Мылкыдмес лӧпкытӥзы

Соослэн тазьы огъя ужамзылэн емышез милемды, пересьёсты, туж шумпоттэ, азьланезлы оскон кылдытэ. Ёросысь «Удмурт кенеш» НКА-лэн но татын туж бадӟым инъетэз шуысал мон, малы ке шуоно кенешчиослэн огъя планзыя но ӵектонъёссыя ужам бервыло луэ. Тани алигес гинэ 26 толшоре Покчи Лӧзялэн культура юртаз «Шулдыр ӝыт» нимаськем концертэ ветлӥ. Концертэз мон дугдылытэк, огшокчемен кадь учки. Пайми сцена вылысь удмурт нылъёсты но пиосты адӟыса. Кыӵе быгатыса но сюлмысь соос кырӟало-экто, зэмос артистъёс но тӥни!!!Быдэс сцена вуюись кадь яркыт костюмъёсын пиштӥз, выль кырӟан-эктонъёс сюлэммес вырӟытӥзы. Та концертэз дасяз но нуиз «удмуртлык понна сюлэмыз висись» Петрова Г.Д. Солэн кивалтэмезъя концертэ пӧртэм удысын ужасьёс пыриськемын вал. Кинъёс гинэ ӧй вал сцена вылын: дышетскисез но дышетӥсез, сиён пӧзьтӥсез но скал кыскисез, студентэз но шофёрез-вераса но уд быдты. Культура юртын ужасьёс пусйизы но тау карон кылъёсты веразы котьку юрттыны дась луись «Сурнай» эштослэн кивалтӥсезлы Гилязов Тауфик Газизовичлы, малы ке шуоно солэн коньдонэн юрттэменыз чебересь костюмъёс вуремын вылэм. Нош ачим мон музъемозь ик йыбырттыса, тау карисько концертэз радъясьёслы но артистъёслы. Кызьы мон валай, та концертысь тужгес но ӟечъёссэ номеръёсты «Удмурт кенеш»-лэн 25 ар тырмемезлы сӥзем ужрадэ быръё шуыса. Но мон аслэсьтым оценкаме со ӝытэ ик пуктӥ-«10».Тау ваньдылы калыклы таӵе шумпотон ваемдылы. Азьланяз но озьы ик бервыло ужаны, тазалык но ужазинлык, вормонъёс сӥзисько!!!

Дышетон удысысь ветеран П.В. Байтуганов