«Нылпи атаезлэсь мае вите?»

Атайёслэн советсылэн Нурмаын ортчем семинарзы «Школалэн дышетон-визьнодан ужаз атайлэн ролез» шуэм темалы сӥземын вал. Отчы школаысь директорлэн визьнодан ужъёсъя воштӥсез но пыриськиз. Нурма школалэн директорез Габдельфарт Хазиев семинар азьын тазьы шуиз: «Та люкаськон юнме ӧвӧл, со Атайёслэн советсылэсь ужзэ радъя, сое эшшо но пайдаё каронлы, визьнодан ужез юнматонлы юрттэ». Ужрадэ трос атайёс лыктэмын вал. Нурма школаысь Атайёслэн советсылэн кивалтӥсез Радик Шарипзянов атайёслэн палэнын ужаменызы сэрен семьяенызы ӧжыт дырзэс ортчытон проблемаез ӝутӥз. Соин сэрен районын ужан интыосты кылдытон бордын ужаны ӵектонэн потӥз. Районысь быдэ вуымтэ нылпиосын ужанъя комиссилэн председателез Наиль Сабирзянов нылпиосты умойтэм сямъёслэсь утёнын атайлэн интыез сярысь вераськиз: «Районын Башкортостанысь бертэм трос нылпиё семья вань. Юртазы телевизор но, интернет но ӧвӧл.  Каракуле гольык пыд ветло. Семьяязы улон сямзы, нылпиоссэс будэтэмзы сыӵе. Нош школаын дышетсконын соос азьветлӥсьёс пӧлын, туж уно лыдӟисько. Гуртазы лыктыса, библиотекарьлэсь кыӵе проблемаосты вань шуыса юасько». «Книга тырмытыны ум быгатӥське, бадӟым семья вань книгаосты лыдӟыса быдтӥз, пожалуйста, книгаосын обеспечить каре вал», — шуиз со...  Районысь внутренней ужъёсъя отделысь Фанис Газизуллин нылпиосты терроризм, наркомания выллем кышкытлыкъёслэсь нимысьтыз ик интернетэн пайдаяськоназы  утьыны косӥз. Примеръёс трос но вераз. Кылсярысь, дас аресъем ныл полицие анаез-атаез вылэ заявление гожтэм, анай-атаез сое ялан пыкылыса уло шуыса. Та учырен матынгес тодматскем бере валамон луэм, со ныл интернет пыр одӥг пиен тодматскем но солэсь косэмъёссэ, дышетэмъёссэ быдэсъя вылэм. Нылзылэсь син азьын воштӥськемзэ анай-атай шӧдытэк но кылиллям, малы ке шуоно кыксы но ужын, бертыса но ужъёслэсь уг ваньмо... Али дыре нылпиен психолог ужа, малы ке шуоно пилэн влияниез бадӟым луэм. Семинаре пыриськем психолог аслэсьтыз выступленизэ залысь атайёслы сётэм юанысен кутскиз: «Нылпиды тӥлесьтыд мае вите?» Тросэз атайёс айфон куро яке вераськыса пукемзы потэ шуизы. Но одӥгез но атай солэсь яратэмзэ шуыса ответ ӧз сёты. «Нылпи атаезлэсь яратыса улэмзэ возьма», — валэктон сётыса пусйиз психолог. Семинаре пыриськем районысь дышетонъя управлениысь визьнодан ужъёсъя методист Резеда Гаязова вань лыктэм муртъёслы тау кариз. Районысь Атайёслэн союззылэн кивалтӥсез — трос нылпиё атай, спортсмен, кивалтӥсь Булат Зиятдинов котькуд поселениын 8-тӥ мартлы анайёслы концертъёс дасяны но семьяосын ӵош спортэн вырыны ужпум пуктӥз.