Расходъёсты кулэстоно

«Татарстан» обществоысь пудо утисьёслэн но музъем ужасьёслэн азьмынӥсьёссылы, юбиляръёслы Таукарон гожтэтъёс, Данъян грамотаос, сертификатъёс сётон «ужъя - дан» шуыса веранэз эшшо одӥг пол юнматӥз. Умой ужасьёсты ар ӵоже но кузьымъёсын пусйылӥллям татын. Тунсыкъяськытон ужрадъёс шуыса, премия но, пудо но сётӥллям. Со сяна, ужасьёс, шутэтскон юртъёсын луыса, тазалыксэс но юнмато. Профсоюз пыр путёвка басьтӥсьёс но вань. Та колхозын егитысен ик куссэс тӥяса, тыршыса ужам, продукция поттонэ бадӟым люкет пыртэм ужасьёсты гажан ӧвӧл шат?

Отчёт собраниын толйыны тырмымон фураж, сенаж, турын, куро запас вань шуыса веразы. Та - тулыс кизёнын, октон-калтонын музъем ужасьёслэн лулысь-сюлмысь тыршыса ужамзылэн бервылыз. Собраниын Валентин Яковлевез, Рафаэль Сабирзяновез, Ильгизар Мингазевез, Ришат Саттаровез, Вячеслав Александровез, Дмитрий Ивановез, Фаниль Саляхетдиновез сӥлы каризы. Музъем удысын уж кулэ уровеньын быдэстӥськиз ке но, вань луонлыкъёсын пайдаяськыны быгатымтэзы но азьпалан та ӧрын эшшо но ӟечлыко ужано луэмзы сярысь пусйыса верамын вал.

Техникаез тупатон, эстӥськон понна 2012-тӥ арын сярысь тросгес уксё кутӥськем. Та но малпаськыны инъет кылдытэ. Хозяйстволэн ревизионной комиссиезлэн председателез Ильгиз Юсупов машинно-тракторной паркъёсын, фермаосын учётэ басьтон журналъёсын радлык ӧвӧл шуыса пусйиз. Шонер но дыраз учёт нуись Сардыган ферма та ласянь мукетъёслы пример карыса возьматӥськиз.

Тырмыт пудо сиён луэм бере, йӧл поттонын но азинскон вань. Ужез бервылогес карон, трос йӧл кыскон вылысь, тунсыкъяськытон премиос но радъяллям. Сое куинь толэзь тыриллям ини. Басьтэм вырйылъёсты ыштытэк азинтонэз гинэ вань. Ялан азинсконэ мынон ӧрын выль технологиосын пайдаяськон, обществое специалистъёсты ӧтьыса дышетсконъёс ортчытон но туж кулэ уж. Азинсконэ вутскон понна, фермаосысь заведующийёс, ветврачъёс но пудо утисьёс асьсэ участокъёсазы ужзэс пыр-поч быдэсъяны кулэ шуыса веразы собраниын.

Сӥль продукция поттонлэн кулэсмемез общество понна бадӟым ыштон. Сое будэтон хозяйстволэн кассаяз уксё пыртонын одӥг резерв луэ ук.

«Татарстанъёс», калык азьын отчёт лэсьтыкузы, асьсэлэсь тырмымтэоссэс шара возьматыса, соосты тупатон амалъёсты ӵошен утчазы. Собрание критиковать карон амалэн ортчиз, кивалтӥсьёс янгышъёсты валазы но соосты быдтон сюресъёсты шара утчазы.

Собрание пыриськем муниципальной районлэн главаез Рамиль Рашитович Нутфуллин:

- Производствоын ужазинлык вылӥ луиз ке но, расходъёс бадӟымесь. Соосты кулэстон понна луонлыкъёсты вань. Ужез шонер но кулэ ӧре пыртыса радъяны гинэ кулэ, - шуиз.