"Таӵе егитъёс луыку, асьме культурамы улоз но азинскоз"(+фоторепортаж)

Кылем арня Покчи Лӧзя шоръёзо школа понна аспӧртэмлыко ортчиз - вить нунал ӵоже Татарстанысь удмуртъёслэн НКА-зылэн егитъёсын ужанъя огазеяськонэзлэн кивалтӥсез Анна Владимировна Самсонова аслэсьтыз #будудмурт шуыса нимам тунсыко проектсэ улонэ пыӵатӥз. Вакчияк верано ке, та выль проект. Пилотной амалэн со нырысетӥзэ улонэ пыӵатӥськиз ӵапак Покчи Лӧзя школаын. Чакламын со Татарстанын улӥсь 10-15 аресъем пиналъёс понна (нылпиос пӧртэм калыкысь луыны быгато). Валтӥсь курон – удмурт кылэн, лулчеберетэн, огъя вераса, удмуртлыкен тунсыкъяськон. 
Тӥни озьы вить нунал ӵоже Покчи Лӧзя школаысь 6-тӥ классысь пиналъёс огъя удмурт калык, сям-йылолъёс сярысь тодон-валанъёс басьтӥзы, удмурт калык кырӟанъёсын, эктонъёсын, дизайнэн тодматскизы. Та дыр ӵоже басьтэм вань тодонъёссэс но быгатонлыкъёссэс пиналъёс возьматӥзы 18 куартолэзе Покчи Лӧзя культура юртлэн сценаяз. 
#будудмурт проектэн валче Татарстанысь удмурт егитъёслэн огазеяськонысьтызы нылъёс но пиос учкисьёслы асьсэ тыршемзылэсь емышсэ ӵектӥзы – удмурт калык мадьверосъя (легендая) «Толэзьлэн тусыз» шуыса нимаськись удмурт кылын мюзикл возьматӥзы. Монэным вань учкисьёс соглаш луозы шуыса юн оскыса верасько: усто пӧрмем ужзы, кельшымон. Ваньмыз туж быгатыса, эсэпсэ валаса радъямын. Егитъёслэн асьсэды сценаын быгатыса воземзы, жингрес куараен кырӟамзы, чебер эктэмзы ваньзэсты синмаськытӥз, луоз. Эшшо но шумпотӥськод, та удмурт егитъёслэн сюлэмзэс сётыса ужамзылэн емышез шуыса валаса. Угось соослэн но, котькудмылэн кадь, асьсэ улонзы, ужзы, дышетсконзы вань. Нош соос, дырзэс но мылкыдзэс жалятэк, удмурт ужрадъёсы пырисько но, асьсэос но ортчытъяло. Та туж гажамон. Шумпотымон эшшо соиз но, Кукмор но Мари-Турек ёросъёсысь эшъёсынызы валче удмурт мюзиклэз сцена вылын пуктонэ пырисько асьме ёросысь егитъёс но - Карек-Серма гуртысь Иванов Алексей но Ципьяысь Зубарев Алексей. Газет лыдӟисьёсмы та егит пиосын тодмо ни, кыкназы но мызганчиос, студентъёс. Городын но дырзэс юнме уг быдто вылды, удмуртлыкез азинтонэ асьсэ люкетсэс пырто. Со туж ушъямон. Сыӵеос тросгес мед луысалзы. 
Шумот ӝытэ ортчем ужрадлэн аспӧртэмлыкъёсыз сярысь Татарстанысь удмуртъёслэн мерлыко огазеяськонзылэн исполнительной директорез Марина Иванова но вераз. Кыкез ик проектъёс (#будудмурт но «Толэзьлэн тусыз» мюзикл) – куинь ар ӵоже ужамлэн бервылзы шуыса пусйиз Марина Анатольевна. 
Покчи Лӧзяе Марина Анатольевна буш киын лыктымтэ вал. Вылӥын верам проектъёсты улонэ пыӵатонэ но кылем арын «БиГерд» форумез ортчытонэ бадӟым люкет пыртэм адямиосты со Татарстанысь удмуртъёслэн НКА-зылэн Таукарон гожтэтъёсыныз шумпоттӥз.