Пичи контейнерын — бадӟым диван

Пичи жаг куян контейнеръёсты октыса, улон-вылонысь кылем-мылемъёсты котькуд хозяйстволэн капка азьысьтыз графикъя нуллыны кутскемзы бере, урамъёс ӧжытак чылкыт луизы. Нош общественной юртъёс понна кельтэм пичи контейнеръёс вӧзын жуг-жаглэн котьма ке но быдмемез ӧвӧл. Калык ӝожтӥське, ужбергатӥсьёс асьсэ жуг-жагзэс машинаосын вайыса отчы бушато шуыса. Производственной но вузкарон точкаосысь кылем-мылемъёсты куштонэз коммунальной хозяйствоен договор гожтыса радъясалзы ке, таӵе югдур ӧй кылдысал. Тросэз сэрттэм вуж лапас-гидъёссэс, корам писпуоссэс но, бадӟымесь диван-шкафъёссэс но, коммунальной хозяйство куштыны кулэ шуыса, ураме, контейнеръёс доры поттыса поно. Районлэн главаез Рамиль Нутфуллин люкам совещаниын та ужпум ласянь но калык пӧлын валэктон уж нуон уг тырмы шуыса вераз. Таӵе жуг-жагъёсты бускельёсын яке урамен люкаськыса, коммунальной хозяйстволы 600 манет уксё тырыса, нимаз куштыны кулэ ук, эшъёс.

Балтасьысь улон-вылонысь кылем-мылемъёсты куштонэз радъян сярысь вераськон понна ӧтем котькуд кылкутӥсь кивалтӥсьлы районлэн главаез Рамиль Нутфуллин конкретной ужпум пуктӥз. Кылсярысь, коммунальной хозяйстволэн кивалтӥсез Рашит Гарафиев урамъёсы кылем контейнеръёсты Сабантуйёзь нунал куспатыса бушатонэз радъяны кулэ. Бадӟым арбериосты ураме поттӥсьёс ласянь экологъёс ужрад кутозы. Куд-ог адямиос капка азязы борӟетэн чебер ящикъёс лэсьтыса понӥллям. Жуг-жаген пакетъёсты отчы поттыса поно но, отысен соосты нуыса но кошко. Эсьма со пакетъёсты коӵышъёс, пуныос, тылобурдоос но уг пазяло. Ваньмы но тазьы ужасалмы ке, урамъёсамы одӥг жуг-жаг но ӧй луысал.

Туж интыяз но кулэ вераськон луиз та. Табере Балтасьмес районысь котькуд гуртлы адӟем карымон чебер, чылкыт, благоустроить карыны гинэ кыле.