Хезмәт

Мынам улон книгае

Мынам малпамея, улон — со книга. Кинлэн ке но улон сюресэз одӥг векчи книгае гожтыны тырмоз, кинлэн ке — трос люкетэн роман пӧрмоз. Со книга гожтонэ асьмеос но пыриськиськом.

"Маин но уг ӵошато адямилэсь улонзэ.

Мынам малпамея, улон — со книга. Кинлэн ке но улон сюресэз одӥг векчи книгае гожтыны тырмоз, кинлэн ке — трос люкетэн роман пӧрмоз. Со книга гожтонэ асьмеос но пыриськиськом. Соин но книгалэсь бамъёссэ воштыны но выльысь гожтыны луонлык уг луы. Гожтӥськом улон книгамес одӥг пол но даурлы. Кулэ улыны, ваньмыз пыр потыны.

Туннэ мон дэмласько улон книгаеным тодматскыны. Ӧвӧл, со гожтыса быдтымтэ на, асьмеос книгалэн шораз гинэ. Оскисько, со одно ик трос томен роман луоз. Книгалэн вань ини азькылыз но ньыльдон куинетӥ бамез.

Та книга бамъёсын мынам семьяе, кык пиосы вордӥськизы. Соос понна корка ӝутӥм. Макем бадӟым со шуд —  аслад коркаед! Вань малпанъёсы мынам семьяе сярысь, вань осконъёсы мынам кузпалэлы но пиосмылы. Пиосмы бадӟымесь ини, вылӥ тодон-валан басьто. Оскисько, мынэсьтым но кузпалэлэсь соос умойзэ гинэ басьтозы. Семьяе мыным улон кужым сётэ. Вань кутскем но малпам ужъёсме ужаны юрттэ. Уже но тунсыко потэ, шумпотон вае. Угось мон ачим сярысь но ӧй вунэты: тодон-валан басьтӥ, гуртысь клубе ужаны пыри.

Кышномуртлэн улонэз кык бадӟым люкетлэсь сылэ — бадӟым кылкутон но бадӟым яратон. Улонэз, матысь адямиостэ, нылпиостэ яратытэк зэмос кышномурт уд луы. Трос кужым кулэ выль семьяе пырыса калык радын улыны. Улытозям кӧня пӧртэм ужлы дышоно луи мон но:

Повар: пӧраськытэк, ческыт сиёнтэк ӝӧк тыр уз луы.

Дышетӥсь но мон: пиосыным уро дасян, сочинение гожтон — ваньмыз ик мон вылын.

Психолог но луи ини: буйгатӥсько картме сюлмаськонъёс дыръяз, пиосылы кенеш сётӥсько сюлэмазы нырысетӥ яратон каръяськыку, анайзыеным огъя кыл шедьтӥсько.

Эмъясь но мон: котьку тодӥсько, кинлы бурмон понна эмъюм кулэ, кинлы шуныт кыл.

Мировой судья но: ку кинлэн куспаз пыроно, кинлы кыл верано, тодэ кен гинэ.

Вуриськись но мон: уй куспын дэрем вурыны, штора вурыны кен гинэ быгатэ.

Озьы ке но валтӥсь интыын, мон понна — вуриськон, со люл-сюлэмме буйгатон.

Мынэсьтым туж ӵем юало «Кӧня дэрем вурид ини»? Ужпум лыдпус бордын ӧвӧл ук. Удмурт калыклэсь йылолъёссэ кутыса котькуд вурем дэреме адямилы шумпотон мед сётоз. Ужъёсы калык пӧлы мед вӧлмозы, адямиослэн сюлэмазы мед кельшозы.

Азьланьзэ Инмар гинэ тодэ, нош адями чылкыт малпанъёсын, адямиослы ӟеч лэсьтыса улыны кулэ. Мон озьы ик улӥсько".

Сюлме пыӵась, мылкыдэз бугыртӥсь кылъёс. Озьы ведь? Котькуд нылкышнолы матын но валамон кылъёс. Аслаз улон книгаез сярысь таӵе мур пуштросъем гожтослэн авторез луэ Карек-Серма гуртысь Зоя Михайловна Никитина. Та кышномуртэз азьло но тодӥсько вал. (Ма, гуртъёсысь лулчеберетэз азинтон бордын тыршисьёсты котькин ӧвӧл ке но, тросэз тодэ, дыр, шуыса малпасько. Нош со ӵапак Карек-Серма гурт клублэн кивалтӥсез). Та чебер гожтэмзэ  «Выжы юртысь кен» конкурслы дасям вылэм. Отчы ачиз кен луыса пыриськиз уга.

Зоя апай Карек-Сермаысь Вера Петровна но Михаил Иосифович Хомяковъёслэн семьяязы шоретӥ ныл луыса 4-тӥ толсуре (декабре) 1976-тӥ арын вордске. Котькуд пинал сямен ик, тодон-валан люкан этапез ортче: нырысь гуртысьтызы покчиёзо школаын дышетске, собере Ӟаныысь шоръёзо школаез пырпотэ но Урнякын, 1 ар ӵоже тодон-валанзэ муромытыса, бухгалтерлэсь ӧнерзэ басьтэ.

Лулчеберет удысэ Зоя Михайловна вуэ 2010-тӥ арын. Тани 9-тӥ арзэ ни тырше со Карек-Серма гурт калыклэсь огсыр улонзэ тунсыкогес, шулдыргес карон понна. Со аръёс куспын Зоя апай вутске Алабугоысь (Елабугаысь) Лулчеберетъя но искусствоя дышетскон юртын ӧнер басьтыны.

Творческой адями котькуд ласянь усто луыны кулэ, шуо. Зоя апай сярысь но озьы верад ке луэ, дыр. Кышномурт гуртлэсь культурной улонзэ нуэм сяна, вуриськонэн но сяська будэтонэн тунсыкъяське на.

«Клубын ужаны кутскемелэсь азьло но пичи-пичи вуриськылӥ. Аслам анае но, анайзые но вурисько вал. Оло, соослэсь адӟыса но школаын вуриськыны дышетскыса, та уж мынам сюлэмъям луиз. Нош культура удысын ужаны кутскеме бере, мылкыды эшшо но пуромиз. Сценической костюмъёсты выльдон малпанэн ӝуатски. Та ик луиз нырысетӥ костюмъёслэн кылдэмзылы инъет но, муг но. Вань ужъёсы пӧлысь таосыз тужгес но ярамонэз но матынэз. Туннэ нуналлы 48 сценической костюм вуриськем ни, соос пӧлысь 16-ез садиклы», — вера аслаз валтӥсь тунсыкъяськонэз сярысь Зоя Михайловна. «Учырен пайдаяськыса, туж бадӟым таукаронме вуттэме потэ колхоз председательмылы. Солэн юрттэмезлы луыса сценической костюмъёсты вурыны луонлык кылдӥз, котькыӵе ужрад солэн юрттэмезлэн бервылыз. Озьы ик тау карисько гурт калыкелы. Гуртоосы котьку юртто, ужаны кужым но мылкыд сёто», — ватсаз Карек-Серма клублэн кивалтӥсез.

Солэн вурем дӥсьёс зэмзэ но синмаськымон чебер пӧрмемын. Кемалась ӧвӧл гинэ ёросамы ортчем удмурт но пор кырӟанъя фестивалез учкемъёс синйылтытэк ӧз кельтэ, луоз, Карек-Серма гуртысь Диана Васильевалэсь аспӧртэмлыко дэремзэ. Со но Зоя апайлэн тыоршемезлэн емышез.

Туала дыре удмурт дӥсен, калык чеберманъёсын тунсыкъяськон будӥз шуи ке, уг янгыша, дыр. Адямиос валатскыны кутскизы кадь, со асьмелэн калык мерасмы шуыса. Соин но кинлэн зэмос вашкала удмурт чеберманъёсыз ӧвӧл, тыршо соосты, валляна радлыксэ но куронъёссэ тӥятэк, туала сямен лэсьтыны. Зоя апай но камали лэсьтонэн тунсыкъяське.

«Нырысь ик аслэсьтым камалиме выльдӥ. Со бордысен ваньмыз кутскиз ни», — шуэ та тунсыкъяськонэз сярысь кышномурт.

Зэм но, удмурт нылкышнолэн киосаз котькыӵе уж пӧзе. Тужгес но вӧзад котьку пыкетэд, юрттӥсед луиз ке. Зоя апайлэн оскымон адямиосыз — Владислав кузпалэз, Артём но Максим пиосыз, анаез но анайзыез-атайзыез. Кышномурт котьку но соослэсь юрттэтсэс шӧдыса улэ. Азьпалан но со озьы медло. Карек-Серма гуртысь Зоя Никитиналэн улон сюресэз бадӟым роман гожтымон мед луоз.

 

Реклама
Нравится
Поделиться:
Реклама
Комментарии (0)
Осталось символов: