Ми сое ноку ум вунэтэ

1944-тӥ арын 27-тӥ октябре тифен висьыса кулэм. Бабае сярысь таӵе даннойёсты милемлы Татарстанысь Быдӟым Отечественной ожлэн мемориальной музеяз (кивалтӥсез М.В. Черепанов) ужасьёс сётӥзы. Со понна соослы бадӟым тау.

Алигес гинэ мынам анае атаезлэсь фронтысен вуэм кык гожтэтсэ возьматӥз. Нырысетӥез гожтэт лэземын 1941-тӥ арын 19-тӥ декабре. Та пичи гинэ гожтэтын туж умой адске бабаелэн улонэз яратэмез, мӧзмемез, гуртысь выль иворъёсты тодыны потэмез. Гожтэт бордысь кыӵе ке но шунытлык, югытлык лыктыса улэ. Тани та гожтэтлэн пуштросэз:

Ваньдэсыз но туж адӟеме потыса унолэсь но уно салам верасько. Оксиня (кышноез), тынэсьтыд гожтэтдэ 19-тӥ декабре басьтӥ, 1-тӥ январе оже кошкиськом. Бертон йӧтоз-а, уз-а уг тодӥськы. Пока гожтэт эн гожты. Мыным туж секыт, но улэп. Мынэсьтым фронтэ кошкемме агайёслы (3 агаез фронтын луо) иворты. Тонялэсь (нылыз) туж мӧзмисько, адӟем потэ, солы салам верасько. Озьы ик бадӟым салам Нюралы (апаез). Атаелэсь верамъёссэ ялан тодын возисько. Атае 5 ар служить кариз, нош мон 5 толэзь гинэ служить кари али. Сюрес вылысен гожтэт лэзисько.

Ӟеч нунал!

Вань кадь ӵыжы-выжыос, кудъёссэс мынам туж адӟеме потэ. Ваньдылы салам верасько. Мон сӧл-таза. Оксинялэсь кыкетӥ гожтэтсэ басьтӥ, туж шумпотӥ. Агайёслэсь улэп луэмзэс тодӥ. Мыным бертыны кылдоз-а, уз-а нокин но уг тоды.

Мон сӧсырми, бурмисько ини, каллен пыд йылам ветлӥсько. Ӝоггес мед вуысал сыӵе нунал, ку мон сӧл-таза бертысал доре.

Анай но Атай, мон туж жалясько тӥляд пересьмон нуналъёсады ӵош улыны ӧз кылды, шуыса. Кенаклы - Вера Афанасьевалы - сюлмысен йыбыртӥсько. Пока. Ӟеч луэ.

Та гожтэтъёс гожтэмын туж чебер почеркен. Бабае жугиськон кутскытозь дышетӥсь луыса ужам, соин, дыр, чебер гожъяськем, вылӥ культураё адями луэм. Гожтэтъёсаз «Анай», «Атай» шуэм кылъёссэ бадӟым букваен гожъям. Кыӵе жаль, улонэз, семьязэ яратӥсь, анай-атайзэ мур гажась адямилэн гумырыз куспетӥ луэ. Кулыкуз солы 35 арес гинэ луэм. Бабае аслэсьтыз нылзэ но адӟыны быгатымтэ. Ми сое ноку но ум вунэтэ.