«Школаез, пиналъёсты мон туж яратӥ!» (фото)
3-тӥ феврале Вуж Кушкет гуртын улӥсь Мартынова Елизавета Фёдоровна 90 аресъем юбилейзэ пусйиз.
Пичиысеныз ик тыршись, ужась луэмысьтыз, школаез йылпумъямез бере ик Елизавета Фёдоровнаез Ципьяысь почта ёзэсэ телеграфистка карыса тодмосто. Кылкутымон ужез пумаз-йылаз вуттыса быдэсъя егит ныл. «Ож дыръя куинь сэрего гожтэтъёс, трос кышкыт иворъёс кутыны, соосты ӝог дыре кулэ интыосы вӧлмытыны кулэ вал. Пӧлазы мукетъёслы вераны ярантэм «военная тайна» шуэмъёсыз но луылӥзы. Секыт вал, туж секыт вал со война аръёс», - тодаз вае Елизавета Фёдоровна.
Со секыт аръёсы тыршемез бервылтэк уг ортчы, сое «Быдӟым Отечественной ож дыръя тыршыса ужамез понна» медален пусъё.
Война йылпумъяськем бере, Елизавета Фёдоровна Шор Кушкет школаын покчи классъёсты дышетыны кутске. Егит дырысьтыз малпанзэ улонэ пыӵатэ - Ижевскысь педагогикая институтэз йылпумъяса, вылӥ тодон-валанэн зэмос педагог луэ. Вуж Кушкет школаын дышетонзэ азинтэ. Отын 1982-тӥ арозь покчи классъёсты дышетыса, дано шутэтсконэ потэ. Али ке но дышетскисьёсызлэн азинсконъёсыныз тунсыкъяськыса, данъяськыса улэ. «Умой очкие луысал ке, туннэ ик нылпиосты дышетыны мынысал, синъёсы гинэ тани ӧжытак лябомизы. Школаез, пиналъёсты туж яратӥ ук мон!» - шуэ вань гумырзэ нылпиослы сӥзем зэмос дышетӥсь. Али озьы гинэ но ӧвӧл, со секыт аръёсы но азьпал улонлэн умой луэмезлы сюлмысен оскем, вылӥ тодон-валан басьтыны луонлык шедьтэм азинлыко дышетӥсь но.
- Кузь гумырлэн секретэз ма бордын? - юасько ветеранлэсь.
- Ялан пыд йылам, тэк пукон дыры воксё ӧй вал, али но ураме потылӥсько, дорысь чыры-пыры ужъёсты быдэсъяны тыршисько, - секретсэ усьтэ ветеран.
1955 арын Быдӟым ожысь ветеранэн Михаил Мартыновен улонзэ герӟа, 4 ныллы улон кузьмало соос. Жаляса верано, Михаил агайлэн улонэз вакчи луэ - со 1977 арын секыт висьыса кулэ. Ираида, Надежда, Татьяна но Светлана нимо нылъёссы туж эшлыко, матын луыса будо. Котькудӥзлэн ас семьяез вань. Туннэ нуналэ ини внукъёссылы шумпотыса уло. Бадӟым нылыз Ираида экологлэн ӧнерезлы дышетскем, Татьяна но Светлана анайзылэсь сюрессэс бырйиллям - покчиёзо классъёсысь пиналъёслы тодон-валан сёто. Жаляса верано, кыкетӥ нылыз Надежда висьыса югыт дуннеен люкиськем.
Елизавета Фёдоровна Вуж Кушкет гуртысь гажано адямиослэн одӥгез. Со 90 аресъем гумыр праздниксэ 8 внукеныз, 12 правнукеныз шумпотыса пумитаз. Ассэ ӟечкыланы лыктэм гажано куноосты но мылысь-кыдысь пумитаз. Юбилярез ӟечкыланы районлэн главаез Рамиль Нутфуллин, районысь социальной дурбасьтонъя отделлэн кивалтӥсез Алсу Гатиятуллина, социальной юрттэт сётонъя отделенилэн кивалтӥсез Аниса Хайруллина, районысь дышетонъя управлениысь Рамзия Хайруллина, Янгул гурт поселениысь Эндже Муллагалиева лыктэмын вал. Соос гажано ветеранэз вордскем нуналэныз сюлмысен ӟечкыласа, чебересь сӥзёнъёссэс, шунытэсь кылъёссэс веразы. Юбилярлы Россилэн Президентэзлэсь В.В. Путинлэсь Ӟечкылан открытказэ но кузьымъёс сётӥзы.
Ясмина ШАМСЕТДИНОВА
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев