Нош тӥ праздниклы дась-а?

- Сабантуйлы арлы быдэ, нимаз приказъёс гожтыса, ужасьёсын лад-лад вераськыса, умой-умой дасяськиськом. Гуртъёсын ортчись праздникъёсын интыысь фельдшеръёс дежурить каризы ке, Янгулын, Ципьяын участковой амбулаториос кылкутӥсь карыса тодмостӥськизы. Район Сабантуйын ӝог эмъюрттэтъя кык бригада ужалоз. Нош майданын ялан кык фельдшер но одӥг врач луозы.

Фанис Газизуллин - районысь полицилэн начальникезлэн воштӥсез:

- Милям куинь нунал ӵоже быдэс состав - 30 - мурт кужмоятэм режимын ужалоз. Вань службаос порядокез утёнэ кыскемын луозы. Отпускын луэм сотрудникъёсмы но та нуналэ уже потозы.

Тылпулэсь утисьёс но та нуналэ сак луыны оскыто. Гурт Сабантуйёсын интыосысь депо машинаос дежурить карыны тодмостэмын ке, район Сабантуйын, огшоры режим сяна, эшшо одӥг бригада ужалоз.

110 вузкарон точкаосын ужбергатӥсьёс, районысь потребительёслэн обществозы, Казаньысь но мукет городъёсысь лыктэм вузчиос паськыт ассортиментэн сиён-юонъёсын, шудонъёсын но мукет арбериосын асьмеды шумпоттозы.

Потребительёслэн «Нянь» обществозы 600 килограмм шашлык, 700-лэсь трос чебурек, 300 пала табань, 100 порция плов, одӥг но ӝыны литръем быдӟалаен 500 пластиковой бутылкаосын лимонад, газ ву, квас вузаны малпа. Озьы ик пицца, треугольник, трос пӧртэм колбасаос, пӧсь нянь, ческыт чай но мукет сиёнъёсты ӵектоз. «Та ваньмыз но нокыӵе добавкаос ватсатэк асьме дорын поттэм зэмос натуральной продукт. Калык кышкатэк, милям вузкарон точкаосамы мед лыктоз», - шуо соос.

Праздникын самодеятельной коллективъёс асьсэлэсь быгатонлыксэс возьматозы, учкисьёслы, куноослы умой, капчи мылкыд кузьмалозы. Праздникез усьтон ужрадэ гинэ но 400 пала адями пыриськоз. Шулдыръяськонэ озьы ик профессиональной артистъёс но ӧтемын.