Сырья гуртын Бадӟым пумиськон маин йылпумъяськиз? (фото)

12 гудырикошконэ Сырья гурт клубын радъяськиз гуртлэн историезлы сӥзем праздник — Каляка выжыосын «2-тӥ Бадӟым Пумиськон». Нырысетӥез таӵе форматэн пумиськон ортчиз вал 2021 арын. Лыктэм куноос понна ужрад тунсыко но ивортодэто луиз. Пумиськонлэн валтӥсь мугез — «Сырья — вордскем шаере» книгаез радъян но Каляка выжыослэсь династизэс пырак азелы вунонтэм карон.

Ужрадэз радъясь — клублэн кивалтӥсез Леонид Дмитриевич Сапожников — удмурт калык понна тодмо адями: удмурт лулчеберетэз ӝутӥсь, одӥгез удмурт азьветлӥсьмы, Балтась ёросысь удмуртъёслэн «Кенеш» НКА-зылэн кивалтэтэзлэн ёзчиез. 

Каляка выжы
Малы нимысьтыз та выжы висъямын? Малы ке шуоно гурт понна сётэм кужымзы но тыршемзы гуртлэн туала улоназ адӟиське. Сырья гуртлэн историяз мургес выйыса тодыны луэ: Егор Алексеевич Ивашов вордӥськем 1879 арын, тыршись но визьмо пиосмурт луэм. Солэн семьяяз 3 пиос но 2 нылъёс вордӥськиллям: Дмитрий, Василий, Иван, Парасковья, Мария (туннэ нуналэ семьяез Казахстанын улэ). 1930 арын кулаке поттыса, 3 пиосыныз но соослэн семьяосынызы Ивашовъёсты Сибире келяллям (Парасковья но Мария репресси улэ сюриллямтэ: соос быдэ вуымтэ вал на). Сырья гуртысь клублэн юртэз но ХХ даурлэн кутсконаз та династиен ӝутэмын вылэм. 1994 арозь соослэн кирпичен 2 этажъем юртазы покчиёзо школа интыяськем. Кас мылкыдо адямиослэн малпанъёссылы пумит Ивашовъёслэн семьязы улэп кыле. Сибирьын но соос тэк уг пуко: тыршо, нокыӵе ужлэсь уг палэнско. Сюлэмзы уг измы, уг чурытомы, сыӵе ик каньыл мылкыдо кылё, ярато, сюлмасько, вордскем шаерзэс но анай кылзэс данъяло. Бадӟым яратонзы но умоезлы осконзы династизылэсь историзэ но азьланьтэ.
Сӥлы карыса, 2020 арын Сырья гурт клублэн борддораз нимысьтыз мемориальной доска пуктэмын вал. Тыршись но гажамон выжылэн ужъёсыз зэмзэ ик Сырья гурт понна кулэлыко луизы. 

Туннэ нуналэ Егор Алексеевичлэн ӵыжы-выжыосыз Россилэн пӧртэм сэрегъёсаз но, Казахстанын но уло. Соос выжызылэн вордскем палъёсаз шумпотыса берто. Нимысьтыз та пумиськонэ но мылкыд карыса бертӥсьёсыз луизы. 

1-тӥ люкет — Конференция
Та люкетын валтӥсь ужпумъёс ӝутэмын вал, ужрадэ пыриськемъёс пӧртэм пумо юанъёслы валэктонъёс утчаны тыршиз. Нырысь ик Леонид Дмитриевич огъя Сырья гуртлэн историеныз тодматӥз: презентация пыр котькин шедьтэм археологической арбериосын тодматскыны быгатӥз. Собере Ципья гуртысь «Калыкъёслэн эшъськонзы» шаертодонъя музейын ужась Сания Бариева Сырья гуртлэн историеныз герӟаськем материалъёсын тодматӥз. Татын возьматэмын вал дышетскисьёсын лэсьтэм книгаос. Соосты кылдытон понна пиналъёс асьсэос коньдон утчаллям, чеберман арбериос кылдытӥллям. Книгаосын Сырья гурт сярысь веранъёс люкамын, нимъёс, интыос. 

Собере нимысьтыз блок сӥземын вал ини Ивашовъёслэн династизылы. Нырысь ик Ольга Фомина — Егор Алексеевичлэн правнучкаез — Ивашовъёслэн ӵыжы-выжы писпуэныз тодматӥз. Егор Алексеевичлэн котькуд нылпиез понна нимысьтыз схема лэсьтэмын: 2 ар куспын трос материал шедьтэмын, ваньмыз огъя люкамын. Озьы ик Ольга Ивановна вофорт суредаськон амалэн (металл вылын суредан амал) тунсыкъяське вылэм. Аслэсьтыз суредъёссэ со Ципья гуртысь «Калыкъёслэн эшъяськонзы» шаертодонъя музейлы но Сырья гуртысь клублы кузьмаз.

— Та ужын Фоминъёслэн семьязы мыным юрттӥз, шӧдскымон ужез капчиятӥз. Табере дырез мукет ужъёслы сӥзьыны быгатӥсько ни. Бадӟым тау шуисько тӥледлы тыршемды, ӝуась мылкыдын уж борды басьтӥськемды понна. Клубе лыктэм адямиос но егит поколение азьло ик та писпу дорын кема сыло. Малпасько, азьланяз книгаын эшшо но тросгес материал луоз, — тау каремзэ вераз Леонид Дмитриевич.

Леонид Сапожниковлэнвуоно книгаезлэн одӥг люкетэз гуртоезлы — Николай Валентинович Жуковлы — Удмурт Элькунысь лулчеберт удысын сӥё-дано ужасьлы сӥземын луоз. Со 70 пала кырӟанъёс кылдытэм, жаляса верано, троссэ гожтыны вуымтэ. Туннэ нуналлы 7 кырӟанэз гинэ тодмо луыса кылемын. Соос пӧлысь «Вордскем палъёс» кырӟанэз быдэстӥзы сцена вылын «Сырья зоутъёс».

Ираида Чернова но Марина Плотникова — Сырья гуртысь азьветлӥсьёс — лыдӟизы нимысьтыз гожтэтъёсты. Нырысетӥез — Егор Алексеевичлэн внучкаезлэн тодэ ваёнъёсыз, кыкетӥез — Ижкарын ужам радиожурналистлэн — Евгения Плотниковалэн люкам материалъёсыныз гожтэт. 
Озьы ик пумиськонэ Василий Никитин но пыриськиз — удмурт кылэз ӝутӥсь, берыктӥсь, Вконтакте вотэсбамын удмурт кылэз азинтӥсь. Со тодматӥз аслаз семья кусыпъёсыныз, утёд ке, солэн Анна песянаез но Каляка выжыысь луэм. 

— Нырысь ик тау кареме потэ Егор Алексеевичлэн лыктэм ӵыжы-выжыосызлы. Асьтэос адӟиськоды, кызьы милям азьветлӥсьмылэн, Леонид Дмитриевичлэн, та ужез пумаз-йылаз вуттэмез потэ. Юан но шонер пуктэ: кулэ-а книга, кулэ ӧвӧл-а. Одно ик, коньдон паласен туж ӝикыт юан. Тыршом вань кужымъёсты уже кутыны. Таӵе тыршись азьветлӥсьёс туннэ нуналэ туж ӧжыт. Тау шуисько солы, сӥзисько юн тазалык, ужаз но, семьяяз но шудо-буро улон. Малы ке шуоно со тырше будӥсь поколенилы Сырья гуртлэсь историзэ возьматыны. Кызьы шуо: «Кутсконэз вань — Инмар юрттоз». Тау лыктэм куноослы, юн тазалык ваньдылы, — конференциез йылпумъяз сырьяослэн аспалзы, Пётр Григорьевич Чернов.

Конференцилэн пумаз кылдэм юанлы — «Кулэ-а Сырья гуртын улӥсьёслы нимысьтыз гурт сярысь книга?» — котькудӥз аслыз валэктон сётӥз, луоз. Мынам малпамея, вордскем гуртэдлэсь историзэ нимысьтыз энциклопедия выллем книгаен адӟыны, азьланяз нылпиостэ, внукъёстэ соин тодматыны туж данъяськымон луоз.

2-тӥ люкет — Ӝӧксьӧр кырӟанъёс
Татын ини узыр дасям ӝӧк сьӧрын кырӟанъёсты тодэ вайизы. Удмурт калык кырӟанъёс сяна, ӟуч кырӟанъёс но быдэстэмын вал. Вань кырӟанъёс сюлмысь огъя вордскем шаерез, матысь адямиосты данъянлы сӥземын. Соин тросэз арлыдоос понна сюлмазы шӧдскымон мур пыӵаз.
Кырӟанъёс мызган гуръёс улсын вал. Лыктэм куноос но мылкыдъёссэс шараязы, кырӟанъёсты быдэстӥзы, чай юизы, ог-огенызы тодматскизы, одӥг семья кадь луизы.

3-тӥ люкет — Калык эктонъёсъя мастер-класс
Котькуд ӝӧксьӧр пуконъёс одно ик эктонъёсын йылпумъясько. Удмурт калык соин ик узыр: эктонъёс капчиесь, мылкыдэз ӝутӥсесь. Егитэз но, арлыдоез но удмурт калык эктонъёсы мыло-кыдо пыриськизы. Ивашовъёслэн выжыысьтызы лыктэм куноос но мылпотыса удмурт эктонъёсты дышетӥзы, удмурт выжыысь луэмзы шӧдӥське: капчиен, вакчи дыр куспын вашкала эктонъёслы дышизы.

«Сырья зоутъёс»
«Сырья зоутъёс» — лулчеберет удысын котькуд удмурт адямилы но, концертъёсы ветлӥсь калыклы но тодмо коллектив шуи ке, янгыш уз луы. Котькуд вожвылъяськонъёсы, праздникъёсы мылкыд карыса пырисько, асьсэды юн герӟаськем гозы выллем возьмато. Пӧртэм кырӟанъёсты, эктонъёсты тодэменызы паймыто. 

Сырья гуртысь азьветлӥсьёс пумиськонын но асьсэды возьматӥзы: эктӥзы, кырӟазы, куноосты сюдӥзы-вордӥзы. Соослэн жингрес куараоссы котькуд лыктэм адямилэн сюлмаз шунытэсь мылкыдъёс пыӵатӥзы. 
Нимысьтыз висъяны кулэ на Николай Плотниковез — ёросысь одӥг гинэ кубызэн шудӥсь пиосмуртэз. «Вай гажанэ бур кидэ» кырӟанэз кылзӥськыса, кубызлэн аспӧртэмлыко чузъяськеменыз вашкала дыре выжиськод, калык улонэ юнгес пыриськод.

Йылпумъян 
Малпасько, та ужрад Сырья гурт калык понна гинэ ӧвӧл, вань ёросысь калык понна но туж пайдаё но тунсыко, малы ке шуоно котькуд гуртын сыӵе нимысьтыз гурт историез эскерисьёс луизы ке, ёрослэн но историез трослы йылыны быгатоз.

Но, жаляса верано, таӵе ужлэн шуг-секытъёсыз трос: вашкала материалъёсты утчан-эскерон понна дыр но коньдон кулэ. Пӧртэм пумо юрттэт юнме уз лу. Пичи кужым — бадӟым ужлэн инъетэз. Кузьыли пичи ке но, уг кышка аслэсьтыз трос поллы бадӟымесь грузъёсты нуллыны. Адями но сыӵе ик луыны кулэ!
Сырья гуртысь калыклы, Каляка выжыысь адямиослы, Леонид Дмитриевичлы но солэн «Сырья зоутъёс» коллективезлы нимысьтыз тау кареммес вераммы потэ таӵе тунсыко пумиськон ортчытэмзылы. Вань тодмостэм ужъёсты пумаз мед потозы, гурт понна сётэм кужымды асьтэлы ик ӟечен мед берытскоз. Оскиськом, вань шуг-секытъёсты вормыса, Сырья гурт сярысь книга котькуд коркан аслэсьтыз интызэ шедьтоз!