Хезмәт

Покчи Лӧзяын Ымусьтонэз пусйизы (+фото)

7 толшоре вань православнойёс пусйизы Ымусьтон праздникез.

Малпасько, котькуд оскись семьяын сӥлы каро, дыр, Иисус Христос вордӥськон нуналэз. Визь дыр йылпумъяське, котькуд коркан кузёкышноос ческыт сиёнъёс дасяло, куноосты ӧтчало, матысь адямиос ог-огзэс кузьымъёсын шумпотто. Со сяна, куд-ог гуртъёсын, Иисус Христослэсь вордӥськемзэ данъяса, концерт возьмато, Ымусьтон ёлка ортчыто. Та чебер сямлы пӧрмиз ини. Туэ но Покчи Лӧзя, Ципья но Ӟаны гуртъёсын сыӵе шулдыр ужрадъёс радъямын вал.

Покчи Лӧзя культура юртын ортчись Ымусьтон ёлкае калык трос люкаськем вал. Нырысь ик Покчи Лӧзя шоръёзо школаын пӧртэм классъёсын дышетскись пиналъёслэн но черкысь Воскресной школае ветлӥсь нылпиослэн тыршеменызы возьматэмын вал Иисус Христослэн вордӥськемезлы сӥзем сценка. Собере кутскизы ёлка котырын шулдыр кырӟанъёсын но эктонъёсын, кылбур веранъёсын но конкурсъёсын полэстӥськыса мынэм шулдыръяськонъёс. Таин валче пусйыны кулэ Покчи Лӧзя школаысь педагог-организаторлэсь Галина Петровалэсь но Воскресной школалэсь ужзэ нуись Екатерина Харламовалэсь мыло-кыдо ужамзэс.

Соослэн тыршемзылы луыса туж шулдыр но со ик дыре мур пуштросъем ужрад пӧрмиз. Тау соослы со понна туж бадӟым! Малпасько, Ымусьтонэз данъянлы сӥзем праздник туэ но сайкыт но чебер тодэ ваёнъёс гинэ кельтӥз, огсыр улонлэсь жадем сюлэмъёсты шунтӥз но выль осконъёсты улӟытыны юрттӥз шуыса.

  

Нравится
Поделиться:
Реклама
Комментарии (0)
Осталось символов: