Милям дано ӵыжы-выжымы

Обложка вылаз - авторлэн портретэз. Со мыным туж тодмо потӥз. Сыӵе ик ымныр тусыз мынам анаелэн ӵужмуртэзлэн, Кузьма Семёновичлэн, но мынам ӵужанаелэн, Мария Семёновналэн. Юалляськыса, мон тодӥ: Григорий Сергеевич Медведев - мынам ӵужанаелэн ӵужмуртэз вылэм.

Екатерина Прокопьевнаен Сергей Федотович Медведевъёс улӥллям асьме Балтась ёросысь Малые Лызи гуртын. Соослэн луэм бадӟым семьязы, нылпиоссы: Мария, Анастасия, Агафья, Александр, Елизавета, Григорий но Наталья.

Наталья Сергеевна ас улонзэ герӟа Балтась ёросысь Пор.Кутеш гуртысь Самсонов Семёнэн. Соос будэто Кузьма пи но Мария ныл, кудӥз луэ мынам ӵужанае.

Григорий Сергеевич луэм тодмо удмурт писатель. Со вордскем палъёссэ, аспал калыксэ данъям веросъёсаз но романъёсаз. Ӵыжы-выжыосыз но солэсь адӟем кариллям, тодон-валан басьтон удысэз бырйиллям. Ӵужанае библиотекаын тыршиз, ӵужатае Иван Дмитриевич Гришкин Ӟаны школаын историен дышетӥсь, директор вал. Адямиос соосты али но шуныт кылъёсын тодазы ваё. Мынам анае Нелли Ивановна Понуркина Ципья школаын дышетэ. Мон дано писательлэсь выжызэ азьланьтӥсько. Ӵыжы-выжыослэсь юалляськыса, мон Медведевъёслэсь генеалогической писпузэс кылдытӥ.

Ципья черкогуртысь «Дружба народов» музейын Григорий Сергеевич но солэн ӵыжы-выжыосыз сярысь трос материалъёс но туспуктэмъёс возьматӥсько. Соос пӧлын тунсыко туспуктэм вань, отын писательлэн апаез Наталья Сергеевна нылыныз, мынам ӵужанаеным Мария Семёновнаен.