Хезмәт

Таӵезэ адӟись ӧй вал (+фото)

Зэмзэ но, Бадӟым Лӧзя гуртын таӵезэ адӟись ӧй вал на.

Туэ магазин дорысь нылпи площадкаын гурт поселенилэн тыршеменыз, выль ар шӧм пыӵатыса, -вож кыз пуктӥзы. Тӥни со кыз дорын 7-тӥ толшоре, ӵапак Ымусьтон нуналэ, калык шулдыръяськон ужрад ортчиз.

Кузь Выль ар шутэтскон нуналъёс ӵоже калык дораз пукыны жадем, вылды. Адямиос трос люкаськизы. Покчи Лӧзяысен, Балтасьысен но лыктэмъёс вал, городысен куное бертэмъёс но луизы. Семьяен-семьяен, пересез но, пичиез но шулдыръяськонэ, кин учкыны, кин пыриськыны потэм вал. Вож кыз котырын кырӟам-эктэм сяна, люкаськем калык пӧртэм конкурсъёсы но вожвылъяськонъёсы пыриськиз. Гозыен кыстаськыса асьсэлэсь кужымзэс мертазы воргоронъёс но, нылкышноос но. Озьы ик пиосмуртъёс кужмо но шаплы луэмзэс возьматӥзы кышномуртъёсты салазкие пуктыса бызьылонын. Пичиос но, бадӟымъёс но синъёссэс думыса арбери вандылӥзы, сӥньыс бинязы. Пиналъёслэн но мӧзмыны дырзы ӧй вал. Соос гурезь йылысен ледянкаосын нискылазы, ӟечыранъёсын ӟечыразы. Нош тужгес тодэ кыльымонэз нылпиос понна луиз, дыр, чебермам валъёсын ветлон. Кык чебермам валъёс, гырлыен жингыртыса, солань-талань гинэ ветлӥзы гурт кузя.

Огъя вераса, ужрад удалтӥз. Шулдыръяськыны мылкыдыз луэм мурт мылысь-кыдысь шулдыръяськиз та ӝытэ. Нош со самой кулэез но валтӥсез. Мылкыд ке луиз, мар ке но пӧрмоз. Соин но йылпумъяса, гурт калыклэн нимыныз тау шуэме потэ та шулдыръяськонэз ортчытӥсьёслы - Григорьева Ниналы но Филиппова Людмилалы. Дырзэс но мылкыдзэс жалятэк дасяськиллям соос та шулдыръяськонэз ортчытонлы. Нимысьтыз костюмъёс но дасяллям.

«Гурт калыклы туж бадӟым тау, одӥгез но пумит ӧз луы, кинлы вазиським, ваньзы коньдонэн юрттэт сётӥзы, соослэн юрттэменызы кузьымъёс басьтыны быгатӥмы», - шуиз гуртоосызлы тау карыса Милапай (Людмила Филиппова).

Бен, огъя кужымлэн бервылыз шӧдскымон луэ уга. Ортчем ужрад но талы пример шуыса вераны луэ.  

Нравится
Поделиться:
Реклама
Комментарии (0)
Осталось символов: