Татарстанысь удмуртъёс Покчи Лӧзяын выль проектэз улонэ пыӵатӥзы 

Нырысетӥзэ та проект радъяськиз асьме ёросысь Покчи Лӧзя школаын. Та школаын ик пумиськимы программалэн автореныз, Аннаен. Со шумпотыса милям юанъёсмылы ответъёс сётӥз. 
— Анна, нырысь ӧжытак лыдӟисьёсмес проектэныд тодматы вал. Кинлэн кичӧлтэмезъя но ку со кылдӥз? 
— Та проект малпамын вал ини кӧня ке ар талэсь азьло, идея вордӥськиз мынам. Мон малпай, уз луы-а меда бигер музъем вылын но Удмуртиысь «Шундыкар» кадь лагерь, удмурт кыӵе ке программа дасяны нылпиос понна. Куинь ар гожъяй проектэз. Диплом ужме но соин герӟай. 
— Проектэз гожтон — со одӥг уж, нош сое улонэ пыӵатон — мукет. Таӵе ужпум борды кыӵе энтузиазмен басьтӥськид ке но, финанс юрттэттэк уз луы. 
— Озьы. Проектэз умоен лыдъяса, мыным дурбасьтӥз Татарстанысь удмуртъёслэн НКА-зылэн председателез Андрей Сергеевич Герасимов, со кӧня ке юрттэт сётӥз финансированиен. Туж бадӟым тау солы. 
— «Будудмурт» программа удмурт нылпиос понна гинэ малпамын-а? 
— Та программа радъямын сыӵе нылпиос понна, кудъёсыз удмурт кылэз дышетско яке кудъёсызлэн сое дышетскемзы потэ. Мукет сямен вераса, удмурт нылпиос понна гинэ ӧвӧл со, ваньзылы, кинлы тунсыко удмурт калыклэн вашкала традициосыз но культураез — соос понна. Со луыны быгато бигеръёс но, ӟучъёс но, башкиръёс но... Зэмзэ ке верано, малпанам вань азьланяз та программаез вань калыкъёслы тупатыса радъяны. Малы ке шуоно проект сыӵе пластичной, сое луэ котькуд калыклы тупатыны, соос но асьсэлэсь культуразэс мед тодозы шуыса. 
— Нош кызьы татын тонэ нылпиос пумитазы? Кельшиз-а соослы? Аслыд кыӵе ке но йылпумъянъёс лэсьтэмед, дыр. 
— Нырысь вераме потэ тани мае: подросток-нылпиос — со сыӵе категория, кытын нылпилы уг тырмы ог интыяз пукон чидандлыкез, тросэз соос пӧлын ас пушказы ворсаськемын, ас дуннеязы уло. Но мон нылпиосын ӝог шедьтӥ огъя кыл, соин ик соос монэ умой тодо ини, асьсэлэсь кыкетӥ классэн кивалтӥсьсэс выллем но адӟо. Ужасал но ужасал али мон соосын, малы ке шуоно нылпиос туж чаляк вань информациез йыразы поно, туж тунсыкъясько, соос трос юанъёс сётъяло. Мон малпасько, соослы кельшиз шуыса. 
— Проектэдлэн рамкаосызъя нылпиосыз мар карыны дышетӥды? 
— Та проектъя ми дышетӥм нылпиосты удмурт калык шудонъёслы, верай историез, лулчеберет, удмуртъёслэн улон-вылонзы сярысь. Тодӥм удмурт эктонэз быдэстон аспӧртэмлыкъёс сярысь, дышетским одӥг эктон. Акашка йылол сярысь верамы, декоративно-прикладной творчествоен вырим. Нылпиос лэсьтӥзы удмурт нылкышно но пиосмурт костюмъёсты. Туж ӟеч ужазы нылпиос, мыным соослэн ужамзы кельшиз. 
— Та проектлэн нырысетӥ опытэз, ортче со милям ёросысь гуртын, Покчи Лӧзяын. Милемыз та шумпоттэ но, малпаськытэ но: малы одно ик Балтась районысен кутсконо кариды? 
— Нырысь татчы лыктэме потӥз, малы ке шуоно кылем арын татын ортчиз «БиГерд» форум, мыным соку ик татысь дышетӥсьёслэн коллективзы туж кельшиз, туж кельшиз атомосфераез, пумитамзы. Наталия Михайловна Артемьева милемыз туж шуныт пумитаз, соин ик ми со доры куриськимы. 
— Интервью басьтыны лыктытозям ик таӵе юанэн вазиськисьёс луизы ини: та проект районысь одӥг школаын гинэ радъяськоз-а? Кызьы луоно сыӵе районъёсын, кудъёсаз кӧня ке удмурт школаос? Вань сыӵе учыръёс но, куке школаын кӧня ке гинэ удмурт нылпиос дышетско. Соос та программае пыриськыны быгато-а? 
— Тыршомы котькуд районэ, котькуд удмурт школае вуыны, но со вуоно аре гинэ луоз ини, малы ке шуоно али нылпиослэн контрольнойёссы, экзаменъёссы. Азьланяз малпаськом та программаез методической разработка выллем лэсьтыны но сое лэзьыны педагог-организаторъёслы. Соку мон гинэ ӧвӧл, нош котькуд дышетӥсь быгатоз та программая ас дышетскисьёсыныз ужаны. Малпасько, котькуд мылкыд карись нылпи быгатоз соин пайдаяськыны. 
— Кин ке но тыныд юрттӥз-а та проектэз улонэ пыӵатыны? Валамон, финанс ласянь юрттӥсьёсыд вань, но со

сяна физической но моральной юрттӥсьёс кулэ на. 
— Одно ик юрттӥз национально-культурной автономимы. Со татчы, дышетон управление, гожтэт лэзиз, ваньмыз соосын согласовать каремын. Кыкетӥез, туж бадӟым юрттэт мыным сётӥз Наталия Михайловна, со мыным улон юрттэт но сётӥз, классэ но ӵектӥз, аудитория но шедьтӥз, технической базаен но туж юрттӥз. Озьы ик та проектэ пыриське на эшшо одӥг специалист, Мария Матвеева. Со адӟытӥз Агрыз ёросысь удмуртъёслэсь обрядовой культуразэс. Лыктыны кулэ вал Павел Александров, но, жаляса верано, ӧз быгаты. 
— Бадӟым тау дыр шедьтыса вераськемедлы. Малпасько, та проекттэ котькуд районын кулэезъя дунъялозы кызьы нылпиос, озьы ик анай-атайёс но.