Милям туннэ праздник

Евдокия Ивановналы 90 арес тырмиз. Одӥг даурлы матын улон сюрес ортчем ке но, солы 70 ареслэсь трос уд сёты. Вордскем нуналэныз, бадӟым юбилееныз ӟечкыланы лыктэм куноосты но ачиз, матысь ӵыжы-выжыоссэ сямен, туж шуныт пумитаз.

Юбилярез ӟечкыланы вуылӥзы Балтась муниципальной районлэн главаез Рамиль Нутфуллин, районысь социальной дурбасьтонъя отделлэн кивалтӥсез Алсу Гатиятуллина, социальной юрттэт сётонъя отделенилэн заведующиез Аниса Хайруллина, Покчи Лӧзя гурт поселенилэн главаез Сергей Мухин, «Сурнай» обществоысь валтӥсь экономист Анас Калимуллин. Соос Евдокия апайлы асьсэлэсь шуныт кылъёссэс, сӥзёнъёссэс веразы, Россилэн Президентэзлэсь В.В. Путинлэсь Ӟечкылан открытказэ сётӥзы но кузьымъёсын, саламъёсын пусйизы.
Юбилейзэ капчи мылкыдын, пальпотыса, корказэ шаръёсын, гожтэм ӟечкыланъёсын чеберъяса пумитась ветеранэз нырысетӥзэ адӟимы. Малпалод, та юртын пичи пиналлэсь яке егит муртлэсь вордӥськем нуналзэ пусъё.

- Праздник ук милям туннэ! - шуизы юбилярлэн нылъёсыз.

Евдокия Ивановна кузпалзэ, Быдӟым ожысь ветеранэз Иван Егоровез сӥлы карыса лэсьтэм юртын Михаил пиеныз гинэ улэ вылэм.

- Вылын Ушма гуртын вордски, быдэ вуи. Семьяямы 4 нылпи вал ми. 7 классэз йылпумъяме бере колхозын ужаны кутски. Собере гуртысь кӧня ке муртэ Кушкетбаше ужаны лэзизы. Со аре жугиськон кутскиз, милемыз берен гуртэ бертытӥзы. Жугиськон дыръя кытын кыӵе секыт уж вань - ваньзэ но ужаны тупаз. Арча районысь Сиза гуртын но улыса ужамы. Ож лудын бадӟым агае быриз... Со секыт дыръёсты тодэ ваеме но уг поты... Куанер, сютэм улон, кышкыт аръёс вал со. Со шимес аръёсты чидаса та быдӟа аресозь вуэмелы уг но оскиськы кадь. Анае 96 аресозь улӥз. Тани мыным но 90 арес тырмиз ини... Нылпиосы шуо: «Ӵужанайлэн арлыдэз дорозь вуытозяд 6 ар вань на, 100 арестэ но тырмытод али», - шуэ юбилярмы, ас малпанъёсаз ортчем улон сюресаз берытскыса.

- 1946 арын гуртоеным, Быдӟым ожысь ветеранэн Иван Егоровен семья кылдытӥмы, 7 нылпи будэтӥмы, 55 арлэсь кема валче улӥмы. Жаляса верано, бабае 2002 арын кулӥз. Нылпиосмылэн куатез сӧл-таза, одӥг пимы кулӥз ини, - кӧт ӝожзэ усьтыса веранзэ азинтэ Евдокия Ивановна.

Шугадӟонъёсты чиданы-вормыны солы нылъёсыз, пиосыз юртто, пыкет луо.
- Нунал потэм улэм-вылэменым тунсыкъяськыса, тазалыке сярысь сюлмаськыса уло. Туннэ тани ӵукна ик Германиысен ӟечкыланъёс, шуныт кылъёс вуизы. Нылызлэн пиез Германиын улэ. Туж умой уло. «Песяй, вордӥськем нуналэныд тонэ!» шуыса жингыртӥз. Кызьы талы шум уд поты! 13 внуке, 8 правнуке вань. Котькудӥзлэн улон-вылонэныз тунсыкъяськыса, юалляськыса улӥсько. Соос понна туж шумпотӥсько, умой мед улозы шуыса, котькуд нунал Инмарлы вазиськисько, - шуэ песянай.

Евдокия Ивановна бигер сямен но туж чебер вераське.
- Егит дыръям Карадуванын бигер кышномуртъёсын ужай. Одӥг кыл но бигер сямен уг тодӥськы вал, соос дышетӥзы. Али но телевизорез лэзьыса бигер кылын нуиськись каналъёсты учкисько.

Яратыса учкисько, кырӟанъёсты кылзӥсько, - шуэ гажамон ветеран.
Ужан сюресэз сярысь ке верано, картлы бызьыса нылпиосты будэтыны кутскемез бере, Евдокия Ивановна Ленин колхозэ ужаны интыяськем. Нырысь бригадаын пӧртэм ужъёсты быдэсъям, собере фермаын пудоосты утем. Отысен ик дано шутэтсконэ потэм.

Туж умой, капчи мылкыдъёс кельтӥз та пумиськон гажано куноослэн сюлмъёсазы. Евдокия Ивановналэн шулдыр мылкыдыз, капчи вераськемез но сайкыт йырвизез синмаськымон.

Ясмина ШАМСЕТДИНОВА