Мурт ӧвӧл соос

- Асьме районысь адямиос ӵапак озьы ужало, - шуиз та ужпум ласянь районын социальной опекая но попечительствоя отделэн кивалтӥсь Минназия Габделхакова. - Таӵе мылкыдэн лыктӥсьёслы ми но ваньзэ валэктыны тыршиськомы. Таӵе вераськонъёс бере мур малпаськонэ усисьёс но, мылкыдзэс воштӥсьёс но луо. Но та малпанзэс-мылкыдзэс сюлэмзы пыр поттэмъёсты таӵе вераськонъёс уг кышкато. Казаньысь Киров районысь нылпи юртын суббота но воскресенье нуналъёсы ортчытӥськись 80 часъем дышетсконъёсты но шугъяськытэк ортчо соос. Отысь нылпиосты, дышон понна, одӥг, кык толэзьлы куное но вайыны дӥсьто. Огъя вераса, та процесс шӧдскымон кузь, документъёс дасяй но соин уж быриз шуэм сямен ӧвӧл.

Туннэ нуналэ районын 16 семьяын визьноданы басьтэм 19 нылпи будэ. Соос пӧлысь 14-ез мукет районъёсын вордскемын, нош витез асьме дорын. Вордыны но опекунствое котьку сямен матысь ӵыжы-выжыоссы, песяй-бабайёссы басьто. Районын 26 семьяын 31 вордос нылпи будэ, 68 нылпилы опекунство оформить каремын. Сирота кылем, анай-атай праволэсь люкем адямиослэн нылпиоссылэн районын, матысь ӵыжы-выжыоссы доры кылемзы, котькуд ласянь учкид ке но, умойгес. «Ми, огъя вераса, семьяосты утёнлы дурбасьтӥськом, - азинтэ Минназия Габделхакова веранзэ. - Юись анай-атайёсты кужмысь эмъяськыны лэзиськомы, огдырлы правозылэсь люкиськомы, умой пала воштӥськонъёс луизы ке, берен берыктӥськомы. Чурыт ужрад кутыса но пайдаез луымтэ дыръя гинэ берпуметӥ вамыше мынӥськом. 2012-тӥ арын 8 мурт анай-атай правоезлэсь люкемын ке вал, кылем арын та лыдпус ньыльлы кулэсмиз. 2014-тӥ арлэн куинь толэзез понна одӥг мурт сыӵе правоезлэсь люкемын ини. Нокин понна но секрет ӧвӧл: берло аръёсы районын юись анайёслэн лыдзы юн будӥз. Соин сэрен куинь-ньыль нылпиезлэсь люкем анайёс но вань. Созэ но вераме потэ: та дырозь визьноданы басьтэм нылпиос пӧлын шудтэм учыръёс ӧз луэ, нимысьтыз органъёсын учётын сылӥсьёс ӧвӧл. Кык семьяос куспын валамтэос, керетон потэм учыръёс но ӧвӧл. Кык нылпи гинэ, семьяе пыриськыны быгатымтэенызы, берен нылпи юртэ берытскиз. Созэ но вунэтыны уг яра: выль семьялы, выль условиослы дышон, тупатскон нылпи понна туж секыт процесс. Та вакытэ анай-атайёслэсь нимаз ик бадӟым чиданлык, нодлык куриське. Соос нылпилэсь сотэк но висись сюлэм яраоссэ усьтонлэсь утиськыны кулэ».

Ӵемысь асьме районын улӥсьёс пичи нылпиосты басьтыны тыршо вылэм. «Та нылпи понна но, сое басьтӥсьёс понна но умой. Пинал макем кемагес нылпи юртын улэ, сокем секытгес со выль семьялы дыше. Со ик дыре пичи пиналэз вордыны басьтӥсь анай-атайёс но солэсь «мурт» луэмзэ вунэто, аслад вордэм нылпиед кадь, пе, потэ, шуо. Но, жаляса верано, гурт интыын тае тодэ вайытӥсьёс, нылпиослы анай-атайёссы асьсэлэн луымтэзы сярысь верасьёс шедё. Таӵе выремез йыруж лэсьтонэн ӵошатыны луэ шуыса тодын возьысалмы ке, умой луысал», - шуэ М.Габделхакова.