Мария Коновалова: «Азьло Янгурчилэсь мӧзмисько»

Жаляса верано, та туж шулдыр но синмаськымон чебер интыын кылдэм удмурт гуртын туннэ нуналэ кӧня ке юрт гинэ кылемын. Буш, куашкам юртъёс вужмыса сыло. Но татын улӥсь калык ас гуртсэ сыӵеен но яратэ. Татысь инкуазь номаин воштонтэм потэ соослы. 

...Мария Николаевна мур лулӟиз но веранзэ кутскиз. Шӧдске: та гуртын гумырыз ӵоже улэм нылкышнолэн Янгурчи понна сюлэмез туж висе. Бадӟым, гурласа улӥсь гуртлэсь туннэ нуналэ кӧня ке юртэз гинэ кылем.     

Мария Коновалова война йылпумъяськытозь кӧня ке толэзь кылён азьын Янгурчиын вордскем — январе 1945-тӥ арын. «Мон вордскон нуналэ асьме солдатъёс Гитлерез быдтӥськом шуыса кошкиллям. Быдтӥллям, Инмарлы тау», — шуэ со.

Соку, война но война бере аръёсы, Янгурчиын юртъёс но трос луиллям, улӥсьёсыз но, «Выль улон», «Самолёт» колхозъёссы но луиллям (1950-тӥ арысен кутскыса «Труд» колхозлэн составаз). Луэм гуртазы покчиёзо школа но (1920-1964-тӥ аръёсы), нылпиослы ясли но (1931-1942-тӥ аръёс). Библиотека, клуб но луэм Янгурчиын. Но улон, валамон, капчи луымтэ. Ёрмыса, сютэм улэм гурт калык. 

Семьяязы Мария бадӟымез нылпи луэ, солэн покчи выныз луэм на. Пиналъёс анаенызы будо, атайзы семьяысьтызы кошкем. Мария Николаевналэн анаез ужам «Самолёт» колхозын. Кык нылпиоссэ огназ будэтыны нылкышнолы секыт луэм. Трос тэльмыронъёс адӟем соослэн семьязы. 

— Секыт аре, секыт дыръёсы вордски. Война йылпумъяськыку но, собере но анаен, вынэн улӥмы. Сиён ӧвӧл, дӥськут ӧвӧл, юртмы сисьмыса быдмем, пу гинэ но ӧй вал... Адӟиськиз ни ас дыраз... Яра али нюлэс вань вал. Нюлэс быдмиз ке, улон быдме шуо. Туж зэм кылъёс та. Со милемыз сюдӥз но утиз шуыны луэ. Малпаса уте ай: кезьыт, кӧт сюма, нош ми пичиесь, кӧтмы сюмамысь бӧрдӥськом. Одӥг учырез гинэ тодам ваё. Война бере кезьыт коркан улӥмы. Кынмыса изьыны но уг луы вал. Соку мыным юрттэт карыса пальто лэзизы. Но сокем со пальто секыт вал, кузь. Огъя вераса, мон сое дӥсяны но, нуллыны но ӧй быгаты. Но со пальто али но син азям. Туала егитъёслы таӵе суредэз син азязы пуктыны но секыт. Но кызьы луиз ке но, ӝожтӥськыны малпанэ ӧвӧл. Ваньмыз понна Инмарлы тау шуисько, — маде Мария Николаевна.

Мария апайлы удалтэ ас дыраз школаын дышетскыса 7 классэз йылпумъяны. 1-2 классъёсты Ципья школаын дышетскем, 3-4 классъёсты — Янгурчиын, нош 5-7 классъёсты нош ик Ципья школае дышетскыны выжем. 7-тӥ классэ йылпумъямез бере, быдэ вуымтэ ныл колхозын ужаны кутске. Кытчы пыроз? Дышетскыны мыныны уксёез ӧвӧл, дӥськутэз гинэ но луымтэ. Нырысь егит ныл Ципья фермаын парсьёсты сюдэ. Собере кошке Саба ёросысь Иштуган гуртысь леспромхозэ (отын пӧртэм ужъёсты быдэсъясь луыса ужа). Иштуганын Мариялэн ӵужапаез улэм, со ик нылэз утем. Кык ар татын тыршемез бере, Мария Николаевна вордскем гуртаз, Янгурчие, бертэ. Сюлмыз сое вордӥськем интыяз кыске. Соку гуртын адями улэ ке но вал али, тросэз мукет гуртъёсы ужаны ветлыны кутскиллям. Собере воксё мукет интые улыны выжиллям — кин кытчы быгатэм, умойгес улон утчаса. Туннэ нуналэ янгурчиос вань Сарапулын, Нижний Тагилын, Марий Эл республикаын. Нош Мария Николаевналэн вордскем гуртысьтыз соку но нокытчы кошкемез потымтэ ни. Соин со ужаны интыяське Ципьяысь кутам арбериосты лэсьтонъя фабрикае. Дышетскыны солэн кужымез но, луонлыкъёсыз но уг луо ни. Пенсие потытозяз та фабрикаын тырше. Ассэ быгатӥсь, чырткем, ужлэсь кышкасьтэм ужасен возьматэ со. Со понна ик валче ужасьёсыз сое гажаллям. 55 аресэн Мария Николаевна дано шутэтсконэ потэ. Туннэ нуналэ со вордскем гуртаз, инмарлы тау карыса, улэ. Жаляса верано, Мария апайлэн кузпалыз, Назир, дырызлэсь вазь кулэм. «Айбат гинэ улыку, та улонысь кошкиз», — шуэ нылкышно. Но Мария Николаевна огназ ӧвӧл. Нылъёсыз семьяос кылдытыса нимаз уло. Жанна нылыз — Сизнерын, Римма — Улисьялын. Нош Мария апай Ксюша но Ярослав внукъёсыныз ӵош.

— Пенсие потӥ ке но, шутэтсконэз уг тодӥськы. Улон азьпала мынэ ук, — серекъя Мария Николаевна. — Ужтэк пукыны дыр ӧвӧл. Тани мон, кылсярысь, керттӥськыны туж яратӥсько. Пудое но вань али мынам. Сотэк уг луы. Скалэ, кунянэ вань. Соин нуназезэ но, ӝытсэ но уж сюре. Уж луымтэ дыръя нюлэскы ветлыны яратӥсько. Макем чебер Янгурчиын нюлэсъёс... Калык городэ кошке, гуртэ уг берты. Троссэ ышто сыӵе адямиос. Кыӵе чеберез палэнтӥ ортчо, — жаляса вера Мария Николаевна.

Янгурчи сярысь вераны кутскемезлы быдэ Мария апайлэн куараез куалекъя вал кадь. Аслаз тэльмырыса но курадӟыса улон дыръёсыз сярысь мадьыкуз но сокем ӧз ӝожомы, лэся. «Азьло Янгурчилэсь мӧзмисько... Зэм, татын сыӵе ик чебер инкуазь — писпуос, ческыт зыно сяськаос, турын, тылобурдоос чирдо. Нош юртъёс шоры учкид ке — сюлэм вӧсь луэ. Шулдыр гуртэлэсь, гурласа улӥсь Янгурчилэсь мӧзмисько», — лулӟе Мария Николаевна. Но отын ик пальпотыса ватса: «Луэмезлы тау. Мон ваньмызлы соглаш. Улыны коркае вань, сиыны сиёнэ вань. Инмар тазалыксэ гинэ мед сётоз».