«Огазе уломе та шулдыр дуннеын!» (2 люкет)

Адями — дуннелэн валтӥсь тодметэз но валтӥсь дунлыкез. Кызьы адями та улонэз капчиятэ, озьы адями ик сое сӧрыны но быгатэ. Туала дуннеын кылдэм югдурлы та юн зэматон (доказательство) луэ.

Йӧскалыккуспо ужрадъёс но лулчеберет

Шулдыръяськонъёс — улонлэн одӥгез тужгес кулэ луись тодметэз. Шимес иворъёсын валче, котькуд адями улонысь шулдырзэ но шедьтыны быгатыны кулэ. Улонлэсь шӧмзэ валаны, яркыт буёлъёссэ адӟыны адямилы юртто ёросын, гурт клубъёсын ортчись пӧртэм ужрадъёс. Туннэ нуналэ нимысьтыз дунъясько йӧскалыккуспо ужрадъёс, кытын пӧртэм кылын пӧртэм юанъёсты эскерыны но радъяны луонлык кылдытэмын. Озьы адямиослэн кусыпъёссы но герӟасько, юнмало но азьланьтӥсько: огъя ужаса, ог-огзэс валаса но ог-огзылы юрттыса.
Та ласянь туж ушъямон Ципья гуртысь калык. Пӧртэм йӧскалыкысь адямиос ог-огенызы кельшымон кылын верасько, кытын ке удмурт, кытын ке бигер, кытын ке ӟуч. Сыӵе аспӧртэмлыко луэмзы синмаськытэ но умоезлы оскытэ.

Нимысьтыз йӧскалыккуспо шуыны луэ Ципья гуртысь лулчеберетъя юртэз но. Татын 8 ар ӵоже тырше ёросысь «Анна Плотникова» — Евгения Михайлова. Солэн баянэн шудэмезлы но кырӟамезлы адямиос паймемын ӧвӧл ни, но ӧжытэз гинэ тодэ, кызьы со сюлэмзэ сётыса тырше ас удысаз.

— Ципья лулчеберетъя юртын 2015 арысен ужаны кутски. Соку клубен Диния апай кивалтӥз али. Ципья зэмзэ но аспӧртэмлыко гурт, пӧртэм кылын вераськись калыкен ужаськомы, котькуд нацилэн аслаз сям-йылолъёсыз, праздникъёсыз, шулдыръяськонъёсыз, милемлы соосты ваньзэ тодоно, клубысь улонэ выжтоно. Соин но котькуд ужрадэз 3 кылын нуиськом: ӟуч, бигер но удмурт. Концертной программаез но пӧртэм калыкысь эктонъёсын но кырӟанъёсын тырмытӥськом, узыртӥськом. Котькуд калыклэсь чеберлыксэ возьматыны тыршиськом. Милям «Туганай» фольклор ансамбльмы вань. Татчы кряшенъёс пырисько. Мылысь-кыдысь кырӟанъёсты быдэсто, соос малпаськыто но, либато но. Мон ачим но куинь кылын вераськисько бере, мыным секытэн уг сётскы аспӧртэмлыко калыкен ужаны. Бигеръёсын бигер сямен, удмуртъёсын — удмуртэн, ӟучъёсын ӟучен верськисько. Пор кылэн кырӟанъёсты кырӟасько, вераськыны гинэ уг быгатӥськы. Малпасько, котырам пор калык луысал ке, капчиен дышетскыны луысал. Аслэсьтым ужме туж яратӥсько. Ципья гуртысь калык котьку но огкылысь луыса улӥз. Тани али но асьме шаерамы секыт дыръёс вуизы, кылем арысен ини вань гурт калык нимысьтыз ожгар операцие пыриськисьёслы юрттэ. Лулчеберетъя юртамы мылкыд карисьёс люкаськыса маскировочной сеткаос керттӥськом, блиндажной свечаос но кулэ луись гуманитарной юрттэт люкаськом. Куке тонэ калык вала но гажа, куке тон ачид но калыкез гажаськод, валаськод, огкылысь луыса соослэсь юрттэмзэс но гажамзэс шӧдӥськод, ужаны трослы капчигес луэ. Кыӵе гинэ уж борды ӧд кутскы, калыкен дэмен ужаськомы, соин ик ёросамы ортчись вожвылъяськонъёсын но вормисьёслэн радазы пыриськом. Азьпалан но Ципья гурт калыклы юн тазалык, огкылысь эшлыко луыса улыны мед кылдоз, — ужъёсыз сярысь ивортӥз Евгения Михайлова.

Лулчеберет удысын ёросысь клубъёс ужзэс валаса но яратыса быдэсто. Фольклор коллективъёсмы элькун но улоскуспо ужрадъёсын вормисе пото, ёросмес данъяло. Коллективъёслэн костюмъёссы но вашкала пужыосын чебермамын, соин соос зэмзэ ик вашкалаослэсь дунне шоры учкемзэс шараяло. 

Котькуд ёросысь лулчеберетъя юртъёсты, гурт клубъёсты басьтӥд ке, аспӧртэмлыко калык эшъяськон интыос луо. Татын арлыдоос ог-огенызы вераськыны, мылкыдъёссэс шараяны быгато, егитъёс — огазе люкаськыса эктыны но кырӟаны. Гуртъёсын пӧртэм калык улэмен валче соосты огинэ люкано, огзэс но палэнэ кельтоно ӧвӧл.

Ципья гуртын ваньзы эшъяськыса, ог-огзэс валаса уло шуыса, котькуд ужан ӧнеразы но адӟиське: черкын ньыль кылын вӧсь лыдӟиське, «Калыкъёслэн эшъяськонзы» шаертодонъя музей рос-прос ужзэ быдэстэ (туннэ нуналэ кивалтӥсез Сайдаш Нурмиев луэ). Татын пӧртэм калыкъёслэн вашкала дӥськутъёссы но возьматэмын, экскурсиос но котькуд адямилы валамон кылын нуисько.

Удмурт коллективъёс пӧлын но асьмелэн котькудӥз ассэ устоен возьматэ, кужмо палъёсыз котькуд коллективлэн аслаз луо. Выль амалъёсты пыртыса, эктыны пӧртэм пумо тӥрлыкъёс кутыса, удмурт фольклорез чебертыса возьмато. Уж борды рос-прос басьтӥськемзы но адске.
Ёросамы бигеръёслэн лыдзы трос луэмен, соослы котькуд нунал выльзэ утчано. Та паласен уж пӧзе Балтась лулчеберетъя юртын, эктонысь усточи Рустам Хасанов «Балкыш» коллективеныз котькуд вожвылъяськонъёсы пыриське, егитъёсын, пиналъёсын, арлыдоосын ужамез аслыз кельше. Ачиз туж егит ке но, адямиез бордаз кыскыны быгатэ, сюлмысь тырше ёросысь улонэз улӟытыны.

Бигер лулчеберетэз узырто на крашинъёс. Та ӧрын туж устоесь Вылын Субаш гуртысь фольклор коллектив. Татын соос кык пӧртэм луо: егитъёслэн но арлыдоослэн. Кивалтӥсьсы — Халиль Фаезов. Крашин калык фольклорез утьыса возе но выльзэ утча. Соос пӧртэм вожвылъяськонъёсын вормись луо, тыршемзы пусйиське ёрос, элькун но кун масштабъёсын.