Сырья школа-нылпи садын отчётной концерт ортчиз

Сырья гуртысь нылпиос сярысь трос адямилэсь тазьы шуэмзэс кылэме вань: «Сырья гуртын Китайын кадь трос нылпиос». Зэмзэ ке верано, куддыръя сырьяос асьсэос но тазьы шуылозы вал. Бен, азьло, оло, озьы ик луэм, дыр. Ог 15-20 ар талэсь азьло гинэ но классъёсын 6-7 нылпи кузя дышетскизы (Сырья выллем пичи гуртъёс понна та бадӟым лыдпус). Туннэ нуналэ ини гуртысь школа-нылпи садын 32 нылпи лыдъяське — 16 дышетскись но 16 визьнод басьтӥсь пиналъёс. Азьло дырен ӵошатыса, та ӧжытгес. Школаын 4 класс (котькудаз быдэн кӧня ке нылпиос дышетско), садикын кык группа вань. Школа-нылпи садын, директорезлэн Гришкина Елена Александровналэн верамезъя, арысь аре нылпиос кулэсмо. Но озьы ке но татын туннэ нуналэ нылпиослы умой визьнод сётон понна укмыс ӵошен ужало. Эшкеева Людмила Николаевна но Плотникова Елена Анатольевна татын самой егитъёсыз, соос визьнодасьёс луыса тыршо. Соослэн кык юрттӥсьёссы вань на, нянечкаос, — Камашева Татьяна Павловна, Корнилова Татьяна Пантилеевна. Сапожникова Галина Александровна но Филиппова Наталья Никодимовна — дышетӥсьёс. Соос дасо аръёс ӵоже гуртын дышетскисьёсты дышето ини. Троцианская Марина Кузьминична утялскись, завхоз, нош Пчельникова Ирина Павловна — повар. Соос — школа-садын самой кулэ луись адямиос луо, дыр, — сюлмасько нылпиослэн ческыт сиськемзы сярысь, котыразы ваньмыз утялтэм луэмез сярысь. Ачиз кивалтӥсь, Елена Александровна, Сырья гуртын егит дырысеныз тырше ни. 1994-тӥ арысен со визьнодась луыса ужаз, нош 2000-тӥ арысен кутскыса туннэ нуналэ но со — директор.

— Асьме ёросамы 16 школа-нылпи сад вань. Соос пӧлысь куинез гинэ (Сырья сяна Ярак-Чурма но Вылын Ушма гуртъёсысь школа-нылпи садъёс) удмурт кылъёсты дышето. Ми школа-садамы нылпиосты ӟуч кылын но, удмурт кылын но дышетӥськомы, — шуэ Елена Александровна. — Анай-атайёс асьсэос куро дышетонэз ӟуч кылын радъяны, малы ке шуоно Ципья школае дышетскыны выжемзы бере соослы капчигес луэ, ӟуч кылэз умой тодӥзы ке.

Та пичи коллективлэн тыршеменыз сырьяос туж тунсыко но котькинлы сюлмаз кельшись концерт адӟыны быгатӥзы.

Концертэз учкыны лыктэмъёс туж трос вал — залын буш инты ик ӧз кыльы. Концертэ школьникъёс но, садике ветлӥсьёс но пыриськизы, соос пӧлын самой покчиосыз но вал. Программаез но концертлэн узыр луиз: татын вал эктонъёс-кырӟанъёс но, серемес сценкаос но. Пусйыны кулэ, нылпиос ӧжыт бере, котькудӥзлы трос номеръёсы пыриськыны тупаз. Но озьы ке но, визьнодасьёс быгатӥллям вакчи дыр куспын нылпиосыз эктон-кырӟанъёслы умой дышетыны. Вылаз ик котькуд праздниклы выль концерт номеръёс дасяло вылэм. Туж быгатыса кырӟазы но сценка пуктӥзы асьсэос школа-нылпи садын ужасьёс. Соослэсь ӧз кыле нылпиоссы, дышетскисьёссы но. Котькуд номер пыр-поч дасямын вал, чебер костюмъёссэс но асьсэлэн визьнодасьсы ик, Людмила Эшкеева, вуре вылэм.

Концерт йылпумъяськем бере Елена Александровна дышетскон арын умой азинсконъёсы вутскем — конкурсъёсы пыриськем, умой дышетскем нылпиосты, ужазы вормонъёсы вутскем дышетӥсьёсты грамотаосын пусйиз, озьы ик активной анай-атайёслы но сцена вылысен грамотаос басьтыны шуд усиз.

— Туннэ таӵе умой концерт адӟеммы — со визьнодасьёсмылэн, дышетӥсьёсмылэн но озьы ик анай-атайёсмылэн бадӟым кужым понэмзылэн бервылыз. Тӥляд тыршеменыды, юрттэменыды таӵе усто, быгатӥсь нылпиосмы будо. Тау бадӟым лыктэмдылы, вуонояз нош ик тӥледыз таӵе тунсыко программаен шумпоттыны тыршомы, — шуиз Елена Александровна Гришкина.