Мукетъёслэн пыжемзы ческытгес?!

Асьме районысь магазинъёстӥ ветлыку, ялан одӥг юан кылдэ: малы асьме дорын - районын поттэм продукция ӧжыт? Малы весь палэнысь ваемзэ, кунгожсьӧрын поттэмзэ тросгес басьяськом?

Тани, кылсярысь, нянез гинэ басьтоме. Туннэ нуналэ магазинъёсы со кытысен гинэ но уг вуы: Казаньысен, Набережные Челныысен но, Малмыжысен но... Бен асьме дорын но нянь пыжон цехъёс ӧжыт ӧвӧл ук, отын но туж ческыт, ӟечлыко но трос пӧртэм нянь, булкаос но мукет ческыт макеос пыжо ук. Арня ӵоже но вужмисьтэм палэнысь ваем нянен ӵошатоно ке, ӟечлыкез ласянь умойгес но, дыр, али соос. Юри гинэ лыдъяй, туннэ районын ог дас мында нянь пыжон цех вань. Со пӧлысь ньылез ини туала оборудованиен, выль технологиосъя ужа. Поттэм продукцилэн ассортиментэз но будэ. Сухари, пряникъёс, круассан, пирог-булкаос, чак-чак, бубликъёс... - жаляса верано, та асьме дорын пыжем сиёнъёс вань магазинъёсын уг вузасько. Вузасько ке но, ӧжыт. Вераны кулэ: лымшор бере магазинъёсын небыт нянь-булкаос шедьтыны уг но луы ини. Суббота-воскресенье нуналъёсы но, куд-ог магазинъёсын сяна, та проблема, огъя вераса, сэрттымтэ-пертчымтэ на. Нош Арчаысь, Малмыжысь, Мамадышысь, Казаньысь, Набережные Челныысь ваем продукция котькуд магазинын вань. Асьме дорын поттэм лимонадэн, квасэн но сыӵе ик югдур.

Скал вӧй, сыр, йӧлкузям сярысь ке верано, Балтасьлэсьсэ ӧвӧл, мукет улосъёсысен, кузь сюрес ортчыса ваемзэ кулэ кариськом. Соин ик паймонэз ӧвӧл, Балтась йӧл-вӧй комбинатын поттэм продукцилэн дас процент мындаез гинэ асьме магазинъёсы вуэ шуыса.

- Асьмеос но тросгес оптэн вузаны тыршиськомы. Курон луыку, районысь магазинъёсы но лэзиськомы, тунсыкъяськыса, юалляськыса улӥськом, ӵектӥськом, - шуэ комбинатлэн директорезлэн воштӥсез Алмаз Ахметханов. Оло, продукция поттӥсьёс ласянь ӵапак со ӵектон шуонэд но тырмыт уг луы, дыр. Кӧня ке ар куспын Татарстанын тодмо луэм «Халяль» индустриальной паркын поттэм халяль пельмень но вань магазинъёсын уг адскы. Асьмелэн вузкарисьёсмы мукет производительёслэсь пельменьёссэс ушъяса вузало.

- Кылсярысь, март толэзе ми дорын лэсьтэм пельменьлэн 13 процентэз районысь вузкарон точкаосы келямын, - шуэ та организациысь бухгалтер Сария Хабибуллина.

Нош туннэ нуналэ халяль продукцилы кулэяськон бадӟым. Соин но таӵе югдур малпаськыны инъет кылдытэ. Вералом, малы кыдёкысен ваем сиён асьме дорын поттэмезлэсь ултӥгес? Сюрес расходъёсты гинэ лыдъяно ке но, та зэмос югдур ӧвӧл. Оло, муг мукетыз бордын, дыр - ултӥ, ӟечлыктэм сырьё луэмысь, дыр? Яке, вузкарон точкаос - магазин кузёос пӧлын: «Асьмелэнъёс узырмытозь, мукетъёслы умой мед луоз», - шуэм вожъяськон малпан но инты басьтэ шат? Учконо ке, кыӵе магазинэз, кытын поттэм но кыӵе вузэз бырйыны котькуд басьяськисьлэн аслаз правоез. Вузлэн трос, дунъёслэн пӧртэм луэмзы но начар ӧвӧл кадь. Но озьы ке но, огъя вераса, патриотъёс-а асьмеос?..