«Мон — сценалэн нылпиез»

Галина Денисовна — трос аръёс ӵоже лулчеберет удысын ужась, бадӟым опытэн нылкышно. Ужан сюресэз солэн 1973-тӥ арын Ушма клубысен кутскем. «Соку мон егит вал на, соин ик кышкаллям вал нырысь сыӵе ужез оскыны. Егит, маиз ке уз пӧрмы шуыса. Но ваньмыз туж умой кылдӥз но пӧрмиз, шумпотымон. Художественной руководитель но, директор но ачим вал — ваньзэ ужай, одӥг кыл но ӧй вера. Собере ини 1985-тӥ арысен школае педагог-организатор луыса ужаны ӧтизы. Соглаш луи, туэ тани отын ужамелы но 33 ар луоз», — шуэ Галина Денисовна.

2011-тӥ арысен Галина Денисовна выльысь клубын художественной руководитель луыса ужаны кутске, но табере ини Ушмаын ӧвӧл, Покчи Лӧзяын. «Нылпиосын умой кусыпъёс тупатыны, огъя кыл шедьтыны быгатӥськоды, дыр, школаын но, культура юртын но соосын ужаны тупа бере» шуэм юанэлы со таӵе ответ сётӥз: «Конечно, конечно. Нылпиос монэ туж ярато, веранэз ӧвӧл. Школаын но бадӟым классъёсын дышетскисьёс «Эн кошке али, пожалуйста, ми школаез йылпумъям бере гинэ кошкоды» шуо», — серекъяса вера Галина Денисовна.

Нылпиос озьы верало, нош куд-ог адями «Ӧжыт буйгатскы», «тыныд кулэ-а со» но шуэ вылэм. Малы ке шуоно Галина Денисовна аслаз гуртэз но асьсэлэн культура юртсы понна ваньзэ сётыны дась. Та муген ик со кӧня аръёс ӵоже клубезлы ремонт карон понна кабинетысь кабинетэ ветлэм. Быдэстэм ик аслэсьтыз малпанзэ — Покчи Лӧзяысь клублы 2014-2015-тӥ аръёсы ремонт лэсьтӥзы. Табере отын Галина Денисовналэн тыршеменыз ваньмыз но выль — занавескаосыз гинэ но. «Тазалыке гинэ мед луоз, соку ваньзэ ужало. Мон ӧй ке тыршы, кин бен басьтӥськоз та уж борды? — шуэ та сярысь ачиз Галина Денисовна. — Котькуд адями сыӵе малпаськонэн улысал ке, кыӵе умой луысал со».

«Но котькуд адями сыӵе луыны уз быгаты, малпасько. Клубез радъян, ремонт карон кадь бадӟым но кылкутымон уж борды кутскыны ваньзы уз дӥсьтэ. Ма, дӥсьтӥзы ке но, та понна организаторской быгатонлыкъёс но кулэ ук», — шуисько. «Бен, соиз озьы. Мынам организаторской сяна, трос ай быгатонлыкъёсы. Черекъяны, кылсярысь, туж умой быгатӥсько, — вера серекъяса Галина Денисовна. — Тани кӧня ар ӵоже ини Гырон быдтон праздникъёсын ведущей луисько. Нырысьсэ со вал ини туж кемалась — 20 ар талэсь азьло. Соку Ольга Мироновна Пчельниковаен (Покчи Лӧзя шоръёзо школаысь удмурт кылъя дышетӥсь) одӥг арня куспын праздниклы программа дасямы, аьмеос ик ортчытӥмы но. Собере ини кӧня ар ӵоже Гырон быдтонэз нуылӥ. Тыршисько котькытчы вуиськыны но. Клубамы тани гитараен шудонъя кружокмы вань, эктӥськом, кырӟаськом — огъя вераса, тунсыко улонэн улӥськом».

Покчи Лӧзя культура юртлэн аслаз хореографез ӧвӧл бере, эктонъёсты но Галина Денисовна ачиз пуктылэ. Театрализованной представлениос но дасяло вылэм соос, отын но валтӥсь рользэ Галина Денисовна ачиз шудэ.

— Мон сцена вылын вордскем нылпи, — шуэ со. — Мынам анае вань улонзэ библиотекаын но клубын ужам. Культура удыслы быдэс улонзэ сӥзем. Пичи дырысеным клуб атмосфераын будэм бере, ачим но анай кадь луи. 1973-тӥ арын хоровик-баянист специальностья йылпумъяй республикаысь Калык творчествоя юртэз. Со дыръёсы ачим пӧртэм кружокъёсты но нуисько вал али, собере картлы кошки. Дыре ӧз луы ни, уж борды кутскид ке, сое рос-прос ужано ук, нимызлы гинэ ӧвӧл, — шуэ Галина Денисовна.

Со котькуд ужзэ озьы быдэсъя али но — кутскиз ке, пумозяз умой карыса йылпумъя. Кыӵе гинэ ужрадэ пыриськыны ӧтизы ке но, котьку соглаш луэ, пӧсь гужем куазь-а со, кезьыт буранъёс-а. «Без проблем, пожалуйста», — сыӵе ответ, пе, ваньзылы сётӥсько. Соин но, дыр, Галина Денисовнаез валче ужасьёсыз но, ансамбльысьтыз артистъёсыз но гажало. 2011-тӥ арын, выльысь клубын ужаны кутскемез бере, Галина Денисовна «Вуюись» удмурт фольклор ансамбль но кылдытэм. «Азьло но вань вал ансамбльёс, но таиз мынам аслам инициативаея кылдытэм ансамбль. Мон та ансамблен кивалтӥсько, ачим но отын кырӟасько. Татын милям дояркаос но, колхозникъёс но, больницаын ужасьёс но — ваньзы но вань, сыӵе пӧртэмесь адямиос. Вераны кулэ, азинсконъёсмы но милям трос. Казаньысь «Пирамидаын», «Униксын» выступать кареммы вань, «Между Волгой и Уралом», «Наш дом — Татарстан» фестивальлэн лауреатъёсыз луимы, Гырон быдтонъёс но милям ансамбльмытэк уг ортчо. Адямиос ӵемысь юало мынэсьтым: «Кытысен тон сцена вылэ потэмедлы быдэ кылъёс шедьтыса, адямиосын вераськыны быгатӥськод» шуыса. Мон соослы котьку сямен тазьы верасько: «Мон кылъёс уг утчаськы, соос асьсэос йырам лыкто. Со мынам уже ук», — шуиз Галина Денисовна.

Со кадь чырткем, етӥз, чурыт курон пуктӥсь нылкышноос, ваньмыз ласянь но сыӵе луо, шуо — улоназ но, ужаз но. Нош тани театр пуктыкузы, Галина Денисовналэн аслаз верамезъя, со сцена вылын валтӥсь героезлэсь мылкыдъёссэ шӧдыса, ас вылаз басьтыса бӧрдэм. Дугдыны но, пе, ӧй быгаты. Иське, сыӵе етӥз вылтусыз сьӧрын туж небыт сюлмо нылкышно ватске вылэм...