СОВЕТСКОЙ ВОЙСКООСТЫ АФГАНИСТАНЫСЬ ПОТТЭМЛЫ — 25 АР ЖУГИСЬКОНЭЗ СОЛДАТ УГ ЯЛЫ

Афган оже пыриськем 200 мында улосчиосмы но туж трос шуг-секытъёс пыр потӥзы, кӧняез секыт сӧсырмыса кулӥз, нош кӧняез вордскем палъёсаз бертыса югыт дуннеен люкиськиз. Кылсярысь, Арборысь Талгат Гильванов, воинской ужпумзэ быдэстыкуз, герой сямен быре. Нош 119 афганец улосчиосмы туннэ нуналэ, азьпал улон сярысь сюлмаськыса, сӧл-таза уло но ужало.

Туэ соос, арлы быдэ сямен, Афганецъёслэсь нуналзэс сӥлы карыса пусъёзы. Та соослэн огмылкыдо, эшлыко луэмзылэн бервылыз. Азьло юнме раньӟытэмзы, государстволэн сётэм кылзэ быдэстымтэез йыркуръяськытӥз ке но, сюлэмзэс вӧсь кариз ке но, арлы быдэ праздникын пумиськыса вераськонъёс та сюлэм яраосты эмъяны кужым ватсало.

Та оже Кили гуртысь гинэ но куинь пиос пырисько. Туннэ районлэн пӧртэм сэрегъёсаз улӥсь Фирдинант Нафиков, Ильшат Нурмухаметов но Магсумзян Закирзянов та праздникын пумисько. Ӵош ужась эше Ильшат Нурмухаметов сярысь Афганецъёслэн праздниксы матынъяськемлы быдэ гожтыны дасяськи ке но, ялан мукет дырлы кыльыса мынӥз. 2014-тӥ ар Ильшат понна куинь полэс юбилейлэн арез луэ шуыса вунэтытэк, киям ручка кутӥ.

Ильшат Муллахметович Нурмухаметов 1964-тӥ арын 15-тӥ мартэ Кили гуртын вордске. Армилэн радъёсаз 1982-тӥ арын 29-тӥ мартэ басьто. 18 аресъем Ильшат Афганистанэ шедемзэ тодыса но, анай-атаеныз, гуртоосыныз келяськыкуз, соослэсь синкылиоссэс адӟиз ке но, пальпотыса люкиське. Та вакытэ егит пилэн сюлмаз кыӵе мылкыдъёс кузёяськиллям, созэ ачиз гинэ тодэ, дыр.

Ильшат Туркменистанысь Иолотань город дорысь военной полигонын 2 толэзь карантинын луэ. Собере нырысетӥ эскерон ортчем пиосты самолётэн Афганистанэ пырто. Балтасьысен валче кошкем Рамилен, Валераен (вордскем музъемаз бертэмез бере кулэ) одӥг батальонын служить каре со. Ротаоссы гинэ мукет луо. Кык ар ӵоже пустыняын палаткаын уло. Мисьтӥськон сярысь уг вераськы ни, юэм потыку ымдуре йӧттыны одӥг шапык вулы но тэльмыро соос. Котыртэме шедьыны, военной операциосы пыриськыны тупам Ильшат улонысьтыз та шимес вакытсэ тодаз вайыны уг яраты. Юнме шорысь куспетӥ луэм улон, ӧкынымон кулон, матысь эшъёстэ ыштон сярысь вераны капчи ӧвӧл. Нош стрелок-гранатомётчик луыса служить карем Нурмухаметовлэн кулонэн ваче син пумиськем минутъёсыз ӧжыт уг луо. «Сӧл-таза вордскем палъёсам бертыны быгатысал ке, Кили ошмесэ выдыса ик ву юысал», шуэ егит пи. Инмар кылэм, дыр, солэсь та кылъёссэ: Ильшатлы ошмес вуэз юыны шуд усе. Вордскем гуртаз берытскыса, гуртоеныз Альфияен семья кылдытэ. Огез бӧрсьы мукетыз быгатӥсь, тыршись пиоссы вордско. Та - улонэзлэн тужгес шудо дырыз. Туннэ нуналэ Балтасьын улӥсь Ильшат вордскем гуртаз ӵем бертылэ. Бертэмезлы быдэ, 30 ар талэсь азьло армиысь бертэмез бере кадь ик, вузэ ӵоксузьыса юэм ошмесэ ваське. Гумыр шуон, мар куспын ортчем. Ошмес ву выллем жильыртыса, позыръяськыса улонэзлэн 50-тӥ тулысэз но матынъяське ини.

Туннэ нуналэ вордскем гуртаз атай юртаз улӥсь Фирдинант Нафиков Афганистанэ нырысетӥосын луыса пыриськемъёслэн одӥгез. Оло, аслаз огъёзоосыныз ӵош 18 аресэз тырмем бере ик армие кошкысал ке, афган оже ӧй но шедьысал, дыр. Анаез l-тӥ группаысь инвалид луэмысь, армие мынонзэ ӝегато. Соин ик, армие кошкыкуз, Фирдинантлы 20 арес тырмем луэ ини. 1979-тӥ арын декабрьлэн пумаз Татарстанысь военной комиссариатын одӥг уй кӧлэм егит пиосты поездэн Ташкент палъёсы нуо. 6 толэзьем боевой подготовкаез соос 3 толэзь куспын ортчо. Собере соосты Термиз городэ келяло. Отын запасысь солдатъёслэсь жугиськонэ пыроно луэмзы сярысь тодо. Уг кышкало соос, ӝоггес киязы автомат кутэмзы потэ егит пиослэн. Нош отын бадӟымесь ыштонъёс луозы, кулонэн пумиськыны тупалоз шуыса, валаса уг вутто соос.

Нырысь ик Афганистанэ десантникъёс пыро. Соос бере Фирдинант Нафиковлэн служить карем батальонэз гурезьёсы сюрес кутэ. Пырыкузы ик ожмаськон кутске. Нош асьмелэнъёслы ыбылыны приказ уг сёто. Вамышлы быдэ возьмаса улэм кулон, эшъёстэ ыштонлэн кайгу-куректонэз, кӧня ке пол сӧсырмон - та ваньмыз солдатъёслэсь йырсиоссэс дырызлэсь вазь пурысьтатэ. Нош озьы ке но пиослэн мылкыдзы уг куашка. Сюлэм но мугор яраоссы гинэ дыр ортчемъя асьсэды юн шӧдыто.

Фирдинант Нафиковлы но, жугиськонысь сӧл-таза бертыса, семья кылдытыны, нылпи будэтыны шуд усе. Атай юртсэ туала улонлы тупамон карыса выльдыса, азьпал но нылпиосыз сярысь сюлмаськыса, кузпалэзлэсь Наилялэсь, Ильхам пиезлэсь, Фанзиля нылызлэсь, Ильдар эмеспиезлэсь, Ильяс внукезлэсь гажамзэс шӧдыса шудо улэ со. Озьы гинэ мед луоз, чебер пинал дырзэс, тазалыксэс Афган гурезьёс пӧлын ыштэм воргоронъёслы Инмар ӟечлыксэ медаз жаля вал.