Хезмәт

Та семьяын солы эркын но каньыл

Туэ 60 арессэ пусйиз Ципьяын вордӥськем но будэм пияш - Пётр Миронов. Инвалид луыса вордӥськем Петяез, быдэ вуэмез бере ини, секыт улон пыр потэм анаез вазь кулэмен сэрен, Вукогуртысь ӵыжы-выжыосыз доразы басьтӥзы.

Со котькуд ар, октон-калтон ужъёс мынон дыръя, аслэсьтыз вордскем нуналзэ пусъе, уг вунэты ӧтьыны Ципьяысь бускельёссэ но. Котырес лыдпуссэ пусйыкуз но трос куноос люкаськизы. Ӟечкыланы ӧз вунэты сое «Труд» хозяйстволэн кивалтӥсез Рашит Хафизович Хадиев но. Ма, Петя ачиз но вань ӵыжы-выжыосызлэсь вордскем нуналзэс уг вунэты, та учыръёслы со нимысьтыз уксёзэ люкаса возе. Пичиез но, бадӟымез но ӟеч кузьым басьто солэсь.
Петя сӧсыр-лябыр вордскиз ке но, визьмо но туж юн сямо. Анаез - Елизавета лад-лад дышетӥз пизэ ассэ ӝикыт но чылкыт возьыны. Та пумысен али сое чакла-эскере Зина апаез. Сокем данъяське Петя вазь ӵукна ваньзылэсь азьло иземысь султэ ке. Кема изисьёсты сач-сач кылъёсыныз визьнода, собере ваньзылэсь изён интыоссэс солдат сямен паймымон ӝикыт утялтэ. Со котьку ик дышем сямызъя лач-лач куасалтыса чылкыт ныркышетсэ кисыяз интыя, дӥськутсэ ваньзэ радызъя шкафе ӝикыт тырыса возе. Праздникъёс дыръя вольыт дӥсяськыны тырше, галстук керттэ, шляпазэ йыраз понэ. Паймисько, ассэ сокем ӝикыт но чылкыт воземезлы, котьку юрттӥськыны дась луэмезлы.
Гуртын котьку уж тырмыт. Тани алигес Кузнецовъёс йылаз-пумаз вуттӥзы синмаськымон, укыр чебер корка лэсьтонзэс. Петялэн но луэмезъя ужлэсь палэнэ кылемез уг поты: ӟазег-ӵӧжъёсты сюдоно-эскероно, пудоослэсь интызэс сузяно, Анжелика кенакезлы скал кыскыны юрттоно, толалтэ азбарысь лымыез утялтоно. Коля агаезлэсь пичи нылъёссэ возьманы-чакланы но уг раньӟы со. Оляен Полина сое туж матын каро, шудыны ёрто, ма со пумит ӧвӧл соосын шудыны.
Огпол Юра агаеныз ӵошен азбарысь лымыез утялтэмзы бере «Тырмоз ни Петя туннэ понна ужаны, ойдо шутэтскыны корка пыромы» - шуыса, Юра корка вамыштӥз. Петя ӝегатскиз корка пырыны, со куспын калай липетысь лымы шуак васькиз но сое согиз. Юра нош ик сое ӧтьыны потыку Петяез ӧз адӟы ини, лымы люкысь пичияк изьызэ адӟыса валатскиз но тып-тып секыт лымы улысь ӝогак поттӥз. Больницае нуллытэк ӧйлась, юн ик пачкатэм секыт, кот лымы. Ярам, зол шуккиськем ке но, нокытӥыз сӧсырмымтэ, чигымтэ.
Кузнецовъёслэн бадӟым, тыршись но ӟеч мылкыдо семьяяз Пётрлы улыны эркын но гань-гань. Зина апаез, Нина но Анжелика кенакъёсыз сюлмаськемен-утялтэмен, Пётр тани 60 аресаз вуиз ини. Солэн кадь секыт диагнозэн адямиос кема уг уло ке но. Гуртоос но ултӥятэк, сантэм карытэк шораз лякыт вазисько. Со вожъяськымон ӟеч шӧдэ-вала адямиослэсь сямзэс, тодэ кинэн эшъяськыны, дышем сямыныз куд-огезлы туж тупамон кушемним лякыны но усто пӧрмытэ.
Нялтас Зина апай сярысь но кӧня ке кыл вераме потэ. Та йӧно мӧйы адями пырыен-пырыен тодаз возе вашкала йылол-сямъёсты. Одно ик утьыса возьыны дышетэ вашкала арбериосты, дӥськутъёсты, туспуктэмъёсты. Егитъёслы пайдаё но кулэ луись визь-кенешъёс сётэ, котькуд ужрадэз, учырез шонер валаны юрттэ. Та юртысь адӟыны луэ трос аръёс талэсь азьвыл уже кутӥськем тӥрлыкъёсты, сиён пӧран котыръёсты, байсан выллем мукет тунсыко арбериосты.
- Гужем-толэн пырась-потасьёс, куноос уг быро тӥ дорысь. Тужгес но гужем куноос трос луо, одӥгъёссэ келяськоды, мукетъёсыз вуо. Ма, аслам но кык пиосы пичи дыръязы гужемлы быдэ тӥ дорынгес улӥзы. Тау тӥледлы утемды-вордэмды понна, - шуисько мон солы. Тазьы верамелы Нина Павловна таӵе валэктон сётӥз:
- Тырттэм, буш коркан улон милемлы уг тупа, дышемын ӧвӧл ми асьмедыз калыклэсь ворсаны. Калык шуэмъя, корка пырасьёс ноку медаз быре, утем-сюдэм понна Инмар нош ик далетсэ сётоз. Уг валаськы адямиосты, кудъёсыз калыклэсь висъяськыса уло. Улон-вылон - со Инмарен туж валаса, быгатыса радъямын. Пётр кадь адямиос но Инмарен, пе, сётэмын, адямиослэсь чиданлыксэс, сямзэс, сӧсыр адямиосын кусып возёнзэс эскерон понна.
Йылпумъяса Пётрлы сое вераме потэ: «Мед шӧдод астэ али сямен ик тырмыт правоё адямиен, котьку ӝутскем мылкыдо, чырткем но шаплы мед луод».
Кузнецовъёслэн бадӟым семьяязы Пётрлэн интыез шорын
Вера Лобанова Вукогурт

Реклама
Теги: 250
Нравится
Поделиться:
Реклама
Комментарии (0)
Осталось символов: