Хезмәт

Куноям бере мылкыдъёс 

Кызь одӥгетӥ тулыспалэ Сырья гурт клубын Кургем, Кускем, Дурга гуртъёсысь калыкъёсын бадӟым пумиськон ортчиз. 

Реклама

Пумиськон луиз кык люкетэн. Нырысетӥ люкетэз Анай кыллэн нуналэзлы сӥземын вал, кыкетӥ люкетаз вашкала удмурт сямъёсыз, йылолъёсыз вунэтонтэм понна шулдыръяськон ӝыт ортчытӥм. 
Нырысь кыл кутӥз Сырья гурт клублэн кивалтӥсез Леонид Дмитриевич. Со люкаськем калыклы вуттыны турттӥз: анай кылэз вунэтоно ӧвӧл, нылпиосыз но дышетоно. Нош собере Пётр Григорьевич Чернов аслэсьтыз малпанъёссэ-мылкыдъёссэ вераз. Удмуртлыкез азинтон бордын тыршыны мылкыд сӥзиз. Котькинлэн но дунне вылын улӥсьёслэн асьсэ кылзы вань: нымы-кибыослэн но, тылобурдоослэн но, пудо-животъёслэн но, адямиослэн но. Нырысетӥзэ вордскем нылпиезлы анай вазе аслаз кылыныз. Котькинлы но ас кылыз туж дуно но мусо. 
Кыӵе бен шулдыр луиз милям пумиськонмы! Ӧстӥ пырем бере ик паймимы сырьяослэн клубзылы: югыт, шуныт, чылкыт, шулдыр. Клубез но кузёез выллем серекъяса, пальпотыса улэ. Вань кадь гурт калыкенызы, шыкысысьтызы поттэм удмурт дӥсен дӥсяськыса, быдэс сукыриен туж шуныт пумитазы милемыз. Асьсэос туж чебер, мылкыдъёссы каньыл. Удмурт сиён-юонъёсын туж узыр ӝӧк дасяллям вал. Бадӟым самоваръёсысь ческыт чай юимы. Ӝытмы туж шулдыр луиз, дыр ортчемез но шӧдытэк ик кылимы: кырӟамы, эктӥмы, шудонъёс шудӥмы, ӝӧксьӧр кырӟанъёс кырӟамы. Камалиос жингыртӥзы ке жингыртӥзы, выжпулъёс кызьы-о меда чидазы?! Озьы ик бертон дырмы но вуиз. Ваньмы огазе пуксьыса туспуктэме усимы. Кубыз куараез кемалась кылэммы ӧй вал ини. Милемыз паймытӥз Николай Плотников, туж усто но быгатыса шудэ вылэм удмурт зоутъёсты. 
Ӟичы пась дӥсяй кынмонтэм, 
Дӧдьые пукси усёнтэм. 
Та сямен сием но юэм, 
Гумырлы ӵоже вунонтэм. 
Та кырӟан кылъёс туж кельшо милям ортчытэм ӝытмылы. Туж капчи мылкыдъёсын бертӥмы дорамы. Дас арлы улонмы пиналмиз кадь. Туж бадӟым тау кареммес вуттӥськом та ӝытэз вунэтонтэм карыса ортчытэм понна Леонид Дмитриевичлы но вань кадь Сырья калыклы, мызганчилы Чернов Семёнлы, кубызчилы Николай Плотниковлы, озьы ик Дурга клублэн кивалтӥсьёсызлы Николай но Фирдания Алексеевъёслы. Соос милемыз нокытысь уг кельто, концертъёсы ветлыто, та понна соослы пумтэм тау кариськом. Сӥзиськом ваньзылы азьпалан но выль азинсконъёс, капчи мылкыдъёс, юн тазалык но шудбур. Таӵе пумиськонъёс медаз кысэ, соку анай кылъёс но уз вунэ, йылолъёс, сямъёс азинтӥськозы. 
Тау шуиськом 
Сырья гуртэ лыктыса но 
Юлтошъёсын адскимы. 
Сиимы но, юимы но 
Бадӟым куно луимы. 

Егит дырмес малпаса, 
Кырӟамы но эктӥмы, 
Шудӥмы, серекъямы, 
Сюлэмез буйгатӥмы. 

Тау шуиськом, тау шуиськом, 
Тӥледлы тау кариськом, 
Вылисен-выль азинсконъёс 
Тӥледлы ми сӥзиськом. 

Тау шуиськом Лёнямылы, 
Тау кариськом Коляослы, 
Тау шуиськом Семилы, 
Вань люкаськем эшъёслы. 

Сӥзиськом ми юн тазалык, 
Шудбуръёс ми сӥзиськом, 
Кузь гумыр, каньыл пересьмон 
Ми тӥледлы кузьмаськом. 

Аръёс каньыл мед ортчозы, 
Шумпотонъёс мед луозы, 
Сюлмаськонъёс, куректонъёс 
Палэнтӥ мед ортчозы. 

Вордэм нылпиостылэсь 
Шудзэс-бурзэс тӥ адӟылэ. 
Тау карыса, шумпотыса 
Кема аръёс ӵоже тӥ улылэ. 

Ялан мед луоз та сямен, 
Туж капчи ай мылкыдды. 
Ялан мед луоз туж капчи 
Быдэстоно ужъёсты. 
(Полина Поликарпова) 

Сырья гуртэ ми мынӥм 
Сырья гуртэ ми лыктӥм, 
Туж адскеммы потыса. 
Эктомы но, кырӟалом но 
Тӥ азьын шумпотыса. 

Почамы милям усто 
Кылбур, кырӟан гожъяны. 
Тамарамы нош усто 
Дыбыртыса эктыны. 

Колямы кутӥз ке мызганзэ, 
Эктытэк уд чидалэ. 
Кырӟаз ке шулдыр гурзэ, 
Кырӟатэк уд чидалэ. 

Кырӟамы но, эктӥмы но, 
Бадӟым куно луимы. 
Тӥледыз но витиськом, 
Тау кареммес вуттӥськом. 
(Антонина Камаева) 

Р.S.: Учырен пайдаяськыса, районысь удмурт калыклы вазиськеммы потэ вал: ойдолэ, эшъёс, пичи ке но люкет пыртом Л.Д. Сапожниковлэсь книгазэ поттыны. 

Кургем, Кускем, Дурга гуртъёсысь куное ветлэмъёс.

Нравится
Поделиться:
Реклама
Комментарии (0)
Осталось символов: