Сюлме вунонтэм кылизы

85 ар — ачиз ик, оло, возьматэ но валэктэ газетлэсь ортчем сюрессэ, азинскемзэ. Газет кылдыку, Совето Союзын со дырын гуртъёсын колхозъёс кылдӥзы, туж ик капчи вакыт ӧй вал, дыр, со. Нош тужгес секыт, ноку вунонтэм дыр, кудӥз котькуд семьяе кайгу, куректон, бӧрдон, сютэм улон но курадӟон вайиз — со Быдӟым Атыкай ожмаськон. Соин сэрен ик гожтоно кариськи, кызьы вуылыны кылдӥз ӟырдыт ожмаськон интыосы. Азьло дыре, Совето Союз аръёсы умой дышетскись пиналъёсты, спорт яке мукет удысын азинсконэз ке луиз, ёросын школа азьветлӥсь интыосын ке луиз, РОНО бушын путёвка сётылӥз кыӵе ке но дано интые мыныны. Милям школае азьло аръёсы но вуылэм вал ини, кылсярысь, пиналъёс дышетӥсьёсын ӵош Полтавае, Волгоградэ ветлӥзы. 1987 арын, гужем ми но, ньыль дышетӥсьёс, 25 пиналъёсын вуылӥмы Смоленской областе. Сюрес вылэ потыны гинэ дасяськисько, Ципьяын улӥсь Рита сузэре кык нылпиосыныз лыктыса пыриз. Мон соку ик директор доры кошки, со кылзӥськиз но шуиз: «Мария Петровна, сузэрдэс тӥ трос пол адӟоды, нош отын тӥ мар адӟоды, сое адӟыны уд ни быгаты». Туннэ нуналозь но тау кылме верасько мон Ю.С. Саитовлы — директорлы, туннэ нуналын со кивалтэ ёросысьтымы Удмурт центрен. Азьло, со вакытын сотовой телефон ӧй вал, дорысь телефон но ӧй вал. Озьыен, сузэреным 20 минут адскыны вутскимы, нош собере со 20 минут трос пол вуылӥз на.

Янаулэ автобусэн потӥмы, Свердловск - Харьков поездэн кошкимы. Уй кӧлыса, ӵукна Сафоново городэ вуимы, милемыз автобус пумита вал ини. Соку ик гостиницае интыязы, тодматском Сафоново городэн, пичигес гинэ, туж шыпыт. Син азямы со усиз, котькытын трос сяська - клумба, туж утялтэмын. Отын ми куать нунал улӥмы, нуналлы быдэ автобусэн кужмо ожмаськон ортчем интыосы вуылӥмы, Смоленск, Дорогобуж, Ельня, Гагарин, Вязьма, Бородино. Вуылэм интыос ваньмыз жугиськон ортчемен юн герӟаськемын, отын улӥсь калыклэн ноку уз вуны. Ветлэм интыосыз ке гожтӥд, одӥг книга но гожтоно луоз. Кӧнязэ ке гинэ верало.

Дорогобуж — шахтёръёслэн городзы, шахтёръёслэн клубазы ик пумитазы, туж трос веразы, шахтёръёслэсь ужан интызэс но возьматӥзы, музъем пушкы лифтэн васькимы, ваньнамылэн кымесамы шахтёрской лампочка понӥзы. Нырысь ик сюлэм шурдӥз кадь, нош собере дышимы. Ужан интызы югыт, пичиесь вагонеткаосын рельс кузя эгыр келяло. Со дыре ик малпан кылдэ: кыӵе кышкыт но дано шахтёръёслэн ужзы, тодытэк уг верало эгырез «сьӧд зарни» шуыса, озьы ик но вань, дыр, со, юнгес ке малпад. Трос верамын вал жугиськонлэн мынэмез сярысь, кызьы вормизы фашистъёсты. Сюлме вунонтэм кылизы трос пленэ сюрем солдатъёсты, партизанъёсты улэпкын шахтае сэрпалляллям, соослэн ӝуштэмзы олокӧня нуналлы кыстӥськем шуыса верам кылъёс. Сыӵе сьӧсь ужъёсты кызьы вунэтоз отын улӥсь калык!

Вератэк, гожтытэк уг луы Смоленск городэ вуылэммы сярысь. Отын пумитазы «Боевой Славая музейын». Жугиськонын ветлэм, ас синмыныз адӟем, сюлмыныз ортчем ожсюрес сярысь синъёсыз ик гордэктыса валэктӥз милемлы музейлэн кивалтӥсез. Жугиськон кутскем бере, ньылетӥ нуналаз ик немецъёс вуиллям татчы, Смоленске. «Туж юн жугиськон мынӥз, — шуиз со. — Пыд улын музъем ӝуаз — сое кышкыт вераны». Музейысен нош нуизы землянкае. Отысен, гурезь уллань васькыку возьматӥзы амбразураез, кытысен пулемётэн ыбылӥллям. Отын но трос интыосы вуимы, нош огзэ гинэ, туж сюлэме пыӵаса кылемзэ, гожтэме потӥз. Отын милемыз сюдӥзы ресторанын, ӝӧк вылын чылк-чылк валем ӝӧккышет, туж ческыт сюдӥзы. Милемын ӵош мукет туристъёс но вал. Соиз милям синмамы йӧтӥз, ваньзылэн ӝӧк вылзы чылкыт сиемзы бере, нош милям пиналъёслэн кӧня ке нянь пырызы кылемын вал. Ми соку ик пиналъёсын вераськимы, ӝӧк сьӧрысь потыку, котьку сием интыед чылкыт мед луоз шуыса. Эшшо со сое но валэктэ, жугиськон дыръя одӥг шорем нянь гинэ ӧвӧл, нянь пыры но ӧз сюрылы...

Гагарин городэ но вуылэмез гожтыны малпай. Юрий Алексеевич Гагаринлэн улэм музей-корказ луимы. Нырысь ик соослэн семьязы Клушино гуртын улэ. Немецъёс 1943 арозь гуртазы кузёяськыса уло, 1943 арын гинэ асьмелэн солдатъёс мозмыто. Война бере соос Биатск городэ улыны интыясько, Юра нош ик школае ветлыны кутске. Калык трос тодэ ни, луоз, солэсь ортчем сюрессэ, дышетскемзэ. Туннэ нуналэ город  Гагарин шуыса нимаське. Музеез туж кельшиз, космосэ лобам дӥсьёсыз, тренировка дыръяз но мукетъёс, тужгес но кельшиз гаражез, кудӥз вить метръем, быдэсак пиялалэсь лэсьтэмын.

Бородино сярысь но ӧжыт гожтытэк уг луы, кудӥз 1812 арын Франциен ожмаськонэз но, Быдӟым атыкай жугиськонэз но адӟиз. Музее пырон азьын трос пушкаос, озьы ик Багратионлы памятник (туспуктэмын). Туж ӟырдыт ожмаськонъёс мынӥзы шуизы, Быдӟым тылож вакытэ, тужгес но партизанъёс. Бородино бусыын но луимы. †ошкыт паськыт бусы, шораз монумент сылэ, 1812 арлы сӥзьыса. Музей вӧзын пичигес гинэ флигель, кытын Лев Николаевич Толстой «Война и мир» книгазэ гожтӥз шуизы...

Мар мынам та гожтэменым вераме потэ, туннэ нуналэ асьмеос туж умой, шудо улонын улӥськомы. Та улон понна кӧня миллион калык улонзэ сётӥз. Соин ик улонлэсь кадырзэ тодоно, котькуд вордскем нуналлы шумпотыса, ог-огдэ валаса, корка пушкыт тынисьлык кылдытыса улоно. Нунал ке вордскиз, яркыт шунды мед югдытоз асьмелэсь та шудо улонмес, сюлмысь медаз кысы яратон тылгизьы, соку эшшо но улэмъя улэм потоз.

Мария Александрова

Башкортостанысь Шудек гурт