нылыз, Мария кенэз; Ушмаысь апаен сузэръёс Любовь Сарманаева но Антонина Моисеева; Пор-Кутешысь агаен сузэръёс — Самсонов Пётр, Самсонова Мария, Самсонова (Зимаева) Валентина; Лельвижысь Букашевъёс — кузпалъёс Иван но Мария, Иванлэн сузэрыз Зинаида. Кык апайёс но, Галина Васильева но Зоя Фёдорова, «Азьланелэсь» бадӟым люкетсэ кылдыто — кыкназылэсь ужам аръёссэс ватсад ке, ӝыны даур — 50 ар — люкаське!

Васильева Галина Константиновна

Галина Константиновна «Азьланеын» 1978-тӥ арын ужаны кутске. Егит Галиналы соку ик переводчиклэсь секыт ужзэ оско. Но, вераны кулэ, со татын туж ик кема уг ужа — 1983-тӥ арын егит нылкышно Свердловск улосэ улыны кошке. Но соку район газет аслэсьтыз секыт аръёссэ чида — переводчикъёссы луымтэысь трос шуг-секытъёс кылдо. Соин ик Галина Константиновнаез нош ик редакцие ужаны ӧтё. Малпаськемез бере, Галяпай выльысь вордскем шаераз бертэ но нош ик редакциын переводчик луыса ужаны кутске (со луэ 1990-тӥ ар). Одӥг арскын солы, шумпотымон, квартира но сёто.

19 ар ӵоже Галяпай переводчик луыса ужа. Бигер кыл солы та аръёс ӵоже вордскем кылэз кадь луэ ни. Со эркын вераське бигер сямен валче ужасьёсыныз но, огшоры тодмоосыныз но. Берпуметӥ ужан аръёссэ Галяпай валтӥсь редакторлэн дубляжъя воштӥсез луыса йылпумъя (2009-2013-тӥ аръёс).

— Сыӵе должностьын мыным ужаны ӵектэмзы бере, мон туж кышкай, — шуэ Галина Константиновна. — Уг поты вал мынам валтӥсь редакторлэн воштӥсез луэме. Ужез но капчи ӧвӧл, кылкутонэз но бадӟым. Но ужаны косэм бере, ужано ни, — шуэ со.

Ужаны кутскем бераз секыт но кылкутон ужлэсь Галяпай кышкамтэ, аслэсьтыз ужзэ но котьку кулэезъя быдэсъям. Ярам, туала дыре ужаны капчи — компьютер вань, нош азьло линотип машинаен курадӟиллям — одӥг янгышез ке текстын шедем, куинь-ньыль чурез выльысь люкано луэм. Соин но туж сак ужано вал наборщицаослы но, корректоръёслы но — ваньзылы.

— Жаляса верано, азьло удмурт журналистмы ӧй вал, соин ик газетлэн шӧмыз но туж «удмурт» ӧз луылы. Мазэ ватонэз, «бигеръёс сярысь гинэ гожъяськоды, милемлы котьку соос сярысь гинэ лыдӟыны тунсыко ӧвӧл» шуисьёс но луизы. Озьы ке но, газетлэн тиражез 700-лэсь тросгес вал. Та, мар шуид ке но, район газет понна туж умой показатель. Ма, район газеттэк адями аслэсьтыз улонзэ уг адӟы вал, дыр. Ми кызьы гинэ газетлы «удмурт» шӧм пыӵатыны ӧм тырше, лыдӟисьёслы куриськыса вазиськомы вал, соос но статьяос мед гожъялозы шуыса, — вера Галяпай.

— Бен, — юасько, — одӥгез ке но лыдӟись гожъялляз-а?

— Гожъялляз Вуж Турьяысь Николай Никифоров (али дыре кулэмын ни — Н. Ж.). Кыӵе чебер гожъяськиз со, огшоры кылын гинэ, адямилы валамон, соин но сое лыдӟыны калык яратӥз, — тодаз вае Галина Константиновна.

Галяпай ачиз статьяос гожъямтэ ке но, ужан аръёсыз куспын кӧня бигер статьяос берыктэм меда? Сюрсъёсын люкаськозы, дыр... Ведь котькуд материалэз берыктӥсь ас сюлмыз пыр поттэ. «Статьяез берыктыса быдтэм бере, кыӵе каньыл бен луэ вал сюлмын, — ужам аръёссэ син азяз пуктыса, пальпотыса вера Галяпай, — оло, туж бадӟым уж йылпумъяд. Сыӵе минутъёсы астэ калыклы кулэ луись ужен вырисько шуыса юн валасько вал, — шуэ со.

Ужзэ яратыса быдэстӥсь адями котькудӥз но ужам аръёсыз сярысь умой кылын гинэ тодаз вае, дыр. Галяпай но озьы ик. Со аслэсьтыз ужзэ котьку яратэм, редакциын ужамез сярысь ноку но жалямтэ. Ужысь кошкыны но солы туж секыт луэм. «Кыӵе бен мон редакциысь кошкем бере ужлэсь мӧзми, — шуэ Галина Константиновна. — Коркан кытчы пырыны ёрмыса ветлӥсько вал, мар ужаны но ӧй тоды». Но дыр ортчыса, ваньмыз радъяськем. «Озьы ке но, — серекъяса тодаз вае Галяпай, — вӧтам али но газет поттӥсько, ялан редакциын ужасько». Сомында ар одӥг интыын ужам бере, ужын ортчем дыръёстэ вунэтон понна туж трос аръёс кулэ, дыр...

— Улонлы уг ӝожтӥськиськы, ваньмыз умой, — шуэ Галина Константиновна. — Уг ужаськы ни ке но, газетлэсь котькуд номерзэ лыдӟисько, огпол но уг кельтӥськы. Газет туж умой потэ, азьло палан но сыӵе ик мед луысал, — сыӵе умой сӥзёнъёссэ но вуттӥз Галяпай.

Фёдорова Зоя Константиновна

Зоя Константиновна — Галяпайлэн апаез. Со но редакциын сузэрез кадь ик кема аръёс ӵоже тыршем (огъя 22 ар).  Но ужан сюрессэ Зоя Константиновна редакциын ӧвӧл, Гондыргуртын мытэ (1967-1974-тӥ аръёс), 1974-1982-тӥ аръёсы со Ярак-Чурма клубын заведующей луыса ужа. Нош ини 1982-тӥ арын — соку Зояпайёс семьяенызы Балтасе улыны выжо — редакциын переводчик луыса ужаны кутске.

— Ми бигер кылэз пичиысен ик семьяен тодӥмы, со кыл милемлы котьку туж матын вал. Соин но мыным переводчик луыса ужаны дышыны секыт ӧй вал, — шуэ ужаны кутскем аръёссэ тодаз вайыса Зояпай.

Веранзэ азинтыса, Зоя Константиновна серекъяса шуэ: «Нырысь ужаны кутскыкум, интыысьтым вырӟытэк, йырме ӝутытэк ужай. Тае шӧдыса, валаса, Александр Сергеевич Петров мыным: «Ойдо, шутэтскы ӧжыт», шуиз. Тӥни сыӵе валась, жалясь, адямилэн югдураз пырыны быгатӥсь коллективен ужай».

Редакциын секыт дыръёс луиллям ке но (ужась персонал тырмымтэ), Зоя Константиновна татчы ужаны интыяськемез сярысь огпол но жалямтэ. Адями ужась ке, нокыӵе ужлэсь но уг кышка со, шуо ук. Кыӵе гинэ секыт текст берыктоно уг луы ук переводчикъёслы (тужгес но гуртысь сезон ужъёс мыныку). Но Зояпайлэн верамезъя, котькуд ужлэн аслаз секытэз но, капчиез но вань. Редакциын но озьы ик. Переводчиклы дыраз текстэз берыктоно, корректорлы — дыраз эскероно, вёрсткаен ужасьлы — газетэз «тыроно». Соин ик котькудӥз аслэсьтыз ужзэ быдэстӥз ке, ваньмыз умой пӧрме. Кылсярысь, азьло линотип машинаен текстъёсты кема бичано луэм, али нош та ужез компьютерен трослы ӝоггес карыны луэ. Но та туала дыре ужаны капчигес шуэм кыл ӧвӧл. Али ведь ини газет сяна, сайтэ но материалъёс гожъяно...

— Газет быроз шуыса веранъёсты кылэмды вань, дыр. Кемалась ӧвӧл «Вечерняя Казань» газетэз но поттэмысь дугдӥзы... — уж сярысь гинэ юалляськод-а ма шуыса, вераны гинэ кутски но, Зояпай мынэсьтым юанме валаса, вераз:

— Газет — со котьку газет. Нокыӵе но сайт зэмос газетэз уз вошты. Милям тани семьямы газетэз туж яратыса лыдӟе. Ачим но лыдӟисько, кузпалы но одӥг чурзэ но кельтытэк лыдӟе. Мон уг валаськы — кызьы ни со «Азьлане» газеттэк?!

— Тӥ огъя газетын 22 ар ужады, вань дыр ӵоже переводчик луыса. Валамон, коллектив эшлыко бере, ужаны но капчи луэм, дыр. Нош сомында ар ӵоже огвыллем ужен вырыны ӧз акыльты-а тӥледлы? — юасько.

— Мон тани кызьы шуысал. Котькыӵе ужлы нырысь дышыны кулэ. Нош мылкыд вань ке, котьмалы но, котькыӵе ужлы но капчиен дышыны луэ. Дышем бере нокыӵе но уг поты ни. Мыным текстъёсты берыктыны туж кельше вал. Статьяез берыктыны кутскид ке, тон со пушкын уяськод, тон солэн пушказ пыриськод, сое ас сюлмыд пыр поттӥськод. Со ужлэсь жадьыны уг луы, дыр — котькуд материаллэн аслаз пуштросэз, аслаз шӧмыз, аслаз секретэз. Выль статья борды кутскон — со выль уж борды кутскон кадь», — сыӵе чебер вера Зояпай берыктон уж сярысь.

Азьло малпаськем вал, журналист понна гинэ котькуд статья — со выль уж, выль малпанъёс, выль кутсконъёс шуыса. Нош Зояпаен но Галяпаен вераськеме бере, валай — янгышаськем. Соослы «Азьланеын» ужан номаин воштонтэм опыт сётэм. Со сяна, умой эшъёс но. Кызьы вераз Зоя Константиновна, «ноку но даллашыса ӧм ужалэ, огкылысь ужамы». Но собере серекъяса ватсаз: «Ми туж умой дыре улӥмы но, ужамы но, пенсие но потӥмы». Соин улонлы ӝожтӥськымон ӧвӧл, шуо нылкышноос.  Галяпай али дыре кузпалэныз Николай Павловичен Покчи Лӧзя гуртын бадӟым но югыт корказы шулдыр уло. Куинь нылъёссы но ини асьсэлэсь улонъёссэс радъяллям. Зояпайлэн но кузпалэныз Александр Григорьевичен улоназ ваньмыз умой — соослэн но куинез нылпиоссы улонын ас интызэс шедьтӥзы. Туннэ нуналэ соос пиенызы, Олеген, Гузель кенэнызы но Артём, Тимур но София внукъёсынызы валче уло. Кыкназылэн ик апаен сузэръёслэн внукъёссы вань. Шудо улон понна нош мар бен кулэ?

P.S. Тросэз уг тоды, дыр, Зояпайлэн выныз, нош Галяпайлэн агаез, Иванов Владимир но, редакциын ужам шуыса. Со луэм 1971-тӥ арын. Владимир школаез йылпумъяса гинэ быдтэ но, редакциын переводчик луыса ужаны кутске. «Редакцие лыктэм бере, мыным берыктыны текст сётӥзы, озьы ик словарь. Берыктэме кельшэм, лэся — монэ ужаны басьтӥзы, — тодаз вае Владимир Константинович. — Редакциын трос ӧй ужа ке но (ваньмыз 4 толэзь луэ), самой шуныт но югыт тодэ ваёнъёс кылемын со дыр сярысь. Ми отын соку кык ӵошен Ивановъёс ужаськомы вал — мон но Бадӟым Лӧзяысь Александр Иванов. Вот милемлы валче ужасьёсмы бадӟым Иванов но покчи Иванов шуыса гинэ вазьылӥзы. Мон текстъёсты берыктӥсько гинэ вал ке, Иванов-бадӟым ачиз гожъялляз.Умой вал кусыпъёсмы соин, ма ваньзэсын редакциын ужасьёсын но. Типографиын ужась нылъёсын но тупаса ужамы. Котьма шуид ке но, ужме яратыса быдэсъяй, уждунмы но умой вал — толэзезлы 100 манет, со дыре та трос уксё вал», — шуэ Владимир Константинович.

Реклама
Теги: юбилей
Нравится
Поделиться:
Реклама
Комментарии (0)
Осталось символов: