Сюлэмлы праздник кулэ

Тросэз соос «дуно» шутэтскон нунал луэмысьтызы. Нош гордэн гожтымтэ праздникъёсты веранэз ик ӧвӧл. Огшоры нуналлэсь номаин уг висъясько, сюлмын праздник мылкыд кылдытӥсьтэм бездыт, пуштростэм праздникъёсты тодэ кельтымон но ӧвӧл. Уноезлэн праздниклы пӧрмем историез, мугъёсыз но валантэм. Праздник шуыса ялӥськем бере, со та нимлы ярамон луыны, яке котькин понна витьымон луыны кулэ. Яра али, та зэмлыклы тупась, вань адямиослэсь сюлэмзэс «вырӟытӥсь» Выль ар праздник, Сабантуйёс вань. Эшшо 23-тӥ февраль, 8-тӥ Март праздникъёсын ӧжытак мылкыдмес ӝутӥськомы вылэм али.

Нош азьло?! Соку календарьын гордэн тодмостэм праздникъёс чиньыен лыдъямон но соосты школаын дышетскись котькуд нылпи тодэ, туж вите вал. Та праздникъёс азьвыл ик ӝутскем мылкыд кылдыто вал, соин-а меда соос быдэс шаер праздниклы пӧрмылӥзы. Туннэ сыӵе праздникъёслэн списоказы одӥг 9-тӥ Май гинэ кылиз кадь. Куке но 1-тӥ Май но туж бадӟым, туж шулдыр праздникъёслэн одӥгез вал. Табере со но пуштроссэ ыштӥз, мылкыд ӝутскон уг шӧдӥськы ни. «Нырысетӥ Май Вазиськонъёс» улсын огазеяськыса, та праздник зэмзэ ик Тупаса улонлэн, Ужлэн но Майлэн праздникез шуыса оскыса будӥмы но... Мӧйы поколение дыдыкъёс лэсьтэмзэ (соин тупаса улон кусыпъёсты юнматонэ люкет пыртӥськомы шуыса), та нуналлы азьвыл ик писпу улвайёсты вуэ пуктыса вожектытэмзэ, соосты конфет кагазлэсь лэсьтэм сяськаосын чеберъямзэ тодаз вае... Тросэн лыктэм ӟечкылан открыткаос котькуд юртын праздник мылкыд кылдыто вал.

... Туннэ но сюлэм каньыл улонэз, ӝутскем праздник мылкыдэз вите.