Лэсьтэм ужмылэн емышъёсыз кылёзы (+фоторепортаж)
2022-тӥ ар сӥземын Россиын улӥсь калыкъёслэн лулчеберет мерассылы
Калык искусствоез вӧлмытон, традициосты возьман, котькуд калыклэсь аспӧртэмлыксэ утён валтӥсь ужпумъёс луо.
Асьме шаерамы уло 190-лэсь трос пӧртэм калыкъёс, котькудзылэн асьсэлэн кылзы, лулчеберетсы, сям-йылолъёссы. Пӧртэм выжы калыкъёслэн огкадь сюлмаськонъёссы — анай кылэз но культураез утён. Мед будозы туала нылпиос анай кылзэс тодыса но яратыса, мед тодозы соос асьсэ выжыоссылэсь сямъёссэс но шудонъёссэс, кырӟанъёссэс но эктонъёссэс.
Федерал кун дышетон стандарт но асьме кунын улӥсь калыкъёслэсь кылзэ, лулчеберетсэ утёнлы но азинтонлы саклык висъя. Таин валче нылпиослэн удмуртлыко будэмзы сярысь сюлмаськон нылпи садын но школаын азьпал радэ потэ.
Шор Кушкет шоръёзо школаын унозэ ужрадъёсмес удмурт кылэн, удмурт сям-йылолъёсын герӟаса радъяны тыршиськом, вожвылъяськонъёсы пыриськиськомы, усьтэмын «Даур куара» музей, нылпиос ветло «Инвожо» фольклор ансамбле. Матысь кусып тупатӥмы Шор Кушкет гуртысьтымы библиотекаен но клубен. Бадӟым юрттэт сёто анай-атайёсмы. Соос котьку но дась пыриськыны пӧртэм ужрадъёсы, кутскем ужмес азьланьтыны, ӟечезлы оскыны мылкыдмес ӝуто.
Тулыспалэ школаын классъёсмы сям-йылолъёслы сӥзем часъёс ортчытӥзы. Татын но анай-атайёсмы палэнэ ӧз кыле. 2-тӥ классын анайёс тодматӥзы удмурт калык сиён-юонъёсын, бадӟым ӝӧк дасязы. Ваньзы но чебер яркыт удмурт дӥсен дӥсяськыса лыктӥзы. Шоразы учкыса ик таӵе дыръя шумпотон мылкыд кылдэ. Асьсэос нылпиос но туж лӧптэмын вал.
«4-тӥ классын радъязы армие келян йылолэз. Лидия Аркадьевна валэктӥз, кызьы со луэм, кызьы лекрут ветлӥллям. Собере нылпиос сценка возьматӥзы, эктӥзы, кырӟазы, шулдыръяськизы. Кызьы нянь куртчыса, сое оброс азе поныса кельтӥллям — тае но веразы но возьматӥзы. Кызьы солдатэз келяса потто, озьы ик классысь «солдатмес» келяса поттӥмы. Шудыса гинэ ке но, анаезлэн мылкыдыз ик тыриз, синкылиосыз потӥзы», — тазьы пусйиз 4-тӥ классысь нылпилэн анаез Лилия Чирикова.
Сям-йылолъёсмес, культурамес, вордскем кылмес утён но азинтон понна песянайёсмы но сюлмасько. 5-тӥ классысь дышетскисьёс азьын соос возьматӥзы асьсэлэсь тодэм-быгатэмзэс. Нылпиос татын нырысьсэ киязы кутӥзы черс но асьсэос черсыса утизы, черсэм шортэз пӧлэстӥзы, собере керттӥськизы но пужыятскизы. Таин гинэ ӧз йылпумъяськы ужрад — нылпиос асьсэос но дышетӥзы песянайёссэс. Ӵошен соос туж чебер брошь пӧрмытӥзы. Озьыен, та кык пӧртэм поколение ог-огенызы быгатонлыкъёсынызы воштӥськыса, куспазы герӟетсэс эшшо но юнматӥзы.
Мыло-кыдо пыриськизы анай-атайёсмы южтолэзе школаямы ялэм «Культурное наследие России» проектэ. Котькуд класслы сётэмын вал нимаз тема. Тулыс каникул вакытэ анайёс нылпиосынызы ӵош ӟеч гинэ дасяськиллям, нош али вакытэ школаямы усьтэмын туж узыр но чебер выставка. Татысь адӟыны луоз удмурт, ӟуч, бигер но пор дӥсен мунёосты, парен-парен лэсьтэм матрёшкаосты, пӧртэм калыкъёслэсь ибырвесьёссэс (оберегъёссэс), дымковской шудонъёсты, гжель посудаез. Выставка ноку но буш уг сылы, котьку но учкисьёсыз луо: синмаськыса учко нылпиос но, дышетӥсьёс но, школаын ужасьёс но, анайёс но вуылӥзы. Одӥг пол учкемен гинэ уг тырмы, нош но нош синмаськыса сылӥськод та выставка дорын, сыӵе чебер со пӧрмемын. Азьланяз татысь арбериос уз пазяське, соос, экспонат луыса, классъёслэн кабинетъёсазы пичи музейёс кылдытозы, лыктэм куноос но адӟыны быгатозы.
Туж оскиськом, лэсьтэм ужмылэн емышъёсыз кылёзы шуыса. Оскиськом, нылпиосмы анай кылзэс яратыса, удмурт калыкмылэсь лулчеберетсэ, сям-йылолъёссэ гажаса будозы шуыса. Азьланяз таӵе мылкыд пыӵатозы ини асьсэлэн нылпиоссылы. Соос но уз вунэтэ асьме выжыосмес, лулчеберетмес.
Олеся Яковлева,
Шор Кушкет школаысь удмурт кылъя но литературая дышетӥсь
Фото: Олеся Яковлева
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев