Шутэтскон нуналъёс шулдыр ортчизы

Кылсярысь, Бадӟым Лӧзя гуртлэн 1-тӥ люкетаз улӥсь калык клубзы луытэк но 10-тӥ южтолэзе паськыт масштабен праздник радъяса толэз келязы, тулысэз пумитазы. Паськыт масштабен шуэмез юнматоз на ТНВ каналын возьматэм сюжет но (http://tnv.ru/main/katalog/informacionnye/7dney/?idVideo=70655#videoanc). Угось калык шулдыръяськонэз югдытыны шоркарысьтымы съёмочной группа вуылӥз.

Гурт калык керӟегъяськись куазьлэсь но ӧз кышка, шумпотыса шулдыръяськиз та нуналэ. Пӧсь табань, самоварысь ческыт чай, кырӟанъёс-эктонъёс, пӧртэм тунсыко конкурсъёс но шудонъёс – ваньмыз та адямиослэсь мылкыдзэс ӝутӥз, тулыс мылкыд кузьмаз.

Ваньзы но – пичиез но пересез но, егитэз но арлыдоез но - калык шулдыръяськон атмосферае пырыны дыртӥз, мылысь-кыдысь шутэтскыны тыршиз та праздникын. Ма талы паймонэз но ӧвӧл, дыр.  Гурт адямиос мӧзмемын таӵе ужрадъёслэсь. Ку эшшо адӟод на ог-огдэ, ку валче люкаськыса шулдыръяськод!

Люкаськем куноосты шумпоттӥз интыысь «Веретёнце» ӟуч фольклор ансамбль. Соос, пӧртэм кылын кырӟанъёсты быдэстыса, котькуд адямилы матын луизы (Бадӟым Лӧзя гуртын ӟучъёс но, удмуртъёс но, бигеръёс но туж тупаса уло угось). Та ансамбль сярысь нимаз ик верам потэ. Арлы быдэ ортчись Всероссийской «Каравон» фестиваль, интыысь Ымусьтонлы, Вӧй келянлы сӥзем праздникъёс но «Берёзка» шулдыръяськон – таос одӥгез но  «Веретёнце» ансамбльтэк уг ортчо. Кивалтӥсез но адӟем карымон – Анастасия Николаевна Данилова, Балтась ёросысь ӟуч калыклэн НКО-зылэн тӧроез. Одӥгез ласянь гинэ жаляса верано луэ, ансамбльлы репетициос ортчытыны инты ӧвӧл -гуртысь клуб борӟамын. «Репетициосмес дорын ортчытъяны тупа, праздникъёсты но ортчытыны инты ӧвӧл, котькыӵе собраниос но урамын ортчо», - огымысь верало ансамбле ветлӥсь кышномуртъёс.   

Шулдыръяськон, котьку сямен кадь ик, куро мунёез ӝуатонэн но котырскыса кырӟанэн йылпумъяськиз. Тӥни озьы кужмо но шулдыр келязы толэз лӧзяос, кема витем тулыслы сюрес усьтыса.