«Самой валтӥсез — пересьёслэн таукарем кылъёссы»

Утем со ассэ визьнодан удысын но (Покчи Лӧзя нылпи садын, 1986-1991-тӥ аръёсы), Улын Ушмаысь кирпич заводын но складэн кивалтэм. Кызьы тодаз вае ачиз Маргарита Павловна, солэн малпаназ но луымтэ социальной удысэн улонзэ герӟаны. «Кылдэмзэ адӟоно ини со» шуыса, кирпич заводысь кошке но, соку ик Балтасьысь социальной дурбасьтонъя отделэ ужаны интыяське. Со нуналысен нылкышнолэн улонэз воштӥське.

— Воксё малпамтэ шорысь лыктыса ужаны кутскем интыын ини кызь ар пала ужасько. Ӧй но малпа, сокем аслэсьтым ужме ярато шуыса, сомында ар та удысын ужаны быгато шуыса. Но пересьёслэн верам ӟеч кылъёссы сюлэмез шунто, азьланяз ужаны эшшо но тросгес кужым сёто вылэм. Вӧсяськон книгаын гожтэм, адями нуналлы одӥг пол ке но «тау» шуэм кылэз кылэ ке, солэн трос сьӧлыкъёсыз куштӥсько шуыса. Нош мон нуналаз аслам пересьёсылэсь кӧня таукарон кылъёсты кылӥсько..., — шуэ Маргарита Добромыслова.

Туннэ нуналэ Маргарита Павловна ачиз но пенсиын ини, но озьы ке но ужезлэсь уг куштӥськы али. «Ми ӧм ке ужалэ, кин ужалоз? Мазэ веранэз, егитъёслэн та удысын ужамзы туж уг поты, малы ке шуоно тросэз туала егитъёс капчигес уж утчаны тыршо. Нош озьы уг луы шол. Инмарлы тау, уж вань бере», — вера кышномурт. Пенсиын луэмысьтыз, солэн туннэ Улын Ушмаын, Шор Ушмаын, Балтасьын 4 гинэ утёно пересьёсыз но инвалидъёсыз вань (азьвыл аръёсы тросгес луэм). Нош огъя со 17 адямиен ужам. Соос пӧлын озьы ик луиллям инвалидъёс но, оген улӥсь мӧйы муртъёс но, тылын тыршемъёс но.

2004-тӥ но 2007-тӥ аръёсы Маргарита Добромыслова Балтась районысь администрацилэн Главаезлэн Таукарон гожтэтъёсыныз пусйиськиз. Озьы ик 2013-тӥ арын сое пусйизы Татарстан Республикаысь социальной дурбасьтонъя ужъя но уже интыянъя министерстволэн Данъян грамотаеныз. Нош ачиз Маргарита Павловна ватытэк вера: «Самой валтӥсез — пересьёслэн таукарем кылъёссы. Соос монэ витё, мынэсьтым мӧзмо. Мон соос понна матысь адямизы луисько. Ма, соос но мыным озьы ик. Соин аслэсьтым ужме туж яратӥсько. Ӧй ке яратысал, сомында ар ужаны ӧй быгатысал, дыр...» шуыса вераськонмес Маргарита Павловна йылпумъя — со аслаз пересез доры дыртэ ни...

Тӥ, социальной удысын ужасьёс, мӧйыослы шумпотон, вуоноезлы оскон, кинлы ке — бурмыны оскон кузьмаськоды. Туннэ нуналэ адями умой вала: социальной дурбасьтонъя ёзэт — туж кулэ луись ӧр. Малы ке шуоно мӧйыослы котьку кулэ социальной удысын ужасьёслэн юрттэмзы, утемзы, соос понна сюлмаськемзы. Бен, Тӥ ноку но пересьёстылы ас нылпиоссэс воштыны уд быгатэ, но тӥ оген улӥсь, висись мӧйыослэсь улонзэс ӧжыт ке но капчигес, сайкытгес, пересьмон даурзэс шудогес кариськоды. Со понна тӥледлы туж бадӟым тау!