Озьы ортчыло вал…

Егит пилы 17-20 арес тырме ке, анай-атайёс ас пизылы кышно ваён сярысь сюлмаськыны кутско ни.

Пиосмуртъёс, «анаедлы юрттӥсь ваёно ни вал» шуыса, кыл потто. Егит пи вераны быгатэ аслэсьтыз мылкыдзэ. Вашкала дыръя уг но юало вал, кельше-а, уг-а синйылтэм нылзы.

Озьы кенешемзы бере, анай пиезлэн киросатаеныз ӵош дасясько ныл кураны мыныны. Ныл кураны кык-куинь кузя гинэ мыно, уйшор бере. Ныл мукет гуртын ке улэ, вазьгес пото. Туж чаклало вал: сюрес вылысен урод синмо муртэн, буш ведраен адямиен медаз пумиське. Бусыез яке тэлез ортчыкузы эскеро: азьзэс писэй, луд кеч, ӟичы яке коньы медаз басьты. Шумотэ, озьы ик дӧдьы куштон нуналэ, сюрес вылэ уг пото вал.

Ныл кураны дасяськем муртъёс люкасько егит пилэн корказ. Анай мурт ӝӧк вылэ тӧдьы ӝӧккышет вӧлдэ, отчы колды нянь но пурт понэ, вӧй но сылал пуктэ. Ныл кураны вырӟыны дасяськемъёс со вӧйын нянез веръяло.

Анай вӧсяське: «Осто, Инмаре, шудо сюрестэ сёт! Малпам ужмес быдэстыны юртты. Вӧй вылтӥ ветлыса, шудо выль кенэн-кенакен мед бертомы». Собере ӝӧк пуме вина веръяса пуктэ: «Анай-атайёс, пересьёс, азяды мед усёз. Милесьтым ӟеч малпанмес быдэстыны юрттэ».

Ваньзы вӧсям винаез веръяло. Анай мурт сьӧраз басьтэ ныртамак, одӥг бутылка вина, азвесь уксё. Капкаез кузё усьтэ. Ныл кураны мынӥсьёс дӧдьые пуксё. Капкатӥ потыкузы вӧсясько: «Шудо сюрестэ сёт, Инмаре!»

Ныллэн капка дораз вуыса йыгасько. Пырыны одно ик муг утчано. Алдаса ке но, корка пушкы пыроно. Пырем беразы нырысь ик ныртамак зынъяны кутско. Кузёосын вераськон мыто: тазалыксы сярысь юало, берло иворъёсты верало. Собере кутско ни:

— Тӥляд вузано ветылды вань, шуо.

— Кыӵе ветыл? Милям кылдэмез но ӧвӧл.

— Милям — эмеспи, тӥляд — выль кен.

Кузёос нылынызы кенешо. Соиз соглаш ке, ныртамаксэс зынъяло. Кузё кышно, пилэн анай муртэз сямен ик, ӝӧк вылэ тӧдьы ӝӧккышет вӧлдэ, колды нянь понэ, вӧй пуктэ. Анай мурт ваем виназэ вӧсяськыса секта. Ныл курасьёсты ӝӧк сьӧры ӧтё. Пиен ныл сэргы пуксьыса кенешо. Тупало ке, ӝӧк вылэ пуктэм вӧйын нянез веръяло. Нырысь ик анай-атай веръя, собере ини лыктэм муртъёслы сёто. Нылзэс люгезяса кельто вал: пилэн анаез сьӧраз ваем уксёзэ поттэ, ӝӧк вылысь вӧй вылэ бышкалтэ но таӵе кылъёс вера: «Осто, Инмаре! Ӟеч кылдэм нылпи мед луоз. Шудо нылпи мед луоз. Милемыз утись мед луоз. Осто, Инмаре!»

Сюан ортчытон сярысь но татын ик кельшо. Одӥг гуртысь ке, нылэз сьӧразы басьто вал. Нош азьло дыръя сюан ортчем бере гинэ нуо вал.

Сюан ортче ныл дорын. Сюанлы тыршо ини ӝӧк вылэз чебер, узыр карыны, дасяло вал пельнянь, мильым, курегпуз пуштэм, сӥлен шыд, вӧйын картошка (баранги), чорыг, сылалтэм кубиста, сылалтэм губи, кияр, шу кисаль, чырс кисаль, чай, му (чечы), вӧй, конфетъёс, пряникъёс, варенняос, улмо но мукет.

Ог 4-5 нунал азьло, сюанэ мыныны ӧтьыса котькудӥз доры нимаз пырало но ивор сёто. Мынон нуналэ но тодазы вайыто на.

Сюанчиос люкасько пилэн корказ. Соос ваньзы кузьым нуо. Котькудӥз сюанчи сьӧраз басьтэ кузьым: басма яке вурем арбери, бискыли пыжыса нуо, одно ик колды нянь. Сюанлэсь азьло кузё кышно кенеше, кин луоз тӧр кышно. Тӧр луон пунэмо луэ.

Сюанэ мыныны потэмлэсь азьло ӝӧккышет вӧлдо. Отчы вӧйын нянь поно, ӝук пукто, пумаз — стаканэн вина. Вань сюанчиос вӧйын нянь куртчо, ӝук сиё но ӝӧк пумысь винаез веръяса пото. Котькудӥз сюанэ мынӥсь кисыяз сугон яке кумызь понэ, нылкышноос чыртыязы весьёс тыро, уксё тӥрлыксэс уг вунэто. Ваньмыз со сӧронлэсь, син усёнлэсь утиськон понна. Кузё кышно потыкузы вӧсь кылъёс вера: «Осто, Инмаре, Бадӟым Инмаре! Вӧй вылтӥ мынӥськом, вӧй вылтӥ ик мед бертом».

Та гуртэ ик ке мыноно, пудозэс утялтыса, ӝыт люкасько вал. Нош мукет гуртэ ке — нуназе бере 2-3 часэн.

Азьло дыръя сюанэ валэн ветло вал. Котькуд букое гырлы думо. Нырысетӥяз кузё, кузё кышно но пизы — эмеспи пуксё. Дӧдьыязы ӝуткаса куэм гын вӧлдо, миндэр поно. Кыкетӥ дӧдьын пи ласянь тӧро мынэ. Бӧрсязы — сюанчиос, котькудӥз асьсэ валэн. Кузё ачиз капказэ усьтэ, вӧсяське. Корка кин ке но возьмаськись кыле.

Выль кенлэн корка дораз вуыса, капка шоры учко. Капка вӧл-вӧл усьтэмын луыны кулэ. Сюанчиосты нырысь ик пумита выль кенлэн атаез. Со ваньмызлы кизэ сётъя, ӟеч кыл вера, кызьы вуэмзы сярысь юа, ваньзэсты корка пырыны куре.

Туала арын сюан мукет сяменгес ортче ини. Кылсярысь, сюанэ лыктӥсьёс азьын капкаез пунняло (ворсало) но пырыны уг лэзё. Нырысь ик уксё тырыны косо, кабак вина сектало, вӧйын нянь веръято, собере гинэ пырто. Соин ик сюанчиос сьӧразы уксё басьто на. Ӝӧк сьӧры пуксем бере пуньы понна но уксё тырыны косо.

Эмеспи корка сюанчиосын ӵош пыре, нош ӝӧк сьӧры уг пуксьы. Сюанэ лыктэмъёс (соос азьло ог 15-20 кузя луо вал) нырысь ик кузёосын тодматско, собере гинэ ӝӧк сьӧры пуксё. Тӧр шоры пукто эмеспилэсь анайзэ, атайзэ, киросанайзэ, киросатайзэ. Укно доры пуксё вал нылкышноос, нош соослы пумит — пиосмуртъёс. Ваньзы соос удмурт дӥсен дӥсяськемын луо вал. Пуксемзы бере вӧй веръяло. Саламъёссэс тыро ӝӧк пуме, «шудо-буро мед луоз басьтоно кенмы» шуыса.

Собере сюанчиосты кунояны кутско. Котькудзэс шунды бергамъя кабак винаен сектало. Нырысетӥ чаркаез быдтыса юыны косо. Соку гинэ котькуд сюанчилы нимаз чарка пукто.

Сиськемзы бере тӧроез вайыны косо. Эмеспилэн анаез тӧроез ӧтьыны асьсэ бӧлякысь ик кинэ ке но ыстэ. Тӧроез ӧтьыны миндэр куто, сьӧразы одӥг бутылка вина басьто. Собере, валэ пуксьыса, соос мыно ини вайыны.

Тӧр кышно лыктэ картэныз. Ваньмыныз ӟечбуръяське, шуныт кылъёс вера, вань мылкыдзэ сётыса, сюанчиослэсь виназэс но веръя. Солы ас люкетсэс нылкышноос сёто, картэзлы — пиосмуртъёс. Собере тӧролэсь кырӟан курыны кутско. Тӧро но выль кен ласянь вань калык кырӟаны кутско. Соос нырысь пӧртэм гурен кырӟало: лекрут сямен, пересь зоутэн. Сюанчиос шуо: «Таиз милям зоутмы ӧвӧл!» Куинетӥяз гинэ тӧро кырӟаны кутске сюан сямен. Тае кылыса, вань сюанчиос султо но ӵош кырӟаны кутско:

Осто гинэ, Инмаре,

                 Бадӟым Инмаре!

Вылӥсь гинэ Инмармес

     йыр йыламы ӝутомы,

Сизьымдон но дышмонэз

              пыд уламы лёгомы.

Кырӟало мукет кырӟанъёс но. Данъяло кудо-туклячизэс, басьтоно кензэс. Егит кузпалъёслы сӥзё шудо-буро улон но юн тазалык. Собере сюанчиосты коркась корка нуллыса кунояло. Кырӟало сюан гурен. Экто. Шулдыръясько. Мукет корка сюанчиосты ӧте тӧр кышно. Кытчы мыныны со гинэ тодэ вал. Ваньмыз солэсь кылзӥсько.

Азьло дыръя сюанчиосты куинь нунал кунояло вал. Котькуд ӵукна соосты табанен сюдо. Собере юмшаны потто. Куд-ог дыръя одӥг корка кык пол но пырало вылэм. Пӧлазы кияз урысэн нимаз адями ветлэм. Кин уг кырӟа, кин бере кыле, соослы йӧтэ вал. Нышыраны сюанчиос нош ик кунокуае берто. Изьыны но кунокуаын ик изё. Кузё кышно куноя винаен, чаен, перемечъёсын, пельнянен, мильымен.

Куинетӥ нуналаз выль кенэз дӥсято (мукет коркан) кашамер дэремен, айшетэн, пыдаз укмысо кут кутчато, йыраз буртчин кышет кертто. Собере со эмеспиен ӵош сюанчиос доры потэ. Аслаз анаез солы черыкен вина сётэ. Со черык винаен ныл аслэсьтыз бӧлякъёссэ секта.

Кузё кышно вань сюанчиосты ӝӧк сьӧры пуктэ, ваньмызлы соослы чук тыре. Кышномуртъёслы — кышет, басма, нош воргоронъёслы — бамкышет. Йырдун но ужам понназ дун куре. Выль кенлэн киросатаез но солэн эшъёсыз сандык потто. Ныл люкиське анаеныз, атаеныз, эшъёсыныз, бӧлякъёсыныз. Сое коркась кунултыса поттэ эмеспилэн анаез. Вань сюанчиос сиё войын нянь. Кузё кышно сюанчиослэн вал букоосазы чалма думе. Нош кузё сюанчиосты обросэн котыртэ, таӵе кылъёс вера: «Осто, Инмаре! Ӟеч мед бертозы. Инмаре, эн сёты ведӥнъёслы. Палэнты! Бур пал сюресад пырты».

Кыткем валъёс азьтӥ котырске. Сюанчиос валъёсазы пуксё. Вӧсяськыса бертыны вырӟо.

Доразы бертыса, атай капказэ вӧлак усьтэ. Анай мурт выль кенэз бур палтӥз кунылтыса пыртэ. Ӧс куспы кыз лыс вӧлдо вал, корка выж вылэ — дэра. Выль кенэз вӧсяськыса кышно пала миндэр вылэ бадӟым ӟус вылэ пукто. Миндэр вылын бамкышет вӧлдэмын луэ. Выль кенэн артэ выль кен возьмась (свидетельница), бӧлякысь ик пинал ныл пуксе. Выль кенлэн ныркышетаз кутӥськыса, соос ӵош гинэ ветло вал.

Корка пырем беразы выль кен сандыкезлэсь усьтонзэ анай муртлы сётэ. Анай нош сое сётыны быгатэ матысь муртэзлы. Со сандыкез усьтэ. Сандыклэн вылӥяз усьтӥсьлы кузьым дасямын луэ: яке дэрем, яке кышет, яке басма. Вань дӥсьсэ корка пушкы гозы кыскыса ошыло вал. Гурт калык дӥсьсэ адӟыны нимаз лыктэ. Бӧлякысь егит нылъёс выль кенлэсь самой-самой чебер кышетсэ арнялэсь кема нулло, пе, вал. Кышетсэ берыкто саламен ӵош. Ӝыт выль кенэз но эмеспиез кеносэ ӵогало. Егитъёс ортчыто «пельнянь вӧсян».

Ӵукна кеносэз усьто. Бӧлякъёс нош ик эмеспи доры люкасько. Нырысь ик выль кенэз дӥсято. Выль кенэз дӥсятыны юрттэ возьмаськись. Нырысь ик дӥсяно бурлатшорт дэрем, собере йыраз айшон изьыяло, йыркерттэт думо, сатин кышет кертто. Дӥсятэмзы бере, выль кен пылатыны мыно. Азьпалазы — ведраосын но карнанэн эмеспиен выль кен, сьӧразы — возьмаськись, берло бӧлякъёс мыно. Ву омыртыкуз, выль кенлэсь сӧзулзэ коттыны тыршо. Вуэ уксё куяло. Со куям уксёез нылпиос бичаны кутско. Ваем вуэз сюмыке поно. Кылеменыз ӝук пӧзьто. Выль кен аслаз возьмасеныз ваем вуэз калыклы пыдесъяськыса сектало. Юэм понназы соослы уксё тыро.  Выль кен кияз ныркышет вӧлдэ но сётъям уксёзэс, отчы бинялтыса, кисыяз понэ. Ваем вуэн нырысь ик сектало анайзэс но атайзэс. Собере, шунды ӝужанъя — вань лыктэм калыкез. Кылем вуэнызы адямиосты пазяло.

Улыса-вылыса кен пылатонын но воштӥськонъёс луизы. Тани выль кен пылатӥсьёс, выль кен ву омыртыку, ведраосаз пӧртэм жуг-жаг куяло. Ву омыртэм бераз вань лыктэм калыкез вуэн пазяны кутско. Вераны кулэ созэ но: выль кен пылатонэ пӧртмаськисьёс мактал дӥсясько, ымныръёссэс гинэ уг вато. Сьӧразы басьто веник. Веникен кошкись муртъёсты пазяло.

Сюанлэн кыкетӥ люкетэз нимаське ярашон. Сюанэ табере лыктэ выль кенлэн бӧлякез. Соос озьы ик валъёсын, гырлыосын, уксё тӥрлыкъёсын.

Озьы ик усьтэм капка азьын эмеспилэн анаез но атаез пумитало. Соос сюанчиослы мылкыд сётыны кулэ. Озьы ик нырысь вӧй веръяло, собере ӝӧк сьӧры пуксё. Сиськемзы бере тӧр кышноез куро. Сое нош ик, сояз сюанын сямен, миндэр вылэ пуктыса ваё. Тӧролэсь кырӟан куро. Ярашонлэн аслаз гурез. Вань кырӟанъёс, веранъёс ярашон гурен луо. Сюанчиос шулдыръясько, экто. Собере сюанчиосты дораз ӧте тӧро. Тӧры дорысь сюанчиос бӧляке пото. Соосты коркась корка нуллэ тӧро ик. Уйзэ изьыны ярашонэ лыктэмъёс кунокуазы берто.

Удмуртъёслэн вань куно изьытон сямзы (куноосты но сюанчиосты одӥг кадь изьыто). Нырысь ик артана писъёс пырто. Соос вылэ валес вӧлдо. Отчы артысь артэ сюанчиосты выдто. Ымазы чурок поно, со чуроке вина кисьто. Сюанчиосты изьыны лэзё чурокысь винаез юэм беразы гинэ.

Вазь ӵукна ик бӧлякысь шаплы кышномурт сюанчиосты сайкатыны лыктэ. Изисьёсты серекъян понна суэн буяло. Мисьтӥськемзы бере табанен сюдо, чай, вина сектало. Нуназе сиськыны кунокуае берто. Озьы куинь нунал но куинь уй ӵоже куноясько.

Ярашонын вань на бекче курон. Сюанчиос кырӟало:

Тэтчалом но, ой, чигтылом 

                 выж но сайгактэс,

Ӝутылом но, ой, поттылом 

            пурысьтам но бекчедэс.

Пурысьтым но, ой, бекчеды

                 жаль ке но, ой, потэ,

Эн басьтэ вал, ой,

        милесьтым, ой, нылмес.

Куноосты келяло ӝытазе. Кунокуа сюанчиослы чук тыре. Вань бӧлякен келяло. Кузё обросэн котыртэ, ваньмыныз люкиське, шудо сюрес сӥзьыса.

Выль кенэз, кӧня ке улэм бераз, дораз лэзё. Та сям «берен пуксён» нимаське. Выль кен дораз черсэ, вуриське, куиське: анайзылы, атайзылы но картэзлы кузьымъёс дася. Ог кык арня улэм бераз, ужам ужзэ нуыны картэз лыктэ. Эмеспи сьӧры пирдан но лэзё вал: ыж но ыжпи. Тылобурдо нырысь уг сёто. Доразы пирданэн ке берто, пирданзэс нырысь выжы-кума доры корказы пыртало. Ыжпилы нянь, кеньыр сюдо. Собере ини доразы мыно. Нош ик, «сюдӥсь, дӥсясь мед луоз» шуыса, кеньыр, нянь сёто. Собере гидэ лэзё.

Вань на саламаськон сям. Эмеспиез адӟыны куное ӧтё. Куноям беразы, келякузы салам лэзё вал: дӥсь, тулуп, шуба, валес. Соку ик пирдан но лэзё.

2-3 ар улэмзы бере, нылзылы лэзё вал кунян. Озьы сюан йылпумъяське.

Улын Ушма гуртысь Елизавета Ивановна Васильевалэн мадемез, гожтыса басьтӥз Надежда Васильева.

(«Азьлане», №23, 1998 ар)

Фото: Яким Сапожников