Лулчеберет — пеймытысь поттӥсь сюрес

Лулчеберет — калык но адями понна мылкыд ӝутӥсь удыс. Кызьы Атыкай музъем кутске анай бордысен, озьы ик лулчеберет но кутске чеберлык бордысен. Туннэ нуналъёсы лулчеберет адями понна секыт мылкыдъёслэсь куштӥськон но капчи мылкыдъёсты будэтон амал луэ. Аспӧртэмлыко удысын ужасьёслэн пельпум вылазы бадӟым ужпум — калыклэсь мылкыдъёссэс ӝутон но лул кужым сётон. 

Лулчеберетэн асьмеос нуналлы быдэ пумиськиськом. Ӵукнаысен ӝытозь адями ивортодэт дуннеын берга. Пӧртэм мерлыко вотэсъёс но технологиос потэмен, адями пыраклы выйиз кадь мукет дуннее. Кытчы гинэ уд учкы, котыр адӟыны луэ искусстволэсь кужымзэ. 

Туннэ нуналэ лулчеберет ёзэтэ пыро клубъёс, лулчеберетъя юртъёс, лыдӟиськонниос, музейёс, искусствоосъя школаос, театръёс, циркъёс, пӧртэм литературной юртъёс, паркъёс, заповедникъёс, зоопаркъёс. Соос кылдыто адямилэсь лулпуш радлыксэ, дышето улонысь чеберзэ адӟыны, тодмато дуннелэн чебер палъёсыныз. Лулчеберет пыр адями дышетске сюлмаськыны, яратыны, синмаськыны но гажаны.

Чебересь кырӟанъёс кылзыса, адямилэн мылкыдъёсыз бугырско, со ас малпанъёсаз вые, улонзэ дунъя, умоезлы кыстӥське; книгаос лыдӟыса, адями малпанъёссэ шонер пуктыны дышетске, фильм учкыса — буёло суредъёсты «ас вылаз мерта», музейёсысь экспонатъёсты учкыса — вашкала улонэз туалаеныз ӵошатэ, пӧйшуръёсын тодматскыса — лулос дуннеен кусып возе. Котыр улонмы, тросэз вамышъёсмы котьма ке но лулчеберетэн герӟаськемын.

Асьме ёросамы лулчеберетлэн кужымез эшшо но золгес шӧдӥськыны кутскиз кадь. Шумпотымон, арысен аре ужрадъёс тросгес но тунсыкогес луо. Соослэн радъяськемзы но паймытэ: рос-прос, малпаськытӥсь. Отчы кыстӥсько пиналэз но, мӧйыез но. Арлыдоос ӝытъёссэс яркытгес карыны кружокъёсы ветло, кырӟало, экто, керттӥсько, выль ӧнерлы дышетско. Со понна выльдӥсько клубъёс но лулчеберетъя юртъёс, лэсьтӥсько пӧртэм центръёс, тематической клубъёс, ӧнеръёслы сӥзем паркъёс, шутэтскон интыос — ваньмыз со лулчеберет ёзэтлэн ужамез.

Тужгес но та удысын яркыт адӟисько егитъёс. Соослэн ӝуась синъёссы но пӧсь сюлэмъёссы адямиослы аспӧртэмлыко кужым сёто но азьланезлы оскон кылдыто. Сцена вылысь каньыл мылкыдэн но капчи выросъёсын эктӥсь-кырӟасьёсты адӟыса, сюлэм ик шурдэ. 

Сцена вылын сюлэмзэс сётыса тыршись артистъёс куддыр асьсэлэсь ӝожъёссэс, куректонъёссэс но уг шараяло. Бадӟымесь ыштонъёссэс но сцена вылысен уг возьмато, нош кыӵе ке висёнъёс сярысь веранэз ик ӧвӧл. Соослэн ужзы — адямилэсь секыт малпанъёссэ но куректонъёссэ пазяны.

Туала вакытлы лулчеберетлэн интыез азьпал радэ потыны кутскиз. Нимысьтыз ожгар операци кутскемен, гурт клубъёс но лыдӟиськонниос аспӧртэмлыко огазеясь инты луизы. Татын адямиос асьсэлэсь ӝож мылкыдъёссэс буйгатыны, либатыны быгато. 

Пичи гуртъёсын но лулчеберетлэн кужымез зол шӧдӥське. Арысен аре огшоры адямиос сцена вылэ кышкатэк пото, быгатонлыкъёссэс шараяло. Котькуд нунал адямилэн дӥсьтонэз юнма гинэ. Сыӵе сям улонын но адямиез кыдатэ. 

Нимысьтыз тодмостыны кулэ на туала лулчеберетъя юртысь ужасьёсты. Сяме пыремын ни, котькуд бадӟым праздникъёсы соос чебер пуштросо инсценировкаос, концертъёс пукто. Соос пачылмемын пӧртэм кырӟанъёсын, эктонъёсын, серемес сценкаосын. Кемалась ӧвӧл, Нылкышноослэн калыккуспо нуналзылы сӥзьыса, Балтась лулчеберетъя юртысь пиослэн командазы туж паймымон концерт радъяз. Сценарий бигер кылын дасямын ке но вал, кылэз валасьтэм адями понна но ваньмыз валамон луиз, дыр. Малы ке шуоно сцена вылын мынӥсь действиос туж яркыт возьматскизы. Таӵе концертъёс калык понна ӧжыт дырлы ке но секыт малпанъёслэсь, куректонъёслэсь куштӥськыны луонлык сёто. 

Артистъёсмы — универсальной адямиос, кудъёсыз кырӟаны но, эктыны но, серемес образ но, тупась сценарий но кылдытыны быгато. Учкисьёслы капчи лэсьтэм уж потэ ке, артистъёс понна со бадӟым кылкутонэз кулэ карись уж. Ваньзэ дышетыны, серемес шудыны, кулэ интыяз астэ шузиен возьматыны талант но дӥсьтонлык кулэ.

Йӧскалыккуспо лулчеберет сярысь верано ке, татын но воштӥськонъёс палэнэ уг кылё. Пичи вамышъёсын ке но, ӧжыт калыкъем йӧскалык лулчеберет ассэ улӟытэ, калык син азе потыны кутске. Ёросмес бигер калыкен гинэ уг тодмало ни, пӧртэм калыкъёслэн вормонъёсынызы но пусъё. Кылем арын элькунамы йӧскалык лулчеберетлы но сям-йылолъёслы сӥзем ар луыса, трос калыкъёс асьсэлэсь лулчеберетсэс, вашкала йылолъёссэс золгес шараяны кутскизы. Со пӧртэм удысъёсын но адӟиськиз. Ужрадъёс покчиосты но палэнэ ӧз кельтэ, соин пичи дырысен ик виразы анай кыл но лулчеберет пыӵаса будӥсь нылпиос золгес кыстӥсько йӧскалык сям-йылолъёслы. 

«Сабантуй», «Гырон Быдтон» («Гербер»), «Питрау», «Семык» выллем валтӥсь йӧскалык праздникъёсты калык нимаз ик гажа, шумпотыса возьма. Огъя вераса, вань калык праздникъёслэн ас чеберлыксы, аспӧртэмлыксы, котькудӥз соос яркыт буёлъёсын тырмытэмын. Соослэн аспӧртэмлыко луэмзы калыкез синмаськытэ но паймытэ. Шумпотыса вераны луэ, бигер яке ӟуч, удмурт яке пор, калык праздникъёсты уг люкы, котькудаз мылкыд карыса лыктэ, йӧскалык эктонъёсты но кырӟанъёсты быдэстэ. Бигерез йыбыртъяса ик удмурт эктонэз эктэ, ӟучез синмаськыса пор эктонлы дышетске, кырӟанъёсты кылысь кылэ берыкто но котыр вӧлмыто — ваньмыз та йӧскалыккуспо лулчеберетэз вӧлмытон ужын тыршисьёслэн емышъёссы.

Лыдӟиськонниос сярысь верано ке, татын югдур кӧня ке мукетгес. Книга — вашкала дырысен ивортодэтлэн туж дуно луись инъетэз. Азьло дыре книгаез зарниез кадь утиллям. Туннэ нуналэ книгаос, газетъёс, журналъёс — вуныны кутскем инъетъёс. Улонысь ивортодэт туж ӝог воштӥське, печатлам изданиосын статьяос беромыса ке пото, соос асдыръем тодметсэс ышто, адямиос лыдӟемысь но куштӥсько. Тросэзлы видео яке телевизор пыр сётӥськись репортажъёс матынгес луо. Но сыӵе ӝог потӥсь материалъёсын зэмлыкез но шонерез трос луэ меда? Нош статьяосын ваньзэ эскерыса, вань фактъёсты чакласа поттӥськод. 

Книгаос но адями понна шутэтскон вакыт кылдыто. Лумбыт компьютерен, телефонэн ужаса, адямилэн синъёсыз лябӟо, сюрлыез (позвоночникез) кырыжме. Книга юрттэ со секытлэсь ӧжытак куштӥськыны, ӝож иворъёслэсь палдурскыны. Книга пыр адями йырзэ но ужатэ, фантазизэ но сайкатэ. 

Музейёслэн но ужзы кылкутымон но тунсыко. Пинал поколениез вашкала улонэн тодматон пӧртэм инъетъёсысь ивор утчан — секыт уж. Музейысь экспонатъёс пыр адямиос пӧртэм дауръёсын тодматско. Соосты шонер но тунсыко возьматон — музей ужасьёслэн валтӥсь ужзы. Ёросамы но музейёс асьсэлэсь ужзэс валаса но тыршыса нуо. Тросэзлы тодмо Ципья гуртысь «Калыкъёслэн эшъяськонзы» шаертодонъя музейысь ёрослэсь историзэ, калыкъёслэсь аспӧртэмлыкъёссэ тодыны луэ. Куноос но шумпотыса, тунсыкъяськыса музее сюрес куто, тау каремзэс верало.

Лулчеберетлэн котькуд удысэз аспӧртэмлыко. Сое пирамида выллем лэсьтыны луэ. Малпасько, тросэзлы тодмо Маслоу профессоръя кылдытэм кулэяськонъя пирамидалы тупась луэ. Озьы ик улӥяз интыяське самой адскисез, со — сцена, праздник, шулдыръяськон, ужрад, шораз лулчеберетэз юнматӥсь тодметъёс — библиотекаос, музейёс, театръёс, литературной юртъёс, паркъёс. Нош самой вылӥяз интыяське адямилэн лулэз, пуш дуннеез, сямъёсыз но выросъёсыз — лулчеберетлэн самой вылӥ тодметэз луо. 

Туала шимес учыръёсын тырмем дунне шоры учкыса, валатэк ик кылиськод, кызьы лулчеберет кужым сётэ. Кырӟанъёс, видеоос пыр асьмеос кӧтӝожъёсмес быдтӥськом но калыклы, ог-огмылы матынгес луиськом. Калык пӧлын туж ӵем кылӥськись веран вань: «Таӵе секыт дыре эктон-кырӟанъёс кулэ ӧвӧл, дыр, ини. Адями отын улонзэ сётэ, кулэ, нош татын шулдыръясько». Зэм, таӵе малпан огшоры адямилэн йыраз мур пуксемын. Но мукет ласянь учкид ке, адями копак мур сьӧсь но пеймыт малпанъёсаз выйыса, азьлань вамыштыны кужым шедьтыны быгатэ-а? Уг, дыр. Туала адямиез шимес иворъёсын кышкатыны уг лу ни — со вирозяз кыдамын. 

Котькуд лулчеберет удысын ужасьлы нимысьтыз таукарон кылъёсме вуттэме потэ. Ужды зэмзэ ик секыт, дыраз дунъямтэ, но тӥляд сюлмысь ужамды вань калыклы шугъяськонъёссэ огдырлы ке но вунэтыны юрттэ. 
Ваньдылы сӥзиськом азинсконъёс но быронтэм творческой мылкыд. Тӥляд кияды калыклэн пуш дуннеез. Эн лябӟе, вамыштэ азьлань, улонды котьку ужды кадь сяськаяськись мед луоз!

Туспуктэм Ципьяысь "Калыкъёслэн эшъяськонзы" музейлэн архивысьтыз