Шонер-а кырӟа Shoner Paul?

Та егит артистлэсь асьме доры лыктэмзэ туж кема возьмамы вал ини. Концерт радъян пумысен нырысетӥ вераськонъёс потӥзы 2024 арын ик. Но пӧртэм мугъёсын сэрен та малпан кӧнялы ке беромиз (аслэсьтыз самой тупась дырзэ возьмаз, луоз). Интыез но туж тупась луиз, удмурт шӧмен тырмем юртын удмурт кыл но жингресгес чузъяське кадь. 

Ӟаныысь лулчеберетъя юрт, чеберскемез но выльдӥськемез бере, кыӵе гинэ ужрадъёс ӧз ортчыты ни, кыӵе гинэ концертъёс ӧз пуктӥське отын. Фольклор кырӟанъя но эктонъя «Айкай» кун театр но шулдыртӥз калыкез та сцена вылын, интыысь калык ансамбль, самодеятельной артистъёс но трос пол пӧртэм тематической ужрадъёс радъязы. Удмурт лулчеберетэз утёнъя ужъёс нуисько шуыса туж шумпотымон. 

Туала тодмотэм артистъёс вуыку, котьку кышканъёс кылдо: люкаськоз меда калык? Ведь котькуд адямилы егит артистъёслэн творчествозы сюлэмзыя уг луы. Но та ӝытэ вань люкаськем калык одӥг тулкымын вал: самой пичиосыз но, мӧйыосыз но. 
Озьыен, кин уг на тоды, тодматске — Павел Андреевич Александров, яке Shoner Paul — Бавлы ёросын вордӥськем егит удмурт кырӟась. Ачиз верамъя, солэн крезьгурен улонзэ герӟаны малпанъёсыз но ӧй вал, со котьку малпа вал суредаськись луыны. Но, озьы кылдэмын вал, дыр, кырӟанъёс но крезьгуръёс солэн сюлэмаз туж юн кырмиськизы.

Крезьгурен кусып возьыны но капчиен ӧз сётӥськы. Альметьевскын дышетскыкуз, солы уг тырмы вал удмурт шӧм, удмурт адямиос. Озьы со вуиз калык кырӟанъёс доры, кудъёсысьтыз мур малпаськонъёс, трос визь-кенешъёс, быронтэм калык индылонъёс шедьтӥз. 

Табере выжомы ини концертэ. Кызьы со радъяськиз, кызьы ортчиз но кыӵе малпанъёсы вуизы учкисьёс но ачиз артист. Тросэз, со эмоциосын, малпанъёсын мерлыко вотэсъёссы пыр люкиськыны быгатӥзы ини. 

Концертэз пуштросэзъя но радъяськемезъя кык люкетлы висъяны луэ.

Нырысетӥ люкет 

Концертлэн нырысетӥ ӝыныез сӥземын вал лирической но философской кырӟанъёслы. Йырез мур малпаськытӥсь, пуштросо — соос ваньзы кыӵе ке аспӧртэмлыкоесь. Татын ик туала гожтэм кырӟанъёсыз но луизы, калыкын вӧлмем гуръёс но кылӥськизы, нош Ашальчи Окилэн «Даур» кылбурезъя кылдытэм кырӟанэз нокинэ мылкыдтэм ӧз кельты, луоз. Бен, вераны луэ, котькуд кылбурлы кыӵе ке крезьгур шедьтыны луэ шуыса. Но шуккиськоз меда со кылзӥськисьёслэн сюлэмъёсазы озьы, кызьы со шуккиськиз Павеллэн быдэстэменыз? Тодыны уг луы. Ведь котькуд кылбур аслэсьтыз гурзэ возьма, тупасьсэ, кулэзэ. 

Та люкет зэмзэ но мал-паськытӥсь луиз. Котькуд кырӟан одно ик кырӟанлэн кылдэмез сярысь историен яке ас улонысьтыз историеныз пӧлэстӥськыса мынӥз. Соин концерт эшшо но тунсыко потӥз. Ачиз ик нуись, ачиз ик кырӟась, ачиз ик радъясь, ачиз калыкен интерактив нуись — вань рольёсты сцена вылын Павел ачиз шудӥз. Нош аспӧртэмлыко удмурт шӧмо дӥськутэз концертлы кык полэс шумпотон вайиз.

Мон верасал, таиз люкет адямиослы луонлык сётӥз выль амалэн визьмо малпанъёсын тодматскыны. Шумпотымон, залын егитъёс трос вал, соин концерт удмуртлыкен тунсыкъяськытон пайдаё ужрадлы но пӧрмиз. Егитъёс но пӧсь кичабонъёсын тырмытӥзы залэз. 

Кыкетӥ люкет

Таиз ини воксё интыын пукыны сётӥсьтэм дыр луиз. Нырысь калык кепырасагес пукиз (удмуртъёслэн сыӵе вашкала сямзы ини — возьдаськыса улыны). Но бӧрысь адямиос интыязы пукыны ӧз чидалэ ни. Валяк потӥзы эктыны. Павел но, соослы энергия сётэм кадь, валче эктӥз. Татын чузъяськизы ини мылкыдэз ӝутӥсь но пыдъёсты эктытӥсь кырӟанъёс. 

Шумпотӥсько, ёросысь калыкмы шуныт мылкыдэн, ӝуась синъёсын пумитаз концертлэсь та люкетсэ. Бадӟымъёс вӧзын пичиос но мылкыдъёссэс ӧз ватэ. Огкылысь эктӥзы, шулдыръяськизы, нокин куашкам мылкыдын ӧз кошкы татысь.

Концерт радъянэз зэмзэ но валаса, малпаськыса лэсьтоно. Кырӟанъёсты огшоры быдэстыны луэ, но кызьы сое калыклы тунсыко карыса возьматоно — таиз ини мукет ужпум.

Нош дунъет кылъёсты лыдӟыны быгатоды газетлэн кылем номерысьтыз

Туспуктэм: личной архив