Хезмәт

Сталинград ож

1942-тӥ ар. Ноябрь толэзьлэн кутсконэз. Тушмонлэн Сталинград вылэ урдскем вакытэз.

Странамы Быдӟым Октябрь революцилэсь 25 ар тырмонзэ пусъе. Соин валче 1942-тӥ арын 6 ноябре Москваысь Советлэн сӥё-дано заседаниез ортчытӥське. Отын докладэн И.В.Сталин выступить каре.
Исторической докладлэн куд-ог люкетъёсыз:
* «Асьмелэн военной заводъёсмы Горд Армиез орудиосын, миномётъёсын, самолётъёсын, танкъёсын, пулемётъёсын, винтовкаосын, боеприпасъёсын шонер но дыраз обеспечить каро.
* Асьмелэн колхоз-совхозъёсмы но озьы ик шонер но дыраз Горд Армиез сиён-юонэн обеспечить каро.
* Асьмелэн нырысетӥ ужпуммы гитлер государствоез но солэн инъетаз сылӥсьёсты быдтон луэ.
* Асьмелэн кыкетӥ ужпуммы - гитлер армиез но солэсь кивалтӥсьёссэ быдтон.
* Асьмелэн куинетӥ ужпуммы Европаын адӟемпотостэм мылкыд кылдытэм выль порядокез но солы дурбасьтӥсьёсты таркан луэ...»
Та кылъёс - странаен кивалтӥсьлэн вазиськонэз, СССР-лэсь стратегической, военно-политической программаезлэсь инъетсэ возьмато. Странаен кивалтӥсь аслаз выступленияз: «... асьмелэн ноку но али кадь кужмо но организованной тыллэн луэмез ӧй вал» - шуыса, оскыса вера. Оскемез Сталинград ожмаськонын Горд Армилэн историе пырыса кылем вормонэныз юнматӥськиз.
Сталинград ожмаськон, 1942-тӥ арын 17-тӥ июле кутскыса, 200 нуналлэсь кема кыстӥське. 1943-тӥ арын 31-тӥ январе немецъёслэсь Сталинград фронтын кивалтэм главнокомандующийзэс генерал-фельдмаршал Фридрих Паулюсэз пленэ басьто. Январь-февраль толэзьёсы котыртэме шедем немец войскоосты пазьгон понна ожъёс мыно. 300 сюрслэсь уно солдатъёс, офицеръёс но генералъёс пленэ шедё. Та ожмаськонъёсы немецъёслэн - миллионлэсь уно солдатъёс но офицеръёс, 1675 танк, 10 сюрс пушка, 1216 самолёт, нош асьме паласен озьы ик 1 миллионлэсь трос солдат, командир, 15500 пушка но миномёт, 1463 танк, 1350 самолёт пыриськиз. (Лыдпусъёс военной архивысь материалъёсысь басьтэмын).
«Сталинград» кыл тушмонъёсты куалектытӥз, оскисьтэмъёсты малпаськытытӥз, вормисьёслы кужым но мылкыд сётӥз.
Кыкетӥ мировой войнаын Сталинград жугиськон бадӟым инты басьтӥз. Жугиськонын инициативаез СССР, Сталин ас кияз басьтӥз.
Сталинград ожмаськонын вормон, Горд Армиысь боецъёслэн батырлыксылэн, тыллэн организованной луэмезлэн, адямиослэн асьсэды жалятэк тыршемзылэн примерзы луыса, 1941-тӥ арысен 1945-тӥ арозь кыстӥськем Быдӟым Отечественной ожлэн историяз вапумъёс ӵоже возьмаськоз.
Быдӟым Вормонлэсь 70 ар тырмон юбилейзэ пумитаны дасяськемен валче «За оборону Сталинграда» медален пусйиськем улосчиосмылэсь нимъёссэс вераса ортчон интыё луоз, дыр. Тани соослэн куд-огъёсыз: Газим Файзрахманов (Балтась) Дон фронтын Сталинград жугиськонлэн кутсконысеныз пумозяз ожмаськем, Горд Кизили, Горд Знамя, 2-тӥ степенё Отечественной война орденъёсын пусъем офицер. Гринёв Александр Иванович (Улын Ушма), Медведев Николай Ларионович (М.Лызи), Павлов Александр Иванович (Вылын Ушма), Егоров Иван Александрович (Вылын Ушма), Гани Закиров (Балтась), Шариф Мухарлямов (Балтась), Юсуф Набиев (Балтась), Насир Хафизов (Балтась), Гаптелхай Хасанов (Балтась), Нугман Ашрапов (Арбор), Гадельша Зарипов (Арбор), Ахат Гилязев (Янгул), Фарзи Гимадиев (Янгул), Агля Хакимзянов (Кугунур), Уммукамал Шафигуллина (Янгул), Елизавета Алмазова (Большие Лызи 1-тӥ люкет).
Батырлык ноку уг вуны. Сталинград ожысь геройёслэн батырлыксы сярысь тодэ ваёнъёс поколениысен поколение выжыса мед мынозы.
Фото: http://www.logoslovo.ru/forum/all/topic_6588/

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: