Хезмәт

Пакет басьтӥськод-а, «отказ» гожтӥськод-а?

2014-тӥ арлы районын 4920 инвалид лыдъяське.

Соослэн 3664-ез (74,8 %) - социальной пакетлэсь палэнскыса, уксёен компенсация, 1256-ез (25,2 %) - рецептэн дунтэк эмъюм басьтӥсьёс.
Социальной пакет куинь люкетлэсь сылэ (ваньмыз но дунтэк):
1. Эмъюм басьтон.
2. Санаторийёсы путёвка.
3. Городской но пригородной транспортын ветлон.
Инвалид 2015-тӥ арын социальной пакетлэсь пайдаяськыны мылкыд каре вылэм, 2014-тӥ арын 1-тӥ октябрёзь районысь Пенсиосъя фондэ лыктыса заявление гожтыны кулэ (2014-тӥ арын социальной пакет басьтӥсьёслы выльысь заявление гожтоно ӧвӧл). Инвалид 2015-тӥ арлы социальной пакетлэсь палэнскыны мылкыд каре вылэм, озьы ик Пенсиосъя фондэ «отказ» карыса заявление гожтыны быгатэ.
Социальной пакетлэсь палэнскытозь нырысь пыр-поч малпаськыны кенеш сётӥськомы. Малы ке шуоно адямилы инвалидность висёнэзъя сётӥське. Нош висись мурт эмъюмтэк улыны уг быгаты. Тужгес но сакыр диабетэн, бронхиальной астмаен, лек пыктосэн висисьёс, психиказы лябӟем адямиос. Та категориысь висёнъёсты эмъян понна кутӥськись эмъюмъёслэн тужгес дуноосыз: 3-5 сюрс манетысен кутскыса 350-400 сюрс манетозь сыло (та али ӝыны арлы гинэ).
Ортчем аръёслэн опытысьтыз адскемъя, социальной пакетлэсь «отказ» гожтэм инвалидъёслэн висёнъёссы кужмояса яке мукет висёнъёс кылдыса, туж дуно эмъюмъёс кулэ луэм учыръёс трос. Кылсярысь: висись лейкоз висёнэн учётын сылэ, 1-тӥ группаысь инвалид. Висёнэз шӧдытымтэысь, дуно эмъюмъёсын пайдаяськоно луымтэ бере, «отказын» но луэм - 2013-тӥ арын висёнэз кужмояса, 1 толэзьлы 60 сюрс манет тыр эмъюм кулэ луэ. Аптекаын эмъюм луыса но дунтэк рецепт гожтыны ӧз луы, дунэн басьтӥзы. Нош ини 2014-тӥ арлы социальной пакет понна куриськон гожтыса, та инвалид ӝыны арлы рецептэн дунтэк 500 сюрс манетозь эмъюм басьтыны быгатӥз.
Кыкетӥ пример: висись вирзӥбетэн учётын сылэ, 2-тӥ группаысь инвалид. Пекляез ужамысь дугдыса, Шеморданысь искусственной пекляя центре (гемодиализ) арнялы 3 пол ветлыны кулэ, пакетын «отказ» гожтэмын луэм. Нош таӵе висисьёслы озьы ик туж дуно эмъюмъёс кулэ. «Отказэз» воштыны Москвае ик гожтон но пайда ӧз сёты, эмъюмъёсты асьсэос дунэн басьтӥзы. Пеклязы ужамтэысь, гемодиализэ ветлӥсь висисьёслэн лыдзы районын туннэ нуналэ 15 мурт но соослы ваньзылы ик дуно эмъюмъёс дунтэк сётӥсько.
Сакыр диабетэн учётын сылӥсьёс таблеткаослэсь пайдаяськыкузы тросэз «отказ» гожто. Ар ӵоже висисьлэн югдурез огсямен гинэ уг улы, дуно инсулин кулэ луыны быгатэ. Мон та висисьёсын нунал потэм шуымон пумиськисько. Соин ик ужан опытысьтым потыса трос примеръёс вераны луысал. «Отказ» гожтэм висисьёс пӧлын ар ӵоже одӥг толэзьлы 4-5 сюрс манет сылӥсь инсулин дунэн басьтӥсьёс но трос луизы. Нош сакыр диабетэн висисьёслы аптекаын котьку шуымон котькыӵе препаратъёс но вань. Малы ке шуоно сакыр диабетэн висись улытозяз инсулинтэк одӥг нунал но улыны уг быгаты.
Арлыдо инвалидъёслэн нылпиоссы соос понна куриськон гожто, югдурез секыт луиз ке, асьсэлы ик дунэн эмъюм басьтоно луоз. 1 толэзьлы социальной пакетлэн уксёен компенсациез 700 манет мында луэ.
Районын социальной пакетлэсь пайдаяськонъя исполкомысь, Пенсиосъя фондлэн управлениысьтыз, социальной дурбасьтонъя отделысь, тазалыкез утёнъя органъёсысь представительёслэн пыриськеменызы ужась нимысьтыз группа кылдытэмын. Котькуд инвалидэн нимаз уж нуон (вераськон, валэктон) со улэм участок врачъёслы оскемын. Озьы ик районысь Пенсиосъя фонд но центральной больница котькуд «отказникъя» нунал потэм мониторинг нуо. Таос ваньмыз но информация амалэн арнялы быдэ Тазалыкез утёнъя министерствое сётӥсько.
Али 1-тӥ октябрёзь дыр вань. «Сизьым пол мерта, одӥг пол ванды» шуэм веранэз тодэ вайыса, кыӵе ке но решение вуытозь, нош одӥг пол малпаны кенеш сётысалмы. Социальной пакет басьтоно-а, солы «отказ» гожтоно-а?
Чулпан
Мухамметгалиева
центральной больницаысь валтӥсь
врачлэн поликлиникая воштӥсез
Фото: http://www.pfrf.ru/ot_volgrad/pr_releases/7557.html

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: