Хезмәт

Кык «5» пуктыны луысал

Али ку гинэ со школае лыктэм вал. Вылаз - лобыса кошкыны дась бубылилэн кадь тӧдьы айшетэз, йырси пунэтъёсаз - тӧдьы бантикъёс, сюлэмаз - сайкыт малпанъёс...

Школаез йылпумъямез дырысен но ньыльдон ар ёрос дыр ортчем. Нош улон сюресэз сое школалэсь ӧз люкы. Со кемалась ини ачиз дышетӥсь. Дышетӥсь гинэ ӧвӧл, дышетӥсьёслэн дышетӥсьсы. Веранэ - Салаусьысь трос профильем лицейлэн директорез Закирова Люция Харисовна сярысь.
Аръёс ортчемлы быдэ кужмогес валаськод: школаез тодон-валанлэн очагез шуыса юнме гинэ уг верало вылэм ук. Адямилэн азьпаллы учконэз но, ужпум-малпанъёсыз но, улон сямыз но тӥни со очагын формироваться каре вылэм.
Аслэсьтыд уждэ яратыса быдэсъян, котькызьы секыт луиз ке но, со ачиз бадӟым шуд ук. Та ласянь со ассэ шудо адями шуыса лыдъя. Минутъёс, часъёс, нуналъёс, толэзьёс пӧртэм сюлэмшугъяськонъёсын, шумпотонъёсын туж ӝог ортчыса кошко. Тани нош ик дышетскисьёсын люкиськон дыр вуиз. Соос шоры учке но мӧзмыны кутске. Лобись тылобурдоосты лобӟытэм тылобурдо кадь шӧдэ со ассэ. Со дыре ик шумпотон, данъяськон мылкыдъёсыз но кылдо. Соос бадӟым улон сюресэ султо, шонер сюрестӥ кошкозы шуыса оскыса кыле.
Кема но дыр уз ортчы, выльысь школаен, дышетӥсьёсын пумиськон понна соос нош люкаськыса лыктозы. Нош со ялан но школаын: одӥг «пиоссэ» будэтыса келяз ке, кыкетӥ пичиоссэ пумита. Изьытэк ортчытэм уйёсын, сюлэмшугъяськонъёсын, шумпотонъёсын улон ас ӧрезъя мынэ.
Солэн дышетскисьёсыз пӧлын пӧртэм ӧнеренъёс вань. Соослэн котькудӥз улонын ас интызэ шедьтэм вылэм, озьыен, тыршемез юнме луымтэ. Дышетскисьёсызлэн азинсконъёссы - со трос аръем ужлэн емышъёсыз. Секыт, ответственной луэмезлы утьытэк, та ӧнерез быръемезлы чик но уг ӧкыны со.
Буйгатсконэз тодӥсьтэм, ноку бырисьтэм энергиен, требовать карись кивалтӥсь, инкуазен сётӥськем организовать карыны быгатонлыкен адями со Люция Харисовна. Дышетӥсьёслэн коллективенызы нырысетӥ ужан нуналысен ик дышетскисьёслэсь, ужаны лыктэм егит специалистъёслэсь быгатонлыксэс но сое азинтонэз, формировать каронэз, улонлы дасянэз аслыз ужпум карыса ужа. Солэн ужамезлэн бервылыз - туннэ нуналэ дышетскисьлы вылӥ но средней специальной тодон-валан сётон учреждениосын дышетскыны, вордскем гуртамы, странамылэн пӧртэм сэрегъёсаз гажамон адямиос луыса улыны юрттэ. Ачиз лек адскиз ке но, котькуд нылпилэн, котькуд специалистлэн творческой азинсконэзлы шумпотыны тодэ. Коллективен ӵош, ог-огзэс валаса, огкылысь луыса ужамен со кивалтэм лицей дышетсконын, ужын, спортын бадӟымесь азинсконъёсы вутскиз. Кык ар Россиын, одӥг ар Татарстанын «Арлэн школаез» нимен пусйиськиз, Каюм Насыри премилэн лауреатэз, «Татарстанын самой умой школа», тазалыкъя куинь пол Зарни уровенен школа но мукет проектъёслэн, конкурсъёслэн вормисьсы. Люция Харисовна ачиз но вылӥ категориен специалист, Татарстанысь сӥё-дано дышетӥсь. Солэн куамын арлэсь уно педагогической ужезлы, дышетӥсь роле пырыса, отметка пуктӥд ке, бадӟым карыса кык «5» пуктыны луысал. 55 аресъем юбилеезлы кузьым, ужезлы самой бадӟым дунъет но тӥни со, дыр.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: