«Пичи вормонысен кутскыса бадӟым вормонъёсы но вутскыны луэ»

ШКОЛА АРЪЁС
— Школаын асме эскери гуманитарной предметъёсъя, пӧртэм конкурсъёсы, конференциосы пыриськи. Вормем но, вормымтэ дыръёсы но луылӥзы. Ворми ке, туж бурдъяськисько вал, нош ӧй ке — азьпалан тыршыны стимул луиз со мон понна. Ачид астэ кияд кутыны быгатоно ук, адямилэсь бере кылёно но ӧвӧл. Озьы, тыршыса дышетскемысь ик, школаез зарни медален йылпумъяй, — шуэ Юля.
Школаын дышетскыкуз ик, Юля кема малпам, кыӵе ӧнеръя дышетсконзэ азьланьтоз шуыса. Но одно ик азьпалан кылъёсын выроз шуыса Юля тодэм — лингвистика ӧр солы кельше вылэм. Школаысен ик со аслыз таӵе курон пуктэм: шедьтоно сыӵе уж, кудӥз солы туж кельшоз но ачиз понна идеальной луоз. Но со вакытэ журналистика удысэ вуоз шуыса ныл чик но малпаськымтэ на. 
ИЖЕВСК, ИЖЕВСК...
Юля школаын дышетскыкуз ик трос гожъяськылӥз ке но, журналистика шоры профессия шоры кадь учкымтэ. Но лингвистической ӧръя дышетскыны пырыны нылашлы кылдымтэ — со вуэм журналистикае. Казане дышетскыны пырыны быгатэм ке но, быръем Ижевскез. Ачиз Юля та сярысь тани мар вераз: «Казань туж матын, соин ик ӵемысь бертылоно луоз шуыса, Ижевске дышетскыны пыроно кари. Куке но ас кожам улоно луоз ук, соин но улон ужпумъёсты сэрттыны-пертчыны аслым дышыны кулэ шуыса малпай. Нош одӥгез муг — Ижевскын дышетскыса универсальной журналист луыса дышетскондэ йылпумъяськод, нош Казаньын ӧнер сюбеггес луэ — тон яке телевидениын, яке радиоын, яке газет-журналын гинэ ужаны быгатӥськод. Со сяна, Удмуртиын ӵыжы-выжыосы но вань, та Ижевске дышетскыны пырон понна нош одӥг амал луиз». Журналистикаын одӥг ар дышетскемез бере, 2-тӥ курсысен кутскыса, Юля переводчиклы но дышетске вылэм. Туэ кыксэ но дышетскон интыоссэ йылпумъя ни со (вань экзаменъёссэ но Юля «5»-лы гинэ сётэ). 
ТЕЛЕВИДЕНИЕ — ГУРТЫН БУДӤСЬ АДЯМИ ПОННА МАЛПАН
1-тӥ курсысен кутскыса Юля кытын гинэ практика ортчымтэ ни — газет-журналын но, ивортодэтъя агентствоын но, телевидениын но. Аслаз верамезъя, тужгес солы телевидениын кельшем. «Журналын троссэ лулчеберет удысын вырисько, дано артистъёс, суредаськисьёс сярысь гожъясько вал ке, телевидениын (Юля али ВГТРК «ГТРК» Удмуртия»-ын ужа — Н. Ж.) — воксё мукет улон. Отын ужаса тон тодӥськод но валаськод, кыӵе шуг-секытъёсын улэ калык, кыӵе солэн сюлмаськонъёсыз но шумпотонъёсыз. Отын тон тодымтэзэ но тодӥськод», — вера Юля. Телевидениын ужа ке но, быгатонлыкъёссэ ыштонтэм вылысь, шер ке но, Ижевскысь журналъёсын али но печатласькыны тырше студентка. Но сюлмаз солэн — телевидение (ГТРК-ын ужаны кутскем бераз гинэ телевизорысен «Вести» кадь передачаосты учкыны кутскем). Магистратурае дышетскыны пырыны малпаз ке, режиссураез бырйыны малпанэз вань вылэм Юлялэн. 
Интервьюез пыр-поч газетмылэн 24-тӥ номерысьтыз лыдӟыны быгатоды.