Хезмәт

Леонид Асаков: «Гуртмы понна, умой улонмы понна тыршомы»

Городын дышетскыку, ӵемысь отчы дышетскыны яке ужаны лыктэм егитъёсын вераськыны, кусып возьыны тупалляз. Тупась учыр кылдыку юалляськи, маиз соослы гуртын уг кельшы но ма соосты городэ кыске шуыса.

Тросэз тазьы вералозы вал: «Гуртын бен мар каронэз? Кык сюрес вань — яке юиськод, яке гумыр ӵоже кӧня ке коньы уксё понна музъемын ужаса, кулытозяд пудо вордыса улӥськод. Шутэтскон нуналъёсты адӟытэк вань тазалыкед но лябӟоз, шӧдытэк но кылёд, кызьы улонэд но ортчоз».

Малпад ке, туала дыре егитъёслэн гуртэ кыльымтэзы туж бадӟым проблема луэ. Та сярысь трос верало кивалтӥсьёс но, вордскем палзылэн азьпал улонэз сярысь сюлмаськись огшоры гурт калык но. «Гуртын нокыӵе луонлыкъёс ӧвӧл, уж шедьтыны секыт», — шуиськом ми, егитъёс. Зэмзэ но, та кылъёсын зэмлыкез трос. Гуртын улӥсьёслэн лыдзы арысь аре кулэсме. Пересьёс тазьы вераны ярато: «Кыӵе шулдыр азьло улӥмы! Вазь ӵукна вырӟыса анай-атайёслы ужаны юрттылӥмы, ӝытсэ юлтошъёсын шудонъёсы но потамы. Нокыӵе жадёнэз но ӧм тодэ. Нош али...» Нош али мар воштӥськиз меда? Малы егитъёс гуртысь кошко? Секыт ужлэсь кышкало меда? Гумырзэс юыса ортчытэмзы потымтэысь шуид ке, бен городын, оло, кудӟытӥсь юонъёс уг вузасько? Гуртын но ведь котькин уг юы — котькуд адямилэн ассэ кутыны быгатэмез бордын ваньмыз.

Та сярысь трос малпаськемысь, малпай гожъяны асьме районысь гурт удысын тыршись егитъёс сярысь. Сыӵеос, шумпотымон, Балтась ёросамы ӧжыт ӧвӧл. Нош таиз гинэ мылкыдме сӧре — тросэз егитъёс асьсэос сярысь гожтыны уг косо, пумит луо ( удмуртъёслэн виразы пыӵам возьдаськон сям, дыр, ни та). Таяз статьяын тодмато тӥледыз Леонид Асаковен.

Леонид вордскем асьме районысь Починка гуртын. Покчи классъёссэ аслаз гуртаз дышетске, собере ӟаныысь школае выже. Школаын дышетскыкуз ик егит Лёня вуоно улонэз сярысь малпаськыса, аслыз ужпумъёс пуктыса улэм. 11-тӥ классэ йылпумъямез бере Пермьысь военной институтэ, кинология факультетэ туж пыремез потэм. «Мон пуныосты туж яратӥсько, соосын выреме потэ вал. Пуныослэн туж умой  сямзы вань — соос адями понна котьку оскымон эшъёс луо. Жаль, адямиослэн сыӵе сямзы ӧвӧл...», — шуэ Лёня. Но Перм институтэ пырыны кылдымтэ, соин Леонид КФУ-лэн Елабугаысь филиалаз психологияя но педагогикая факультетэ физической культура ӧръя дышетскыны пыре. Дышетскыкуз ассэ умой ласянь возьматэ Леонид. Боксэн но вырыны кутске — татын ик кутске солэн шулдыр улонэз — тренировкаос, соревнованиос... Куинетӥ арзэ боксэн вырыны кутскемез бере Леонидэз университетсылэн сборнояз но, городлэн сборнояз но басьто. Внутренней ужъёсъя министерствоос куспын Татарстан Республикалэн чемпионатаз но Леонид 2-тӥ инты басьтэм. Вормонъёсыз трос луэм солэн. Нош дышетскон аръёс ӝог ортчиллям, армие кошкон дыр но вуэм. Кылем арын, дышетсконзэ йылпумъямез бере ик, Леонидэз армие басьто. Забайкал палъёсын, Чита городын, арми улонэз кутске солэн. Нош вить толэзь ортчыса, дышетсконзэс йылпумъямзы бере, Бурятие келяло. Мотострелковой батальонын БМП-2-лэн  механик-водителез луыса военной службазэ азинтэ. Умой гинэ Атаймузъемез азьын валтӥсь ужпумзэ быдэстыса Леонид али куинь арня талэсь азьло гинэ вордскем гуртаз, анай-атай юртаз бертыса вуиз. Но та дыр куспын ини ужаны но кутскиз! «3-тӥ июле дорам бертыса вуи, 4 нуналскын ужаны кутски, — шуэ со ачиз. — Гуртын ужатэк нокызьы но уг луы».

Лёнялэн атаез «Бурнак» обществоын комбайнёр луыса ужа, нош пиез солэн юрттӥсез луыса интыяськем.

— Али дыре атаелы комбайнэн ужаны юрттӥсько. Татын азьланяз ужаны уг малпаськы ке но, аслэсьтым улонме гуртэн герӟаме потэ. Гуртэ улыны кыльыны малпасько мон. Татын улон понна ваньмыз вань, анай-атайлы но юрттэме потэ. Аслам гуртам асьме адямиосын ужасько бере, аспӧртэмлыко, эшлыко атмосфера кылдэ. Туала дыре тросэз егитъёс верало, гуртын номар но ӧвӧл шуыса. Кызьы ӧвӧл бен? Тани шашлык гинэ каремед потӥз ке но, ваньмыз гидад. Аслад, натуральной сӥльлэсь дасям шашлык. ӟучьёс верало ук: «Где родился, там и пригодился». Вот мынам но сыӵе луэме потэ, — вера Лёня.

Гурт улонлэсь чеберлыксэ адӟыны быгатӥсь но та улонэз яратӥсь Леонид уж дораз но, аслаз егит луэмез шоры учкытэк, ваньзэсын огъя кыл шедьтэм. «Милям коллективмы, компанимы туж умой, ог-огмылы ялан юрттыса гинэ ужаськомы. Мон соосты мӧйы уг кариськы, соос монэ егит уг каро. Туж тупаса ужаськомы», — шуэ егит пияш.

Лёня паймытӥз аслаз малпанъёсыныз, улон шоры учкеменыз, гуртын улон сярысь вераськеменыз.

— Валасько, егитъёслэн ас дыраз ваньзэ утемзы потэ. Но кудӟытӥсь юонъёсты эсэпсэ валаса гинэ юоно, дыр, кыскыны но кулэ ӧвӧл. Та интые анай-атайзылы юрттысалзы ке, трослы умойгес луысал. Нош егитъёслы, аслам огъёзоосылы ялан азе вамыштыны ӵектысал. Улон мынэ, асьмеос но одӥг интыямы сылытэк, азьпала вамышъяломы. Гуртмы понна, умой улонмы понна тыршомы, — пусъе Леонид.

Егит ке но, азьвыл улон сярысь трос малпаське Лёня. Солэн улоназ аслаз пуктэм ужпумъёсыз вань, кудъёссэ со, оскисько, одно ик быдэстоз.

Тросэз туала егитъёс понна Лёня пример луоз шуыса малпасько. Аресэз шоры учкытэк, гуртэ улыны кыльыны уг кышка — шумпотэ гинэ. Ачиз сярысь гинэ но уг сюлмаськы, анай-атаез сярысь малпаське. «Газетэз егитъёс уг ни лыдӟо, кытысен тодозы мар мон татчы гожтӥ» шуыса но малпасько ачим куддыръя. Зэмзэ но, егитъёс ӧжыт лыдӟо газетэз, но соос вань! Оло, песяй-бабайёссы, анай-атайёссы нылпиоссылы но внукъёссылы татысь лыдӟем чуръёсты вуттыны быгатозы? Талы но оскон вань.

 

 

            

 

 

 

Нравится
Поделиться:
Реклама
Комментарии (0)
Осталось символов: