Сяськаос, гыльёс но... ӟазегъёс

«Кӧня ар улыса но, Балтасьын улыны ӧм дыше ук ми. Ялан Шудалэсь мӧзмыса улӥмы», - шуо соос. Луонлык кылдэмен, нырысетӥ магазинзэс но Шудаын усьто. Собере ӵыжы-выжыоссылэсь вуж юртсэс дача карыса улыны кутско. Котыр эркын инты, ву... Та Шакирзяновъёсты выль вамыш лэсьтыны «ӝутэ» - соос тросэн ӟазег вордыны кутско. Асьсэос Балтасьын улӥзы ке но, ньыльдон иськем кусып соослы люкетыны уг быгаты. Ѓазег вордон капчи гинэ уг мыны. «Нырысетӥ араз сюрс ӟазегпилэн 300-эз кулӥз, - шуэ Фирдания. - Со аре прибыль сярысь малпано ӧз луы ини...» Тросэз та бере, луыса потоно уж ӧвӧл вылэм та шуыса, та малпанлэсь куштӥськысал. Но Шакирзяновъёс ӧз сётске. Ӟазегпиосты будэтыны дышем бере нош одӥг удыс - сяськаос, гыльёс будэтон борды но басьтӥсько соос. «Гуртэ кӧчыса бертэммы бере Ижевскын улӥсь тодмоосмы тани та теплицаез лэсьтыны кенеш сётӥзы», - шуэ Фирдания.

Ву кисьтан гинэ но автомат амалэн быдэстӥське - кулэ вылэм зорем кадь вылӥысен, кулэ вылэм сюйзэ коттэ. Туала приспособлениосын лэсьтэм та теплицалэсь гинэ ӧвӧл, музъемлэсь, котькуд гыльлэсь, сяськалэсь «кылзэ» дышетскон вылӥ тодон-валанэн егит агрономлы Саярлы туж тунсыко: «практикаез нокыӵе тодон-валан воштыны уг быгаты вылэм», шуэ со. Саяр Ижевскысь агрономъёсын ялан кусып воземез, соос доры трос пол практикае мынэмез сярысь но вера.

- Нырысетӥ араз ик 45 сюрс выжы тюльпан мерттэм бере, будэтыны ум быгатэ шуыса ӧвӧл, кызьы вузаломы шуыса кышкаськеммы вал. Уд оске - ӧз но тырмы али, - шуэ Фирдания.

- Туэ но трос будэтӥмы. Эх, со чеберлыкез адӟысалды ке: одӥг убо горд-горд тюльпанъёс, кыкетӥез ӵуж-ӵуж, куинетӥез льӧль... Сортъёсыз но паймымон луизы. Яркыт тусо, пучыоссы бадӟымесь, со сяна, чидась, кема возьмаськись... Басьяськисьёсты Интернет пыр шедьтӥмы, районын улӥсьёслы но вузамы. Туэ сяська вузанъя магазинмес усьтӥськеммы вал, солэн но юрттэтэз луиз. Тюльпанъёсты интыяса быдтэм бере, гыль удъёсты вайимы. Соос 50 сюрс «гинэ»...

«Кызьы ваньзэ ужаны вутскиськоды?» - шуэм юанэлы кузёос:

«Дышем бере солэн номыр секытэз ӧвӧл - шуизы. - Ӟазегпиос пичи дыръя гинэ туж секыт. Соос понна шунтӥськись теплицаез радъямы, асьмелы диван пуктӥмы... Соос пӧлын ветлон сюлэмлы ик каньыллык сётэ ук. Теплица буш медаз улы шуыса, кияр но мерттӥськомы. Ѓазегпиосты 20-тӥ мае гинэ вайиськомы ук. Тодӥськоды-а, ӟазегъёслы курон кыӵе бадӟым?! Ӵынатэмъёссэ но куро, нош милям ӵынатыны ӟазегъёс уг кылё. Уг но тырмы али, гуртоослэсь но вузаськомы... Милесьтым адӟем карыса, табере гуртын но витьтон-сю ӟазег будэтӥсьёс вань. Нырысь сюрс гинэ ӟазегпи басьтӥськомы вал, кылем арын одӥг сюрс вить сю каримы, туэ кык сюрслы вуттыны малпаськомы».