«Мон котьку зэмлык понна вал»

Арлы быдэ 6 оштолэзе асьме кунамы следственной ёзэтъёсын ужасьёс асьсэлэсь удыс праздниксэс пусъё. Туэ со ӟучарня нуналлы тупа. Но быгатозы меда та кылкутӥсь службаын тыршисьёс тырмыт шутэтскыны? Шуген валэктон сётыны луоз, дыр, та юанлы. 

СССР-ысь Вылӥ Кенешлэн Президиумезлэн Указэзъя, 1963 арлэн 6 оштолэзез следственной аппаратысь ёзэтъёслэн ужаны кутскем нуналэныз лыдъяське но нимысьтыз ӧнер праздник луыса пусйиське. Пӧртэм воштӥськонъёс, выльдӥськонъёс пыр ортчыса, туннэ нуналэ та пушсӧзнэтлэн киулаз 93%-лэсь трос ужъёс эскерисько.

Катъёсты тодӥсь адями улонын ассэ вуын уясь чорыген шӧдыны быгатэ. Ведь пӧртэм удысын катъёсты валан — туж кулэ луись тодон. Ивортодэтъя (информационной) технологиос ӝог азинскемен, катъёсты тӥян эшшо но золгес вӧлмыны кутскиз. Азьло дыре йыртэман ужъёсты калык пӧлын ик шараяны луэ ке вал, туннэ нуналэ пӧечиос эшшо но кыдёке вамыштӥзы ни. Йыружъёсты эскерисьёслэн ӝӧк вылазы тросэз IT-йыружъёсын герӟаськем ужъёс. Со сяна, та сӧзнэтысь ӧнерчиос вылын алон ужрадъёс но вань на.

Асьме ёросамы но полицилэн сӧзнэтаз йыртэманъёсты эскеронъя ёзэт ужа. Туннэ тӥледыз тодматӥськом соос пӧлысь одӥг гинэ нылкышно-йыруж эскерисен Екатерина Леонидовна Петроваен. 

Вордӥськиз со Кисаль (Сала-Кушкет) гуртын, дышетскиз но йылпумъяз Шор Кушкет шоръёзо школаез. Туннэ нуналэ ас семьяеныз улэ Балтась каргуртын.

— Вань нылъёс пичи дырысенызы тынӥсь, гань-гань уж сярысь малпало. Малы тон юриспруденция удысэз быръёно карид, вылаз ик сыӵе чурыт удысэз — йыружъёсты эскеронэз?

— Мон пичи дырысеным ик зэмлык, шонерлык понна сылӥсько вал ини. Соин ик монэ юриспруденцие кыскиз, дыр. Йыруж эскерисьлэн валтӥсь ужез — со йыртэмасьёсты кылкутонэ кыскон, озьы котькуд интыын кышкыттэмлык но правопорядок кутӥське. Та интыужын службаме 2021 арысен нуисько. Туннэ нуналэ уже сюлэмея, воштӥськонъёс сярысь уг малпаськиськы.

— Маин йыруж эскерисьёс полициын ужасьёслэсь висъясько? Соосыз но, таосыз но йыртэмасьёсын нюръяськем сяна.

— Йыруж эскерисьёс но полициын ужасьёс пӧртэм ужъёсын выро, пӧртэм сӧзнэтъёсын ужало. Йыруж эскерисьёс йыртэманъёсты сэртто-пертчо, нош полициын ужасьёс оперативно-розыскной ужъёсты быдэсто. Огъя вераса, соос йыртэманъёсты эскерыны юртто. 

— Кыӵе валтӥсь сямъёсыз луыны кулэ йыруж эскерисьлэн?

— Мон малпасько, ны-рысетӥез ик со — стрессъёслы сётскисьтэм но юн сямо луон, мукет сямен вераса, сазь йыро луыны кулэ. Йыруж эскерисьлэн ужез пӧртэм пумо стрессъёсын герӟаське, соин ик милемлы зӥбыт луоно, секыт югдуръёсы но шонер пумкылъян (решение) лэсьтоно.

Кыкетӥез со — сэрттон-пертчон (аналитической) малпан. Йыртэман ужез син азе шонер пуктон понна, йыруж эскерисьлы пӧртэм нимаз-нимаз сылӥсь мугъёслы но уликаослы анализ лэсьтыны быгатоно. 

Куинетӥез — кылкутон но чыры-пырыослы саклык висъян. Котькуд янгыш — со адямилэн данэз, куддыръя эрикез но. Со туж дуно сылыны быгатэ. Кылсярысь, кыӵе ке адӟытэк кельтэм люкет, яке шонертэм гожтэм документ ужез доработкае лэзьыны быгатэ, яке воксё борӟаны но быгато.

— Асьме ёросамы тросэз ог-огзэс тодыса уло. Секыт-а эскерыны сыӵе ужъёсты, кудъёсаз тодмоосыд пумисько?

— Котькуд адями понна кат (закон) одӥг луэ. Ӵыжы-выжы-а, матысь адямиед-а, тодмоед-а, татын пӧртэмез ӧвӧл. Йыртэмад ке, кыл кутоно луод. Балтась ёросысь Кунпуш ужъёсъя министерстволэн ёзэтэзлэн следственной сӧзнэтаз ми куинь кузя: кык йыруж эскерись но кивалтӥсьмы. Ужъёсты кивалтӥсьмы люкылэ, соин пӧртэмлыкез ӧвӧл. Вань адями кат азьын огкадь.

— Кыӵе ужъёс тужгес но трос кужымдэ басьто но маин тужгес ӵем пумиськоно луэ котькуд нунал?

— Али трос дырмес басьто интернет вотэсъёсын но паськыт вӧлмем мерлыко сетьёсын герӟаськем йыружъёс. Сыӵе йыртэманъёсты туж секыт сэрттыны-пертчыны, соин адямиослы туж сак луоно. Коньдонэз берыктыны туж секыт, куддыръя уг но луы.

— Сыӵе чурыт но эсэпъямтэ (ненормированной) ужан графикен семьяедлы дырыд, кужымед кыле-а?

— Семья — со самой дуноез но валтӥсез. Таӵе ужен ваньмаз вутскыны, зэмзэ но ,туж секыт, но тынад юн пыкетэд вань ке, мынам кадь, кылсярысь, ваньмыз одно ик пӧрмоз. Бадӟым тау шуэме потэ та понна анай-атаелы но анайзы-атайзыелы, кудъёсыз мыным котькуд ужын юртто, пыкет сёто. Озьы ик аслам кузпалэлы но бадӟым тау шуисько, со котьку мон вӧзын, секыт дыръёсы но со мынам валтӥсь юрттӥсе. Нылпиосы но ужелэсь секытсэ валаса, котькуд ужын юрттыны тыршо.

— Туннэ нуналэ асьмеос трос гинэ вераськиськом мошенничество сярысь. Кыӵе гинэ сазь йыро тон ӧд луы, йырдэ берыктыны туж капчи. Кыӵе валтӥсь индылэтъёсты лэсьтыны кулэ огшоры адямилы? 

— Берло аръёсы асьме шаерамы интернет вотэсъёсын герӟаськем йыртэман ужъёс будӥзы. Соин талы туж трос дыр висъяське. Пӧечиослэн куриказы шедемъёсын трос гинэ пумиськылыны тупа. Та самой секыт йыртэманэн лыдъяське. Ведь та выллем ужъёс шӧдскымон трос кужымез кулэ каро, нош сыӵе адӟонэ вуэмъёс сое уг валало. Соин учырен пайдаяськыса, эшшо огпол вазиськеме потэ ёросын но палэнын улӥсьёслы:

эн уйиське капчи коньдон сьӧры! Тодмотэм номеръёсысен жингыртӥсьёсын эн вераське, телефонъёсады лыктэм кодъёсты нокинлы но эн вералэ, тодмотэм ссылкаосы эн пыралэ. Асьмеос асьмес ик мошенникъёслы вань ивортодэт сётӥськом ук, асьмеос ик коньдонмес келяськом. Тодмотэм номерысен жингыртыса, полициысь сотрудник шуыса асэнызы тодматӥзы ке, яке кышкатыны кутскизы ке, соку ик телефондэс кысэ. Полициын ужасьёс ноку озьы уз лэсьтэ, тае тодады возе вал.

Бен, туала дыре полициын тыршись йыруж эскерисьёслы пӧртэм условиосын ужано луэ. Куддыр соос семьязэс кельтыса, уй-нунал службазэс нуо. Ваньмыз со асьмелэн кышкыттэмлыкмы понна. Следственной органъёсын ужась ӧнерчиосты но та удысысь ветеранъёсты сюлмысь ӟечкыласьком матэктӥсь ӧнер праздникенызы. Сӥзиськом палэнэ кожытэк, шонер сюрестӥ гинэ мыныны. Уйёсты сюлмаськытэк мед ортчозы, нош семьяяды котьку ог-огдэ валан но гажан мед улозы.

Туспуктэм: личной архив