Хезмәт

Осконъёс бырымтэзы али

Кооператоръёс арлы быдэ июль толэзьлэн кутсконаз кооперацилэсь нуналзэ пусйыса ортчо.

Туэ та тодмо даталы 92 ар тырме. Та праздникен валче 150-лэсь уно адямилы уж сётӥсь районысь потребительёслэн обществозылэн кивалтӥсеныз Хайретдин Шайхетдиновен вераськи.

- Районысь кооператоръёслэн кивалтӥсьсы луыса ужаны кутскемдылы одӥг ар но ӝыны гинэ луиз ке но, та удысын выль адями ӧвӧл шуыса тодӥсько.

- Обществолэн Ципьяысь объединениезлэн коллективеныз дасо аръёс кивалтӥ. Ушъяськон медаз шуэ, выльдӥськон вакытэ но ышыса ӧм кыле. Ципьяын али но магазинъёслэн сетьсы луэм кужмо коллективлэн ужамаз со дырысь ужлэн но бервылыз вань. Районэ ӧтемзылэн мугез но тӥни сыӵе коллектив люканы быгатон луиз, лэся. Ципьяысь вузкарон объединениын туннэ 13 магазин ужа. Югдурзэс асьсэлэсь но юаськод, оло?

- Объединениын кема аръёс ӵоже ужась, опытэн бухгалтерен Райфа Рахимоваен вераськи.

- Пайдаез ӧвӧл шуыса, ужбергатӥсьёс палэнтӥ ортчем пичи гуртъёсын милям магазинъёсмы ужало. Вагон пуктыса туэ Сизнерын но магазин усьтӥмы. Таисия Вятчиналэн ужез калыклы кельше. Улисьялын 1971-тӥ арысен вузкарись луыса ужам Ананий Кузьмин аслаз интыяз Марина Даниловаез дасям. Сырьяын Светлана Андреева Вукогуртысен лыктыса ужаз. Табере Вукогуртын вузкаре, нош Сырьяысь магазинэ та гуртысь нылъёсты Неля Давыдоваен Татьяна Камашеваез дышетыса кельтӥз. Тагашурысь Татьяна Зубарева, нунал потэм Куремьялысен лыктыса Пижмара магазинын вузкарись Маргарита Галлямова, Нуринер магазинын ужасьёс Залия Гарипова, Фарида Габделхакова, Гульнур Мухамметзянова, огъя вераса, вузкарисьёсмес котькудзэс басьтӥд ке но, ужзы калыклы кельше, тау карон кылъёс трос кылӥськомы. Нуринерысь вузкарисьёс гурт калыклэсь йӧл люканэз но умой быдэсъяло. Ципьяысь магазинын вузкарисьёс Фаузия Ахмадиева, Людмила Гарифуллина, товаровед Эндже Зарипова, 32 ар ужам стажез луэм бухгалтермы Резеда Мингазева, огъя вераса, объединениын ужлэн умой мынэмаз котькудӥзлэн люкетэз вань.

- Кооперациын доходъёс огъя ужлэсь люкасько, дыр, ини, - шуыса выльысь Хайретдин Шайхетдиновлы вазиськи.

- Бен, потребительёслэн «Нянь» обществозылэсь пырем люкет нимаз ик бадӟым. Татын сутка ӵоже шуымон куинь цех ужа. Нянь пыжон цехысь производствоя заведующиез Гульсина Мухаммадиеваез, колбаса лэсьтон цехысь Сария Хузинаез, алкогольтэк юонъёс поттон цехысь Раушания Хакимоваез оскымон ужасьёс шуыса тодӥсько. Соос сярысь но «Нянь» обществоын куамын арлэсь кема бухгалтер луыса ужась Василя Абдуллиналэсь юаломе ай.

Василя обществолэн пыкетэз луэм нянь пыжисьёс сярысь вераз.

- Кык сменаын 9 мурт нянь пыже. Калыклы ӵукна пӧсь нянь вуттон понна уйин ужало. Нурфия Гиматова, Гульшат Гиззатуллина, Юлия Иванова, Альфия Зарипова, Фарида Саетбатталова кадь нянь пыжонысь устоос тыршо татын. Фаридаез кемалась ӧвӧл быдэс коллективен 50 аресъем юбилееныз ӟечкыламы. Дась нянез вузаны кык Алсуос - Салихова но Бурханова - пыр-поч эскерыса потто. Нош гурысь нянез операторъёс Рифат Хабибуллин, Радик Назипов синйылтыса уло. Цехын луэм порядок, чылкытлык - Гульнара Авзаловалэн, Сария Сабировалэн тыршемзылэн бервылзы. Ми нянь гинэ ӧвӧл, даслэсь трос пӧртэм пыжиськем сиёнъёс но ӵектӥськом. Нош колбаса лэсьтон цехын Сария Хузинаен Дамира Асадуллина кыкназы дас мында пӧртэм продукция дасяло. Раушания Хакимовалэн, Райса Зариповалэн, Танзиля Хайруллиналэн, Ильсияр Зариповалэн алкогольтэк юонъёс, кондитерской сиёнъёс поттонын опытсы бадӟым. Продукциез интыянэн производствоя комбинат выре. Татын товаровед Суфия Гарафиева тыршыса ужа. Асьмелэн кык магазинамы вузкарись Зульфира Гимадиевалэн, Кадрия Хасановалэн ужамзылы калык ялан тау каре.

Вераськонэ Хайретдин Шайхетдинов пыриськиз.

- Таӵе тау карон кылъёсты «Чай юртын», столовойын ужасьёслы ӵемысь верало. Районын кыӵе гинэ ужрад уг ортчытӥськы, кыӵе гинэ делегация уг лыкты, соос ӝог дыре ӝӧк дасяло. Сабантуйёсын гинэ но 500 сюрс манет тыр услугаос возьматӥзы. «Чай юртлэн» цехезлэн заведующиезлы Резаля Аскаровалы, отысь вузкарисьёслы Раушания Гайфуллиналы, Фатима Муллагалиевалы, Балтась столовойын Лидия Гибадуллиналэн кивалтэмез улсын ужам пӧрасьёслэн, пыжиськисьёслэн коллективъёссылы, асьсэлэсь ческыт сиёнъёссэс калыклы ӵектыны быгатэмзы понна, тау каронлэсь но бадӟым кыл ӧвӧл, дыр. Туэ Сабантуйёслэн бервылзы коллектив понна туж азинлыко луиз. Кудӟытӥсь юонъёс ӧз вузаське ке но, 2 миллион 500 сюрс манет тыр вузкарыны быгатӥмы, кылем арен ӵошатоно ке, шӧдскымон трос та. Быдэс коллективез кооператоръёслэн нуналэнызы ӟечкыласько, семьяязы шудбур, тазалык сӥзисько. Калык понна быдэстэм ужъёстылэсь умой палзэ гинэ адӟыны мед кылдоз.

- Озьы мед луоз. Нош та понна районысь потребительёслэн обществозылэн азьпалыз но луыны кулэ ук.

- Со вань. Пӧртэм тыриськонъёсмы трос луизы ке но, каллен кулэстӥськом. Районэн кивалтӥсьёс но юртто. Бюджетной организациослы (школа, нылпи сад) продукция понна уксёзэс милемлы выжтэмзы бадӟым утон луиз. Пӧртэм лизингъёсы, программаосы, выставкаосы пыриськыса но пайда пыртӥськомы. Универсиадаын ужаса, 860 сюрс манет тыр оборудование басьтӥмы. Милесьтым дасям продукцимес Москваын, кунгож сьӧрын ортчылӥсь адӟытонъёсы но юаса басьтыло. Республикаысь кивалтӥсьёслэн юрттэменызы, пичи гуртъёсы вузкарыны ветлон понна нимысьтыз кык машина бертӥз. Одӥгез - Ципьяе, мукетыз - Балтасе. Фаниль Гибадуллин, Василий Чупашев кадь шофёръёсмы ини, асьмеос иземысь султытозь, гурт калыклы пӧсь нянь вайыса вутто. Базаез паськытатон ужпум но саклык висъян улсын. Балтасьысь столовойлы капитальной ремонт ортчытомы. «Чай юртлэсь» пушсэ выльдомы, Ципьяысь универмаглэсь липетсэ воштӥмы, табере кыкетӥ этажзэ базар понна дасяськомы. «Нянь» цехе выль оборудованиос бертыса уло. Азьланезлы оскон вань. Кооперация улоз али.

- Вераськемды понна тау.

Реклама
Нравится
Поделиться:
Реклама
Комментарии (0)
Осталось символов: