«Мудорвай» таяз аре маин паймытӥз? (фоторепортаж)

Зэмзэ ик, удмурт калыкез ӝутӥсь но данъясь ужрадэз витё бадӟымъёс но, нылпиос но. Бадӟымъёс — пиналъёс пӧлысь тужгес но устозэ, тунсыкозэ пусйыны но тодмостыны, нош пиналъёс асьсэлэсь быгатонлыкъёссэс возьматыны, сцена вылын асьсэлэсь кужымзэс эскерыны.

Озьыен, татын сюрес усьтӥське бадӟым сценае. Нылпиос кыдало, шуг-секытъёсын пумиськыса, соосты сӥё-дано потыны быгато. Гуртъёсысь лулчеберетъя юртъёсын но гурт клубъёсын кивалтӥсьёс соосты ужазы кутыны кутско, коллективазы пырто. Пиналъёслэн эктон-кырӟан удысэ сюлэмзы кыстӥськыны кутске.

Тодады вайытӥськом, туэ но нырысь ик вожвылъяськон нимаз зонаосын ортчиз — Ципья, Ӟаны, Покчи Лӧзя гуртъёсын. Та куинь зонаосысь тужгес но чебересь творческой номеръёсты бырйыса, 1-тӥ толсуре (декабре) вожвылъяськонлэн зональной этапез Гала-концертэн Балтась ёросысь лулчеберетъя юртын ортчиз. Вань тырмымтэосты радъяса, шонертыса, нылпиос зэмос удмурт концертэн паймытӥзы.

Арлэн пумыз — котькуд нылпи понна зэмос паймымон вакыт... Гӧртэм писпуос, тӧдьы лымы, бамез чепыллясь кезьыт, шундыя ворекъясь лымы — ваньмыз толлэсь зэмос чеберлыксэ но шулдырзэ возьматэ. Огшоры быръемын ӧвӧл, малпасько, та толэзь, малы ке шуоно толсур — паймымон дыр, куке выль арлэсь умойзэ возьмаськод, оскиськод ӟечезлы но азьланезлы ужпумъёс пуктӥськод.

Таӵе дыре нылпилэн пушказ но пӧртэм мылкыдъёс кылдо. Вань малпанъёссэс быдэстон понна соос юн тыршо дышетсконын но, ӵошатсконъёсын но, лулчеберетын но. 

Пиналъёслэсь мылкыдзэс ӝутӥсь «Мудорвай» вожвылъяськон таяз аре эшшо но жингрес гурлаз. Асьсэлэсь кужымзэс но быгатонлыкъёссэс нылпиос возьматӥзы вань 5 номинациын ик. Шумпотымон, зэмос удмурт нылпиос висъяськизы.

Сцена вылэ потӥсьёс гинэ валаны быгатозы, кыӵе куддыр кышкан вань мугордэ басьтэ, йырын кылъёс сурасько-пожасько... Нош нылпи понна со кык поллы секытгес: тон шоры быдэс зал учке, умой выступленидэ возьма. 

Быгатӥзы-а нылпиос учкисьёсты паймытыны асьсэлэн выступлениосынызы но та ӝытлы зэмос удмурт «шӧм» пыртыны? Малпасько, учкисьёслэн кичабонъёссы та юанлы зэмос валэктон сётӥзы: котькуд нылпи аслэсьтыз «ужзэ» рос-прос быдэстыны быгатӥз, шулдыр мылкыд кузьмаз.

Вань номинациосты лыдэ басьтӥд ке, котькуд пыриськисез нимысьтыз пусъеме потэ, малы ке шуоно соос котькудӥз вормись луо. Бадӟым ёрос сцена вылэ потыса, кышкатэк «рользэс» быдэстӥзы, шудӥзы, возьытэ ӧз усе.

«Удмурт кылын кырӟан быдэстон. Соло» номинациын малпасько тужгес но «ӝуатскизы» Ӟаны шоръёзо школаысь Камаевъёс — Антон но Андрей. Антон 2 классын дышетске, солэн сцена вылын ассэ юн воземез но жингрес куараез тросэзлы тодмо ни, нылпи садысен ик со пӧртэм ужрадъёсы пыриське. Со мылкыдъёссэ уг ваты, «Мудорвайлэн» берпуметӥ этапаз дасяське ни. Та ӝытэ но со аслэсьтыз быгатонлыкъёссэ возьматӥз: «Мон гуртын улӥсько» кырӟанэз сценаез чеберман тӥрлыкъёсын валче зэмос гуртын кадь быдэстӥз. Нош Андрей сцена вылэ потыны али гинэ кутскиз на, со нылпи садэ ветлэ. Ӟаны шоръёзо школаысь крезьгуръя дышетӥсен — Виктор Павлович Камаевен (валамон ни, пиослэн песятайзы) со быдэстӥз «Лэзе монэ...» кырӟанэз. Огшоры гинэ ӧвӧл, пыдъёссэ лёгаса ик выступлениезлы удмурт буёл пыӵатӥз. Малпасько, котькудӥз понна та пиос тодазы кылизы.

Та номинациын ик Покчи Лӧзя школаысь Денис Агеев, Вылын Ушма покчиёзо школа-нылпи садысь Иван Плотников, Ярак-Чурма покчиёзо школа-нылпи садысь Анна Фомина, Ципья школаысь Ульяна Семёнова но Никита Бураков асьсэды умой возьматӥзы. Соослэн кышкатэк сцена вылэ потыса асьсэды юн воземзы шӧдӥськиз, задор мылкыдэн быдэс залэз вогыриятӥзы. Ӟаны шоръёзо школаысь Валерия Чирикова «Лымы тӧдьы» удмурт калык кырӟанэз быдэстӥз. Та нылокез но ёросысь тросэз тодо ни, малпасько. Сцена вылын трос аръем артисткаос выллем пуктэм куараез вылтырез юзыр-кезьыр ик кариз. Ципья шоръёзо школаысь Милана Конькина туала эстрадной кырӟан быдэстӥз. Нылашлэн пальпотонэз но ымныраз осконлык суредаз.

«Удмурт кылын кырӟан быдэстон. Коллектив» номинациын Покчи Лӧзя гуртысь «Чебеляй» ансамбль шумпоттӥз. Ӟаны шоръёзо школаысь 1 но 2 классъёсысь дышетскисьёс тунсыко кырӟанъёсты быдэстӥзы. Тӧдьы пуштрес дэремъёсынызы али усись лымыпырыос сямен бергаса Балтась каргуртысь 2-тӥ номеро нылпи садысь нылъёс «Яратоно анае» кырӟанэн сюлэмез бугыртӥзы. Ципья нылпи садысь «Мусо нылъёс» жингрес куараенызы тулкымъяськытӥзы. 

«Удмурт кылын кылбур быдэстон» номинациын туж чебересь кылбуръёс лыдӟиськизы. Ӟаны шоръёзо школаысь 4 классысь дышетскисьёс Анастасия Шадрова Д. Яшинлэсь «Анай кыл» кылбурзэ лыдӟиз, нош Елизавета Григорьева В. Романовлэсь «Кузь сюрес вылэ басьто мон» кылбурзэ вераз. Сырья покчиёзо школа-нылпи садысь муспотон Полина Плотникова плюшевой «эшеныз» В. Котковлэсь «Э, пуные...» кылбурзэ улӟытӥз. 
Самой покчиосыз но палэнэ ӧз кыле, бадӟым сцена вылын кышкамзэс ӧз возьматэ. Ӟаны школаысь дошкольной образование басьтӥсь Константин Петров, арлыдэз шоры учкытэк, «Кытысь тодӥзы?» кылбурез лыдӟиз, Балтась каргуртысь 5-тӥ номеро нылпи садысь Эмилия Амакова И. Ивановлэн «Шунды но пилем...» кылбуреныз шумпоттӥз.

Ципья шоръёзо школаысь Кристина Григорьева, нимысьтыз Кузебай Гердлэн 125 арезлы сӥзьыса, «Шундыбергась» кылбурзэ лыдӟиз. Тунсыко чеберман тӥрлыкъёсын учкисьёслы мусо адӟиськиз нылашлэн рос-прос удмурт кылын кылбур верамез. Ципья школаысь ик Екатерина Садакова И. Ивановлэн «Пичи зор» кылбуреныз тодматӥз. Огшоры лыдӟем сяна, Екатерина тӥрлыкъёсты но ватсаз, со туж аспӧртэмлыко адӟиськиз.

«Удмурт калык эктон быдэстон» номинациын Ципья гуртысь нылпи садысь пиналъёс эктӥзы удмурт эктон. Аспӧртэмлыко дӥськутэнызы паймытӥзы но шулдыр мылкыд пыӵатӥзы. Кивалтӥсьсы — Тарасова Лариса. Нялтас вераса, Лариса Николаевна 23-24 шуркынмонэ «Вордскем (чуваш, удмурт, пор, мордва) кылъёсын дошкольной программаын визьнод сётӥсь нылпи садъёс пӧлысь тужгес умой визьнодась» элькун конкурсын 2 инты басьтӥз. Ӟечкыласьком но выль вормонъёс сӥзиськом солы!

Балтась каргуртысь 1-тӥ номеро нылпи садысь нылпиос «Удмурт калык эктонэз» быдэстӥзы. Сцена вылын улӟизы удмурт гуртлэсь улонзэ возьматӥсь суредъёс: ву нуллон, мызганэн шудон, шулдыръяськон. Балтась каргуртысь 3-тӥ номеро нылпи садысь нылъёс но пиос «Удмурт задор» эктон пуктӥзы. Сцена вылын юн возиськизы, эктонзы но туж чебер, тунсыко пӧрмиз. Балтась каргуртысь 4-тӥ номеро нылпи садысь нылпиос «тыпыртӥзы», удмурт калыклэн яратоно «Тыпыртон» эктонэнызы калыкез «сайкатӥзы». Балтась каргуртысь 5-тӥ номеро нылпи садысь усточиос но задор эктонэнызы палэнэ ӧз кыле.

Покчи Лӧзя нылпи садысь нылокъёс но пияшъёс «Алнаш эктонэн» паймытӥзы. Задор, капчи мылкыдэн пиналъёс ваньзэсты шулдыртыны быгатӥзы. Озьы ик лӧзяослэн кыкетӥ коллективзы но тунсыко эктон возьматӥз. Парен эктыса, чебертӥзы концертэз но пальпотӥсь ымныръёсын шуныт мылкыд пыӵатӥзы.

Бурдъяськон мылкыдъёс кельтӥз Вуж Кушкет гуртысь «Веснушки» коллектив. Аспӧртэм эктонэнызы адямиослэсь мылкыдзэс эшшо но ӝутӥзы но капчиятӥзы.

Туэ ар понна выль луись «Удмурт кылын театральной миниатюра быдэстон» номинацие Карелино гуртысь нылпи садысь нылпиос но Ципья шоръёзо школаысь дышетскисьёс пыриськизы. Карелино нылпи садысь пиналъёс визьнодасенызы валче мюзикл выллем «Шур дурын» («Возле речки») миниатюра пуктӥзы ке, Ципья школаысь 2 классысь дышетскисьёс тодмо «Курка, ӵӧж но мукетъёс» удмурт калык выжыкылэз улонэ «выжтӥзы». 
Тунсыко дӥськутъёс но декорациос миниатюраослы ватсам мылкыдъёс пыртӥзы. Нылпиос но туж тыршыса рольёсты шудыны быгатӥзы, уж борды рос-прос басьтӥськемзы вань учкисьёслы шӧдӥськиз, визьнодасьёссылэсь но дышетӥсьёссылэсь верамзэс ӧз возьмалэ.

Одӥг гинэ ӵектон сётыны кулэ: театральной миниатюраосты радъяку, вазьгес ик бадӟым сцена вылын репетиция лэсьтыны кулэ, малы ке шуоно учкисьёслы валантэмгес луиз дышетскисьёслэн вераськемзы.
Жаляса гинэ тодмостыны луэ одӥгзэ: зэмос удмурт нылпиос вужере кыльыны кутскизы кадь. Мазэ веранэз, калыкъёс куспын эшъяськон одно ик луыны кулэ: туж шумпотымон, куке мукет калыкысь нылпиос но удмурт лулчеберетэн тунсыкъясько, «Мудорвае» пырисько. Но, оло, сыӵе пиналъёслэсь выступлениоссэс нимысьтыз номинациен дунъяны кулэ, дыр, малы ке шуоно суро-пожо луэм вожвылъяськонын удмурт но бигер нылпиосты огкадь дунъяны нокызьы но уг луы. Удмурт кылэз но лулчеберетэз утись вожвылъяськон трослы удмурт пиналъёс понна валтӥсь луыны кулэ!

Огъя вераса, удмурт лулчеберетлэн «Мудорвай» улоскуспо вожвылъяськонэз шуныт мылкыдъёс кельтӥз. Вань нылпиос выступлениоссылы рос-прос дасяськыса, задор мылкыдын ортчытӥзы та ужрадэз. Син азе пуктыны луонтэм, кӧня кужым, кӧня малпанъёс пыр потӥзы кивалтӥсьёс но: котькуд движенилы, кырӟанлы, веранлы аспӧртэмлыко удмурт «шӧм» пыӵатыны тыршыса, нылпиосты бадӟым ёрос сцена вылэ вуттыны быгатӥзы!

Вань нылпиосты, кивалтӥсьёсты, дышетӥсьёсты но визьнодасьёсты ӟечкыласькомы бадӟым вормонъёсы вутскеменызы. Табере пиналъёс азьын эшшо но кылкутӥсь этап: 22 толсуре пиналъёс ёрослэсь данзэ утьыны Казане мынозы. Сӥзиськом соослы азьланяз но удмурт кылэн но лулчеберетэн тунсыкъяськон мылкыдзэс ыштытэк вормонъёсы вутскыны!