Кукмор ёросын удмурт но пор кылъёсъя дышетӥсьёслэн семинар-кенешонзы ортчиз (+фото)

Асьме ёросысь та семинар-кенешонэ 13 мурт мынӥз. Со – Покчи Лӧзя шоръёзо школалэн директорез Эмиль Гарипов, Ципья шоръёзо школалэн директорез Сайдаш Нурмиев, Шор Кушкет шоръёзо школалэн директорез Владислав Никитин, Покчи Лӧзя школаысь директорлэн воштӥсез Ольга Пчельникова но удмурт кылъя но литературая дышетӥсь Наталия Антонова, Шор Кушкет школаысь анай кылъя дышетӥсь Мария Николаева, Ципья школаысь удмурт но пор кылъёсъя дышетӥсьёс Ираида Чернова но Любовь Петрова. Шоръёзо школаосын артэ покчиёзо школаос но мыло-кыло пыриськизы та семинаре. Озьы Сырья покчиёзо школа-нылпи садлэн директорез Елена Гришкина, Вылын Ушма школа-нылпи садлэн директорез Эля Миронова, Ярак-Чурма школа-нылпи садлэн директорез Алевтина Ефремова но ёросамы одӥг гинэ луэм пор покчиёзо школалэн директорез Ольга Иванова но отысь пор кылъя дышетӥсь Татьяна Анеева но та пайдаё ужрадэ пыриськизы. 
Нош ужрад, зэмзэ но, туж пайдаё но тунсыко ортчем. «Удмурт но пор кылын огдыре ортчизы внеурочной ужъёс, нылпи садъёсын – мастер классъёс. Собере удмурт кылъя но литературая (озьы ик порезъя но) урокъёс но мастер-классъёс луизы, пумаз – котырес ӝӧк. Отын ми ужан программаосын герӟаськем но мукет шугъяськытӥсь юанъёсты сэрттӥмы-пертчимы», - шуиз Кукмор ёросэ ветлэмез сярысь вераса Покчи Лӧзя шоръёзо школаысь удмурт кылъя но литературая дышетӥсь Наталия Антонова. 
Котырес ӝӧклэн ужаз пыриськиллям ТР-ысь дышетонъя но наукая министрлэн нырысетӥ кивоштӥсез Ильсур Гараевич Хадиуллин, Удмурт Элькунысь «Дышетонэз азинтонъя институтысь» тьютор практикаосты азинтонъя центрлэн кивалтӥсез, кылосбур тодосъёсъя кандидат Андрей Александрович Клементьев, Татарстанысь удмуртъёслэн мерлыко огазеяськонзылэн тӧроез Андрей Сергеевич Герасимов, ТР-ысь Дышетонъя но наукая министерствоысь Йӧскалык дышетонъя управленилэн начальникез Лилия Марсовна Ахметзянова но мукетъёс. Та но семинарлэсь вылӥ уровеньын ортчемзэ юнматэ.